[1] Pagubus miyaꞌan, niyaꞌ takaleku kuweꞌ suwala meꞌ aꞌa banes manamal magbissā papales laꞌi si surgaꞌ. Paꞌinde, “Pudjite bi Tuhanin. Iye hadja dendangan mapataꞌ pinudjihin. Balakatan iye duk iye maluwas kitehin bi amban duseten bi.
[2] Bentel kēmon hukumannen duk bennal. Ilaboꞌan weꞌ ne hukuman dende dupang mabantuhin, sabab taboꞌo-boꞌone meꞌ aꞌa si dunyahin magduse. Ilegga iye weꞌ Tuhanin peggeꞌ pinapatey weꞌ ne meꞌ daraꞌakan Tuhanin.”
[3] Manjari missā ne isab siye balik pinapales, paꞌinde, “Pudjite bi Tuhanin. Puweblo mabantu maꞌeggas miyaꞌan, gaꞌi teꞌed padeheng pangumbunen sampay salama-lama.”
[4] Manjari duwempuk-ampat meꞌ bahiꞌin duk ampat malaꞌikat sakabayuꞌin pasujud duk pinudji weꞌ de Tuhanin, iye maningkoloꞌ si kursihin. Duk paꞌinde, “Amin. Pudjite bi Tuhanin.”
[5] Manjari niyaꞌ suwala missā amban bihing kursihin. Paꞌinne, “Pudjihun bi Tuhanten bi. Kēmon kaꞌam meꞌ daraꞌakannen, sasuku matalew si iyehin, langkew ke pagaꞌabin atawa diyawaꞌ, pudjihun bi Tuhanin.”
[6] Manjari niyaꞌ takaleku kuweꞌ suwala meꞌ aꞌa banes manamal magbissā duk kuweꞌ begedduhan bessey boheꞌ hadje duk kuweꞌ hellingan lugung pales teꞌed. Takaleku paꞌinde, “Pudjite bi Tuhanin. Pudjite bi Panuhutanten bi, Tuhan Mabalakatanin, peggeꞌ iye ne magbayaꞌin.
[7] Subey kite bi magkēg duk subey kite bi sinna teꞌedan. Subey pudjite bi Tuhanin sabab balakatne mahadjehin peggeꞌ tekka ne ellew pangawin si inēnan Bili-bilihin. Duk pangantin dendehin, hātinen meꞌ aꞌa sukuꞌ pu si Isahin, ubus ne magsemmek duk ubus ne pinahāpan.
[8] Bakas inurungan ne pangantin dendehin semmek poteꞌ manamal, ngillap duk gaꞌ niyaꞌ tamak-tamakne.” Hāti semmek inin, meꞌ hinangan mabentel hininang weꞌ meꞌ aꞌa Tuhanin.
[9] Manjari paꞌin malaꞌikatin si aku, “Sulatun inin: Sinna meꞌ bakas tabatik si pagkawinan inēnan Bili-bilihin.” Duk paꞌinne pe si aku, “Bennal meꞌ lapal inin amban Tuhan.”
[10] Manjari pasujud ku laꞌi si antag bettisne mudji iye, saguwaꞌ paꞌinne si aku, “Daꞌa kew pasujud si aku. Aku inin daraꞌakan Tuhan du hadja kuweꞌ kaꞌuhin duk kuweꞌ meꞌ kapungtinaꞌihannu makahagad si toloꞌ mabennal pinakitaꞌu si Isahin. Tuhanin dambuwaꞌ-buwaꞌ subey pinudjinun.” Meꞌ toloꞌ mabennal pinakitaꞌu weꞌ Isa Almasihin, iye du isab miyaꞌan pinakitaꞌu si meꞌ kanabi-nabihan magpalataꞌ lapal Tuhanin.
[11] Manjari inin, takiteku surgaꞌin luka duk niyaꞌ laꞌi kuraꞌ poteꞌ. Manguraꞌan iyehin, ēnnen si Kapangandelan duk si Bennal. Bentel hukumannen duk bentel isab pamonoꞌne meꞌ bantanen.
[12] Matanen kuweꞌ kayat ebbut duk ekka korona pinabettad diyataꞌ kōkne. Niyaꞌ ēn tasulat diyataꞌne saguwaꞌ gaꞌ niyaꞌ ngataꞌuhan maꞌana ēn miyaꞌan luwal iye dendangan.
[13] Jubanen lapat weꞌ lahaꞌ. Duk ēn pangēn si iyehin “Lapal Tuhanin.”
[14] Banes meꞌ sundalu amban surgaꞌin paturul-turul si dambulihanne. Meꞌ sundalu inin nguraꞌ si meꞌ kuraꞌ poteꞌ duk meꞌ semmekden poteꞌ gaꞌ niyaꞌ tamak-tamakne.
[15] Niyaꞌ bessi talem paguwaꞌ amban dem behene duk gunane inin pangatune si meꞌ kabangsa-bangsahanin duk tadaꞌag siye weꞌ ne. Basag pagbayaꞌne si siyehin kuweꞌ dalil basiꞌ gaꞌi polong. Bang niyaꞌ ngatuhan iye, hinangne siye kuweꞌ dalil buwaꞌ ubasin bang pineggaꞌ hinang ininum; pakinamne si siye mulkaꞌ Tuhanin, Tuhan Mabalakatanin.
[16] Tasulat diyataꞌ jubane duk diyataꞌ paꞌane ēn inin, “Sultan meꞌ kasultananin duk Panuhutan meꞌ panuhutanin.”
[17] Manjari niyaꞌ takiteku malaꞌikat nengge diyataꞌ langit dem sahaya ellewin. Ngalingan iye papales si meꞌ manuk-manuk maglayangan diyataꞌ mahawanin. Paꞌinne, “Pitu kaꞌam. Patipun kaꞌam pitu si pagjamu-jamuhan Tuhan mahadjehin.
[18] Pitu kaꞌam mangan isi meꞌ aꞌa mamateyin, isi baran meꞌ sultan duk meꞌ jeneral duk meꞌ sundalu, isi baran meꞌ kuraꞌ duk meꞌ manguraꞌan siyehin. Kakanun bi isi meꞌ aꞌa mamateyin kēmon, banyagaꞌ duk dumaꞌin banyagaꞌ, malangkew pagaꞌanen duk madiyawaꞌ pagaꞌanen.”
[19] Manjari takiteku sattuwahin duk meꞌ kasultanan si dunyahin duk meꞌ sundaluden magtipun kēmon ngatuhan mapasakey si kuraꞌ poteꞌin duk meꞌ sundalune amban surgaꞌin.
[20] Tasiggew sattuwahin duk nabi manggaꞌi mabennalin, iye bakas maghinang meꞌ hinangan makaꞌulaliꞌin weꞌ kapatut pinangurung sattuwa si iyehin. Sabab meꞌ hinangan makaꞌulaliꞌ tahinangnen, kaꞌakkalanne hep meꞌ bakas kamalkahan malka sattuwahin duk meꞌ manumba si limbagan sattuwahin. Sattuwahin duk nabi manggaꞌi mabennalin ilakasan ellum pe, pī dem ebbut meylang, kuweꞌ luhahan lamew ebbutin.
[21] Duk meꞌ sundaluden matey weꞌ bessi mapaguwaꞌ amban behe dangan mapasakey si kuraꞌ poteꞌin. Duk isi baranden kinakan weꞌ meꞌ manuk-manukin kēmon tamanan takoleꞌde kinakanin.