[1] Puwas miyaꞌan niyaꞌ ne isab pabagala si aku. Niyaꞌ takiteku gawang luka laꞌi si surgaꞌ. Duk takaleku ne isab suwala kuweꞌ hellingan tabuliꞌ bakas mamissā si aku tagnaꞌin. Paꞌin suwalahin, “Padiyataꞌ kew pitu duk pakitehanku si kaꞌu bang ine-ine matekka si sinōngin.”
[2] Magtawus ku pagbayaꞌan weꞌ Niyawa Tuhanin duk niyaꞌ takiteku si surgaꞌ kursi, hātinen paningkoloꞌan bangsahan, duk niyaꞌ dangan ningkoloꞌ laꞌi diyataꞌne.
[3] Luwenen tinglak kuweꞌ meꞌ palmata mahalgaꞌ inēnan jasper duk palmata peyat. Paliput si kursi miyaꞌan niyaꞌ birarali bantuknen kuweꞌ palmata gaddung.
[4] Paliput si kursi miyaꞌan niyaꞌ duwempuk-ampat kursi seddili duk niyaꞌ ningkoloꞌ laꞌi duwempuk-ampat meꞌ bahiꞌ magsemmek poteꞌ duk taga korona bulawan diyataꞌ kōkde dangan-dangan.
[5] Duk amban kursi si tengngaꞌ miyaꞌan paguwaꞌ lalatin duk letteꞌin duk lugungin. Niyaꞌ isab pituꞌ sulariyan kayat laꞌi si harapan kursi miyaꞌan. Bang hināti, meꞌ pituꞌ sulariyan miyaꞌan Niyawa Tuhanin.
[6] Laꞌi isab si harapan kursi miyaꞌan, niyaꞌ kuweꞌ bantuk tahik tilag kuweꞌ sāmin. Duk niyaꞌ ampat malaꞌikat sakabayuꞌ si higad kursi miyaꞌan paliput. Meꞌ malaꞌikat miyaꞌan lapat weꞌ mata baranden si harapande duk si bukutde.
[7] Dambuwaꞌ malaꞌikat miyaꞌan bantuknen kuweꞌ luwe limaꞌung. Dambuwaꞌin isab kuweꞌ luwe sapiꞌ. Katellunen luwenen kuweꞌ manusiyaꞌ. Kaꞌampatnen kuweꞌ manaꞌul palayang.
[8] Kaniya-kaniya siye ennem peppikden duk lapat siye weꞌ mata amban diyalem duk amban bukut. Gaꞌ niyaꞌ halihande magkalang ellew-sangem. Iye inin kalanganden, paꞌinde: “Sutsi iye. Sutsi iye. Asal sutsi Tuhan Mabalakatanin. Tuhan iye gaꞌi pinda kemuwe awwal tagnaꞌley sampay kuweꞌitu duk sampay salama-lama.”
[9] Magkalang meꞌ ampat malaꞌikat miyaꞌan mudji Tuhan maꞌellum salama-lamahin. Pinahadje iye weꞌ de duk magsukul siye si iye. Kahabaꞌ siye magkalang,
[10] pasujud duwempuk-ampat meꞌ bahiꞌin paharap pī si Tuhan maningkoloꞌ si kursihin duk pinudji weꞌ de Tuhan maꞌellum salama-lamahin. Duk binettad weꞌ de korona bulawan diyataꞌ kōkden pī si harapan kursihin duk paꞌinde,
[11] “Kaꞌu Panuhutan kamihin duk Tuhan kamihin. Pataꞌ kew pinudji duk pinahadje peggeꞌ balakatan kew teꞌed. Kaꞌu mamapanjari kēmon-kēmonin. Amban bayaꞌnu hangkan siye pinapanjari duk hangkan siye ellum.”