[1] Pagubus miyaꞌan, ngite ne ku isab malaꞌikat seddili duwaꞌi amban surgaꞌ. Hadje kapatutnen duk hawal sahayanen, ngadantaꞌ tibuꞌukan dunyahin.
[2] Ngalingan iye papales, paꞌinne, “Magkaꞌat ne, asal magkaꞌat ne teꞌed puweblo Babilon mabantuhin. Kuweꞌitu paglahatan meꞌ hibilis ne duk meꞌ seyitan. Duk iye isab palaꞌihan sasuku meꞌ manuk-manuk sammal duk haram.
[3] Peggeꞌ Babilon inin kuweꞌ dalil dende dupang moꞌo-moꞌo kēmon meꞌ bangsahin maginum boheꞌ ubas makalango, hātinen taboꞌo-boꞌo weꞌ ne siye maghinang laꞌat. Meꞌ kasultanan si dunyahin bakas nuhut iye maghinang laꞌat, duk meꞌ magdagang si tibuꞌukan dunyahin ngandaya ne teꞌed sabab napsuhan dendehin manamal.”
[4] Manjari inin, niyaꞌ takaleku suwala seddili amban surgaꞌ, paꞌinne, “Kaꞌam meꞌ sukuꞌkun, paluwas kaꞌam. Tahalaꞌ kaꞌam amban dende iyan. Daꞌa kaꞌam nuhut iye magduse duk kaꞌam gaꞌi tumuhut si iye ilegga.
[5] Peggeꞌ teppukan dusenen umabut ne si langit. Gaꞌ takayipat Tuhanin kēmon meꞌ hinanganne malaꞌatin.
[6] Hinangun bi si iye kuweꞌ bakas hininangne si meꞌ aꞌahin. Meꞌ paminasane si meꞌ aꞌahin balesanun bi pinaminduwe ekkahannen. Taboꞌone meꞌ aꞌahin nginaman hinanganne malaꞌatin, subey isab iye pinalessahan mulkaꞌ Tuhanin minduwe basagnen.
[7] Lumanduꞌ pagabbunen duk panganduhulne bayuꞌ-bayuꞌan pagnapsuhannen hangkan subey pinalanduꞌ isab kabinasahan duk dukka pinatekka si iyehin. Peggeꞌ luwal iye magabbu si dine, paꞌinne, ‘Aku inin sultan magbayaꞌin. Dumaꞌin ku inin balu. Gaꞌi ku teꞌed makalabey magsugul.’
[8] Sabab pagabbune inin, hangkan bessuwang tekka si iye meꞌ balaꞌin. Dem da ellew hadja magsumbayaꞌ iyan tekka si iye sakihin duk dukkahin duk unusin. Duk ineggas du iye dem ebbut peggeꞌ balakatan du Panuhutanin, iye Tuhan mangalaboꞌan iye hukumanin.”
[9] Manjari meꞌ kasultanan si dunya bakas magkahinangan nganduhulan napsuden duk dende miyaꞌan, magtangis siye iyan duk magmatey pagkitede umbu mapaguwaꞌ amban puweblo maꞌeggas miyaꞌan.
[10] Laꞌi siye nengge mayam-mayam amban katalahan peggeꞌ tinalew siye kaw siye talapey ilegga. Magmatey siye, paꞌinde, “Allo. Gaꞌi ne manjari. Asal kayiman pahāp puweblo Babilon mabantu duk mabasaganin. Dem da ora hadja tewwaꞌ hukuman Tuhanin ne kew.”
[11] Meꞌ aꞌa magdagang si dunyahin magmatey du isab duk magsugul peggeꞌ gaꞌ ne niyaꞌ melli meꞌ daganganden.
[12] Gaꞌ ne niyaꞌ melli amban siye bulawan, pilak, palmata mahalgaꞌ, duk meꞌ mutsaꞌ. Gaꞌ ne niyaꞌ melli meꞌ semmek mamahalgaꞌin, meꞌ semmek taluk, duk semmek peyat, duk sutlaꞌ. Gaꞌ ne niyaꞌ melli meꞌ bayuꞌ-bayuꞌan kayu mahunit takasuwaꞌin, duk meꞌ bayuꞌ-bayuꞌan panyap hininangin garing, duk kayu mahalgaꞌ, duk tumbaga, duk basiꞌ, duk batu inēnan malbol.
[13] Duk gaꞌ ne niyaꞌ melli sinduwe meꞌ daganganden kuweꞌ meꞌ pā-pā, laksiꞌ, kamanyan, meꞌ bayuꞌan isellan bengngi, atawa boheꞌ ubas duk isellan pagbella, duk tirigu, duk buwasnen. Gaꞌ ne niyaꞌ melli meꞌ sapiꞌ duk meꞌ bili-bili, meꞌ kuraꞌ, duk meꞌ pasakeyan kuweꞌ kalesa, duk meꞌ aꞌa hinang banyagaꞌ.
