[1] Pinakitehan isab si aku weꞌ malaꞌikatin boheꞌ mangurung umul gaꞌ tamanannen. Boheꞌ inin tilag kuweꞌ sāmin duk paselluy amban kursi Tuhanin duk Bili-bilihin,
[2] duk nelluy si mata lān puweblo miyaꞌan. Kaduwembiyaꞌ higad boheꞌ miyaꞌan niyaꞌ kayu, iye kayu mangurung umulin. Dem dan tahun kayu inin buwaꞌ minsampuk-duwe, mintedde kahabaꞌ bulan. Duk dawen kayu inin pamakawuliꞌ meꞌ kabangsa-bangsahan si dunyahin.
[3] Gaꞌ niyaꞌ takasuwaꞌ laꞌi dem puweblo miyaꞌan ine-ine kamulkaꞌan Tuhanin. Laꞌi kursi Tuhanin duk Bili-bilihin duk laꞌi meꞌ daraꞌakannen mudji iye.
[4] Takitede du luwe Tuhanin duk tasulat ēn Tuhanin diyataꞌ meꞌ lendoꞌde.
[5] Gaꞌ ne niyaꞌ sangem laꞌi duk gaꞌi ne siye ngangguna payitaꞌan atawa dantaꞌ ellewin peggeꞌ Tuhanin, Panuhutanin, iye ne dantaꞌden. Duk magsultan siye salama-lama.
[6] Manjari paꞌin malaꞌikatin si aku, “Meꞌ lapal inin bennal duk kapangandelan. Tuhanin Panuhutanin, iye mangurung Niyawanen pī si meꞌ kanabi-nabihanin, dinaꞌak weꞌ ne malaꞌikatnen magaka si meꞌ daraꞌakannen pasal meꞌ subey maꞌumantag si pasōnganin. Gaꞌi ne tiggel umantag du inin.”
[7] “Pakale kaꞌam,” paꞌin si Isa. “Tapit ne papiyukun. Kēgan du meꞌ aꞌa makahagad si meꞌ pinaꞌal dem libru inin.”
[8] Aku inin si Yahiya. Takaleku duk takiteku kēmon tasulat dem libru inin. Pagubus takaleku duk takiteku kēmon inin, pasujud ku si antag bettis malaꞌikat bakas mamakitehan aku kēmon inin, bahasa sōng mudji iye.
[9] Saguwaꞌ paꞌinne si aku, “Daꞌa kew pasujud si aku, peggeꞌ daraꞌakan Tuhanin du kite saliꞌ-saliꞌ, kuweꞌ du isab meꞌ kapungtinaꞌihannun, meꞌ kanabihanin, duk kēmon makahagad si meꞌ bissā dem libru inin. Tuhanin dambuwaꞌ-buwaꞌ subey pudjinu.”
[10] Duk paꞌinne si aku, “Daꞌa tapukanun meꞌ pinaꞌal dem libru inin peggeꞌ tapit ne waktu kaꞌumantagne inin kēmon.
[11] Sine-sine maghinangan laꞌat duk haram, ambat ne pasōngde meꞌ hinangande malaꞌat duk maharamin. Damikkiyan isab sine-sine maghinangan hāp duk sutsi, ambat ne pasōngde meꞌ hinangande mahāp duk masutsihin.”
[12] “Pakale kaꞌam,” paꞌin si Isa. “Tapit ne papiyukun duk tumbasante kaꞌam dangan-dangan mapataꞌ si hinanganbin.
[13] Aku dehelluhin duk aku dambulihin. Aku tagnaꞌin duk aku panambusanin.”
[14] Kēgan du meꞌ aꞌa mangosoꞌan semmekden duk gī manamal, hātinen sutsi ne ateyden. Peggeꞌ inurungan du siye inin kapatut padiyalem amban meꞌ gawangin pī dem puweblo miyaꞌan. Duk inurungan isab siye kapatut mangan buwaꞌ kayu mangurung umulin.
[15] Saguwaꞌ si luwasan puweblo miyaꞌan, īꞌ laꞌi meꞌ maghinangan malaꞌatin duk meꞌ aꞌa mangahinang-ngahinang saweꞌden, meꞌ magjinahin duk meꞌ mamonoꞌin, meꞌ manumba si meꞌ tuhan-tuhanin duk meꞌ magdustaꞌin duk meꞌ pangakkalin.
[16] “Aku inin si Isa. Dinaꞌak weꞌ ku malaꞌikatkun magpalataꞌ meꞌ inin si kaꞌam si meꞌ pagtipunan meꞌ aꞌa sukuꞌ si akuhin. Aku inin tubuꞌ si Daꞌud. Aku inin inēnan Māga, poteꞌan masahayahin.”
[17] Nambag Niyawa Tuhanin duk pangantin dendehin, hātinen meꞌ aꞌa sukuꞌ pu si Isahin, paꞌinde, “Pitu kew.” Sine-sine makakale bissā inin subey isab magpaꞌin, “Pitu kew.” Pitu kaꞌam sine-sine kaꞌam lekkakan. Nginum kaꞌam boheꞌ mangurung umulin pangurung libri pu sine-sine mabayaꞌ nginumne.
[18] Aku inin si Yahiya. Sessaꞌante kaꞌam, sasuku kaꞌam makakale meꞌ paꞌalan dem libru inin: daꞌa teꞌed tambahanun bi meꞌ lapal dem libru inin. Bang niyaꞌ nambahanne, patamba Tuhanin isab si iye meꞌ balaꞌ inaka dem libru inin.
[19] Bang niyaꞌ ngānan sinduwe meꞌ paꞌalan dem libru inin, ānan Tuhanin isab amban iye bahagiꞌ si iye buwaꞌ kayu mangurung umulin duk bahagiꞌ si iye puweblo masutsi inaka dem libru inin.
[20] Inin ne bissā manaksiꞌ si kēmon pinakitaꞌu dem libru inin, paꞌinne, “Bugtuꞌ teꞌed. Asal tapit ne papiyukun.” Na, karayaw du. Pitu kew, Isa, Panuhutan kamihin.
[21] Karayaw kaꞌam kēmon ipat si Isa, Panuhutanten bi.