[1] Manjari tinihup weꞌ kalime malaꞌikatin kuweꞌ tabuliꞌ pinangurung si iyehin. Pagtihupne, niyaꞌ takiteku poteꞌan, iye miyaꞌan bakas laboꞌ amban diyataꞌ langit pī si dunya. Pinangurung si poteꞌan miyaꞌan kunsiꞌ pangaluka tambel lowang gaꞌi tatekkadin.
[2] Pagtaluka ne weꞌ inēnan poteꞌan miyaꞌan lowangin, magtawus paguwaꞌ umbuhin amban dem lowangin kuweꞌ umbu amban eggas luha manamal. Hangkan ngalindem lahatin peggeꞌ katampengan dantaꞌ ellewin hawal subuk umbu mapaguwaꞌ amban dem lowangin.
[3] Amban dem umbuhin niyaꞌ paguwaꞌ meꞌ dulu laboꞌ pī si dunya. Pinabisa teꞌed bang siye ngekkeb kuweꞌ bisahan sipitkāꞌ bang ngekkeb.
[4] Bakas kasessaꞌan siye gaꞌi dinaꞌak pinakaꞌatan si siye meꞌ sabetin atawa meꞌ kayuhin atawa sasuku meꞌ jambangan si dunyahin. Iye subey inusaꞌden meꞌ manusiyaꞌin, sasuku gaꞌ niyaꞌ malka Tuhanin diyataꞌ lendoꞌde.
[5] Gaꞌi siye dinaꞌak mapatey meꞌ aꞌa miyaꞌan saguwaꞌ papeddiꞌande dem limem bulan. Duk peddiꞌnen kuweꞌ siye takekkeb sipitkāꞌ.
[6] Dem limem bulan miyaꞌan, meꞌ aꞌa takekkebin iye inangutden matey saguwaꞌ gaꞌi du siye matey. Mabayaꞌ ne teꞌed siye matey saguwaꞌ gaꞌi siye dinuhulan.
[7] Meꞌ dulu miyaꞌan bantukden kuweꞌ meꞌ kuraꞌ pinanyapan sōng binoꞌo si pagbonoꞌan. Niyaꞌ kuweꞌ korona bulawan diyataꞌ kōkde duk luweden kuweꞌ luwe manusiyaꞌ.
[8] Kōkden tahaꞌ kuweꞌ kōk dende. Impenden basag kuweꞌ impen limaꞌung.
[9] Dākanden lapat weꞌ sisik kuweꞌ basiꞌ nampengan dākanden. Bang pakiyab-kiyabde peppikden takale begeddunen, kuweꞌ begeddu kuraꞌ ekka manamal magparagan magboꞌo kalesade hap pagbonoꞌan.
[10] Engkoden kuweꞌ engko sipitkāꞌ taga dalum si tuggune duk iye miyaꞌan pamapeddiꞌde meꞌ aꞌahin dem limem bulan.
[11] Niyaꞌ sultan magbayaꞌ si siye. Iye dambuwaꞌ seyitan mangantanan lowang manggaꞌi tatekkad miyaꞌan. Ēnnen bang si bissāhan bangsa Hibrani si Abaddon. Bang si bissāhan bangsa Girik, ēnnen si Apolyon, hātinen pamakaꞌatin.
[12] Na, iye miyaꞌan tamanan balaꞌ makatalew-talew tagnaꞌ matekka si meꞌ aꞌa si dunyahin. Ubus miyaꞌan, niyaꞌ pe duwe balaꞌ makatalew sōng tekka.
[13] Manjari tinihup weꞌ kaꞌennem malaꞌikatin kuweꞌ tabuliꞌ bakas pinangurung si iyehin. Pagtihupne, niyaꞌ takaleku suwala amban ampat pidjū lamisahan bulawan pagtugtugan kamanyanin laꞌi si harapan Tuhanin.
[14] Paꞌin suwalahin si kaꞌennem malaꞌikat bakas manihup kuweꞌ tabuliꞌin, “Lekkahanun ne ampat seyitan bakas iningketan laꞌi si higad boheꞌ hadje inēnan Alpuratiley.”
[15] Manjari ilekkahan ne ampat seyitanin. Andang ne siye memes duk dinaꞌak si siye inagad-agad waktu inin, ellew inin, bulan inin duk tahun inin duk kuweꞌitu taꞌabut ne. Subey ne papateyde da bahagiꞌ meꞌ aꞌa dem dunyahin. Duwe bahagiꞌin gaꞌi pinapatey.
[16] Takaleku bang piye ekkahan meꞌ sundalu manguraꞌin, meꞌ tindeg meꞌ ampat seyitanin. Ekkahanden duwempūꞌ ngibu pinaminsampūꞌ ngibu.
[17] Kuweꞌ inin bantuk meꞌ kuraꞌ duk meꞌ manguraꞌ mapabagala si akuhin. Niyaꞌ tampeng dākanden basiꞌ kuweꞌ peyat ebbut duk bilu langgaꞌ duk binaning kuweꞌ meylang. Kōk meꞌ kuraꞌin kuweꞌ bantuk kōk limaꞌung. Duk niyaꞌ paguwaꞌ amban dem behe meꞌ kuraꞌin ebbut duk umbu duk kayat meylang.
[18] Da bahagiꞌ meꞌ aꞌa si dunyahin matey. Duwe bahagiꞌin gaꞌ. Matey meꞌ aꞌahin weꞌ ebbutin, umbuhin, duk kayat meylangin, iye tellu bayuꞌ mapaguwaꞌ amban behe meꞌ kuraꞌin.
[19] Saguwaꞌ meꞌ kuraꞌ miyaꞌan niyaꞌ duwe bayuꞌan pamapateyde meꞌ aꞌahin, kaꞌissaꞌ mapaguwaꞌ amban dem beheden, kaduwe iye ne si engkoden. Peggeꞌ engkoden kuweꞌ sawe, niyaꞌ kōkde panigtuk meꞌ aꞌahin.
[20] Saguwaꞌ meꞌ aꞌa matalebbihin, meꞌ aꞌa manggaꞌ mamatey weꞌ meꞌ balaꞌ miyaꞌan, gaꞌ du pagsusunande duk lebbahande panumbade meꞌ tuhan-tuhan hininangden. Masi pe siye numba si meꞌ seyitan duk si meꞌ tuhan-tuhan hininang duk bulawan, pilak, tumbaga, batu, duk kayu, bu gaꞌi du makakite, gaꞌi du makakale, duk gaꞌi du kapalumengngan.
[21] Gaꞌ du dehengande meꞌ hinangande malaꞌatin. Masi du siye mapatey duk gaꞌ du halin pangahinang-ngahinangde saweꞌden. Masi du siye magjina duk nangkew.