[1] Sulat inin sabab meꞌ pinakitaꞌu weꞌ Isa Almasihin. Pinagintaꞌu inin weꞌ Tuhanin pu si Isa Almasi supaya tapakitene si meꞌ daraꞌakan Tuhanin bang ine sōng maꞌumantag si pasōnganin. Pinagintaꞌu inin weꞌ Almasi si daraꞌakannen, Yahiya. Dinaꞌak weꞌ ne malaꞌikatnen pī pu Yahiya ngakahan iye sabab meꞌ inin.
[2] Manjari sinulat isab weꞌ Yahiya kēmon bakas takitenen. Inaka weꞌ ne dem sulat inin meꞌ lapal Tuhanin duk toloꞌ mabennal bakas pinakitaꞌu weꞌ Isa Almasi si iyehin.
[3] Manjari, sine-sine matsa sulat inin kēgan du duk kēgan du isab sine-sine mapakale si meꞌ paꞌalan inin duk manuhut meꞌ dem sulat inin. Peggeꞌ tapit ne kaꞌumantagne inin kēmon.
[4] Sulat inin amban aku, Yahiya. Pasampayku sulat inin pī si meꞌ pituꞌ pagtipunan meꞌ aꞌa sukuꞌ si Tuhan malaꞌi si lahat Asiyahin. Karayaw kaꞌam ipat Tuhanin duk karayaw pasanyangne dem ateybin. Iye Tuhan manggaꞌi mapinda kemuwe tagnaꞌ awwalley sampay kuweꞌitu duk sampay salama-lama. Karayaw isab kaꞌam ipat Niyawa Tuhanin duk karayaw pasanyangne dem ateybin. Niyawa Tuhanin laꞌi si harapan paningkoloꞌan Tuhanin.
[5] Karayaw isab kaꞌam ipat Isa Almasi duk karayaw pasanyangne dem ateybin. Isa Almasi kapangandelan teꞌed meꞌ bissānen. Iye dehellu-dehellu pinakellum balik amban meꞌ pateyin. Duk iye isab magbayaꞌ si kēmon taga kapatut dem dunya inin. Malasa teꞌed iye si kite bi. Matey iye supaya tapuwasanne meꞌ duseten bi.
[6] Hininang kite bi weꞌ ne bangsa sultan duk meꞌ imam supaya kite bi maghinang si Samanen, Tuhanin. Hangkan subey pudjite bi Isa Almasi duk karayaw magbayaꞌ iye salama-lama. Amin.
[7] Pakale kaꞌam. Pitu du Isa Almasi patuhutan inalak. Kēmon aꞌahin takitede du iye sampay meꞌ aꞌa mamapatey iyehin. Kēmon aꞌa amban meꞌ kabangsa-bangsahan si dunyahin magdukka du sabab hukuman sōng pinatekkahin. Aweꞌ, toꞌo du teꞌed inin. Amin.
[8] Missā Tuhanin, iye Panuhutan Mabalakatanin, “Aku tagnaꞌan kēmon-kēmonin duk aku panambusannen,” paꞌin Tuhanin, iye manggaꞌi mapinda kemuwe tagnaꞌ awwalley sampay kuweꞌitu duk sampay salama-lama.
[9] Aku inin Yahiya, pungtinaꞌibi peggeꞌ saliꞌ kite bi sandel pu si Isa. Saliꞌ isab kite bi magsandal kabinasahan matekka si meꞌ masumakup dem pagbayaꞌan Tuhanin. Bakas pinatahalaꞌ ku dinaꞌak pī si pūꞌ inēnan Patmos, peggeꞌ bakas magusihat ku lapal Tuhanin duk toloꞌ mabennal pinakitaꞌu weꞌ si Isahin.
[10] Manjari, dambuwaꞌ ellew, ellew pamudji Panuhutanin, pagbayaꞌan ku weꞌ Niyawa Tuhanin. Makakale ku suwala basag kuweꞌ hellingan tabuliꞌ amban bukutanku.
[11] Paꞌin suwalahin, “Sulatun kēmon takitenun bu paboꞌohanun pī si meꞌ pagtipunan meꞌ aꞌa sukuꞌ si akuhin si meꞌ pituꞌ puweblo inin: si Epesus, si Ismirna, si Pergamo, si Tatira, si Sardis, si Piladelpi duk laꞌi si Laodikea.”
[12] Manjari paharap ku pī mayam bang sine mamissā si aku miyaꞌan. Niyaꞌ kiteku laꞌi pituꞌ tengenan payitaꞌan bulawan.
[13] Duk laꞌi si tengngaꞌ-tengngaꞌ meꞌ tengenan payitaꞌan miyaꞌan, niyaꞌ dangan nengge-nengge kuweꞌ bantuk manusiyaꞌ. Jubanen umabut si bettisne duk niyaꞌ pekkes dākannen bulawan.
[14] Kōknen poteꞌ kuweꞌ gapas duk matanen kuweꞌ kayat ebbut.
[15] Bettisnen ngillap kuweꞌ tumbaga bakas pinadem ebbut bu ilanuꞌan. Suwalanen kuweꞌ begeddu bessey boheꞌ hadje.
[16] Si tanganne kanawanin niyaꞌ antananne pituꞌ poteꞌan duk niyaꞌ paluwas amban behene bessi, talem matanen kaduwembiyaꞌ. Luwenen sahaya kuweꞌ silak ellewin bang lettu ne.
[17] Pagkiteku iye, magtawus ku hebbaꞌ si antag bettisne. Kuweꞌ ku aꞌa matey. Saguwaꞌ binettad weꞌ ne tanganne kanawanin si aku duk paꞌinne, “Daꞌa kew talew. Aku tagnaꞌan kēmon-kēmonin duk aku panambusannen.
[18] Aku maꞌellumin. Bakas ku matey saguwaꞌ ellum ne ku salama-lama. Aku taga kapatut magbayaꞌ si meꞌ mamateyin duk bang tungan siye papīku si ahilat.
[19] Sulatun,” paꞌinne, “kēmon meꞌ takitenun, meꞌ maꞌumantag kuweꞌituhin duk meꞌ pinaꞌantag si sinōngin.
[20] Akaku ne kuweꞌitu bang ine hāti meꞌ pituꞌ poteꞌan si tanganku kanawanin duk hāti tengenan payitaꞌan bulawan pituꞌin, gaꞌ kinataꞌuhan matuꞌuhin. Iye inin hātinen: pituꞌ poteꞌanin, siye mangantanan meꞌ pituꞌ pagtipunan meꞌ aꞌa sukuꞌ si akuhin. Duk pituꞌ tengenan payitaꞌanin siye meꞌ pituꞌ pagtipunan meꞌ aꞌa sukuꞌ si akuhin.”