[14] Paꞌin meꞌ magdagangin si puweblo miyaꞌan, “Kēmon meꞌ alataꞌ pagnapsuhannun gaꞌ ne, kēmon alataꞌnun duk meꞌ bayuꞌan pagabbunun lanyap ne duk gaꞌi ne kasuwaꞌnu balik.”
[15] Duk meꞌ magdagang miyaꞌan, iye mangandaya sabab pagdagangde si puweblo miyaꞌan, nengge siye mayam-mayam amban katalahan peggeꞌ talew siye kaw siye talapey ilegga. Magtangis siye duk magmatey.
[16] Paꞌinde, “Allo. Gaꞌi ne manjari. Kayiman teꞌed. Puweblo mabantu miyaꞌan kuweꞌ dalil dende bakas magsemmek mahalgaꞌ, semmek taluk duk peyat, duk pupus barannen weꞌ pamulawan duk meꞌ palmata mahalgaꞌ duk meꞌ mutsaꞌ.
[17] Bu dem da ora hadja lanyap ne kēmon alataꞌne miyaꞌan.” Manjari kēmon nakuraꞌ si meꞌ kappalin duk meꞌ pasaherohin, meꞌ maghinang si kappalin, duk sasuku magusaha si diyaꞌutin, laꞌi siye nengge mayam-mayam amban katalahan,
[18] duk magmatey siye sakaliꞌ takitede umbu amban eggas miyaꞌan. Paꞌinde, “Gaꞌ teꞌed niyaꞌ puweblo bantu manamal kuweꞌ puweblo miyaꞌan.”
[19] Duk pinapīhan bagumbun kōkden, tandaꞌ weꞌ dukka teꞌed siye. Magtangis siye duk magmatey. Paꞌinde, “Allo. Gaꞌi ne manjari. Kayiman teꞌed puweblo mabantu miyaꞌan. Kēmon dapuꞌ meꞌ kappalin ngandayahan sabab alataꞌ puweblo miyaꞌan. Bu kuweꞌitu dem da ora hadja lanyap kēmon diyalemnen.”
[20] Manjari, magkēg kaꞌam meꞌ maluꞌu si surgaꞌin peggeꞌ magkaꞌat ne puweblo miyaꞌan. Magkēg kaꞌam meꞌ aꞌa Tuhanin duk meꞌ aꞌa kawakilannen duk meꞌ nabi magpalataꞌ lapal Tuhanin, peggeꞌ pinatekkahan hukuman ne weꞌ Tuhanin puweblo miyaꞌan sabab meꞌ laꞌat hininangne si kaꞌamin.
[21] Manjari inin, niyaꞌ dambuwaꞌ malaꞌikat basag manamal muwaꞌ batu landuꞌ teꞌed hadjenen kuweꞌ batu gilingan, bu ilakasan weꞌ ne pī dem tahik. Paꞌinne, “Kuweꞌ miyaꞌan du isab basagan pangalubu si puweblo Babilon mabantuhin duk gaꞌi ne teꞌed takite balik sumiyan-sumiyan.
[22] Kaꞌu puweblo Babilon, gaꞌ ne teꞌed niyaꞌ takale luꞌu diyalemnu magalpa duk magkalangan. Gaꞌ ne niyaꞌ takale luꞌu magsuling duk magtihup iye kuweꞌ tabuliꞌin. Damikkiyan gaꞌ ne teꞌed niyaꞌ takasuwaꞌ luꞌu meꞌ aꞌa maghinang ine-ine kapandeyanden. Duk gaꞌi ne teꞌed takale luꞌu hellingan meꞌ gilinganin.
[23] Gaꞌ ne teꞌed niyaꞌ takite luꞌu dantaꞌ payitaꞌan. Gaꞌ ne teꞌed niyaꞌ takale luꞌu paglami-lami meꞌ aꞌa si pagkawinanin. Meꞌ aꞌa magdagang maluꞌuhin, siye bakas tamanan mabasagan si tibuꞌukan dunyahin. Duk kēmon aꞌa si dunyahin kaꞌakkalan weꞌ meꞌ mangahinang-ngahinang saweꞌde maluꞌuhin.
[24] “Pinatekkahan hukuman puweblo Babilonin peggeꞌ laꞌi pinapatey meꞌ nabi magpalataꞌ lapal Tuhanin duk meꞌ aꞌa Tuhanin. Duk kēmon aꞌa binonoꞌ si tibuꞌukan dunyahin, puꞌunde binonoꞌ sabab puweblo miyaꞌan.”