[1] Manjari mayam ne ku isab balik. Takiteku iye inēnan Bili-bilihin laꞌi nengge diyataꞌ punu Siyon. Duk banes aꞌa laꞌi nuhut iye, dahatus duk ampatpuk-ampat ngibu ekkahanden. Meꞌ aꞌa miyaꞌan tasulat diyataꞌ lendoꞌde ēn Bili-bilihin duk ēn Samane Tuhanin.
[2] Duk makakale ku suwala amban surgaꞌ kuweꞌ begeddu bessey boheꞌ hadje duk kuweꞌ palesan lugung. Suwala takaleku miyaꞌan luꞌuy isab kuweꞌ helling bang aꞌahin magalpa.
[3] Meꞌ aꞌa dahatus duk ampatpuk-ampat ngibu miyaꞌan laꞌi nengge paharap si kursi Tuhanin duk si ampat malaꞌikat sakabayuꞌin duk si meꞌ bahiꞌin. Magkalangan siye kalangan baꞌahu duk gaꞌ niyaꞌ makaꞌaya kalangan miyaꞌan luwal siye meꞌ dahatus duk ampatpuk-ampat ngibuhin, peggeꞌ siye meꞌ bakas ilekkat amban antanan nakuraꞌ seyitanin palaꞌide pe si dunyahin.
[4] Siye inin meꞌ aꞌa gaꞌ niyaꞌ tamak-tamak ateyden. Kuweꞌ dalil subul siye, gaꞌ bakas magkahinangan duk dende. Patuhut-tuhut siye si inēnan Bili-bilihin tungan-tunganne. Bakas siye ilekkat amban antanan nakuraꞌ seyitanin palaꞌide pe si dunyahin duk siye inin dehellu-dehellu pinaseddili para si Tuhanin duk para si Bili-bilihin.
[5] Gaꞌ siye bakas takale magdustaꞌ. Gaꞌ niyaꞌ duse-dusede.
[6] Manjari inin, niyaꞌ takiteku malaꞌikat seddili maglayangan laꞌi diyataꞌ mahawan langkew teꞌed. Binoꞌo weꞌ ne aka-aka mahāp gaꞌ niyaꞌ kapindane salama-lamahin. Pinasaplag inin weꞌ ne si kēmon aꞌa si dunya amban kēmon pagsultanan, duk kabangsa-bangsahan, duk bayuꞌ-bayuꞌan bissāhan, duk kalahat-lahatan.
[7] Ngalingan iye papales, paꞌinne, “Subey kaꞌam talew si Tuhan. Pudjihun bi iye. Peggeꞌ taꞌabut ne waktu pangahukumne meꞌ manusiyaꞌin kēmon. Pudjihun bi iye, iye mamapanjari langitin duk bulakin duk tahikin duk meꞌ tuburan boheꞌin.”
[8] Manjari niyaꞌ malaꞌikat seddili pasunuꞌ si dehelluhin missā, paꞌinne, “Magkaꞌat ne, asal magkaꞌat ne teꞌed puweblo Babilon mabantuhin. Kuweꞌ iye dalil dende dupang. Pinaꞌinum weꞌ ne kēmon meꞌ aꞌahin boheꞌ ubas bisa duk siye taboꞌone magduse.”
[9] Manjari niyaꞌ ne isab malaꞌikat seddili pasunuꞌ si duwehin missā papales, paꞌinne, “Sasuku numba si sattuwahin duk si limbagannen, duk tamalkahan diyataꞌ lendoꞌnen atawa diyataꞌ tangannen,
[10] pagmulkaꞌan teꞌed siye weꞌ Tuhanin. Mulkaꞌ Tuhanin kuweꞌ dalil boheꞌ ubas gaꞌ niyaꞌ lamud-lamudne tinowangan weꞌ ne pī dem sawan inēnan Sawan Mulkaꞌ Tuhanin bu pinaꞌinum siye. Aweꞌ, sine-sine mudji sattuwahin pinapeddiꞌan teꞌed dem ebbut duk dem kayat meylang si pagmatahan meꞌ malaꞌikat masutsihin duk iye inēnan Bili-bilihin.
[11] Duk ngumbu gaꞌ tamanan ebbut pangaleggahan siyehin. Gaꞌ niyaꞌ halihan pagsandalden ellew-sangem, meꞌ bakas manumba sattuwahin duk limbagannen, duk kamalkahan siye ēn sattuwahin.”
[12] Hangkan hep kaꞌam meꞌ aꞌa Tuhanin, meꞌ manuhut pangandaꞌakannen duk masandel pu si Isahin, subey teꞌed sandalanbi.
[13] Manjari niyaꞌ takaleku suwala amban surgaꞌ magpaꞌin, “Sulatun inin: Tinagnaꞌan kuweꞌitu, sasuku matey bu sandel siye pu si Isa Almasi, asal kēgan teꞌed siye.” Manjari padūs Niyawa Sutsihin, paꞌinne, “Bennal iyan. Asal kēgan teꞌed siye. Humali ne siye amban paglubagden peggeꞌ kaꞌujudan hinangande mahāpin taboꞌo weꞌ de hap ahilat.”
[14] Manjari inin, mayam ne ku isab balik. Niyaꞌ takiteku inalak duk niyaꞌ kuweꞌ bantuk manusiyaꞌ ningkoloꞌ diyataꞌ inalak miyaꞌan. Taga korona bulawan iye diyataꞌ kōkne duk niyaꞌ sanggut talem si tanganne.
[15] Manjari niyaꞌ takiteku malaꞌikat seddili paguwaꞌ amban dem langgal bu ngalingan papales pī si maningkoloꞌ diyataꞌ inalakin. Paꞌinne, “Gunahun sanggutnun duk magani ne kew peggeꞌ taꞌabut ne musim pagpagani dem dunyahin. Peggeꞌ dunyahin kuweꞌ dalil tanaꞌ lugtaꞌ ne.”
[16] Manjari iye maningkoloꞌ diyataꞌ inalakin, ilabadan weꞌ ne sanggutnen dem dunya bu pinagani ne weꞌ ne kēmon.
[17] Manjari niyaꞌ isab takiteku malaꞌikat seddili paguwaꞌ amban langgal si surgaꞌin duk niyaꞌ isab sanggut talem boꞌone.
[18] Manjari, niyaꞌ pe malaꞌikat seddili paguwaꞌ amban atag lamisahan pagtugtugan kamanyan laꞌi dem langgalin. Iye miyaꞌan malaꞌikat manungguꞌan ebbutin. Ngalingan iye papales pī si malaꞌikat magboꞌo sanggut matalemin, paꞌinne, “Gunahun sanggutnun duk kehetun ne meꞌ pungut ubasin amban meꞌ bāhan ubas si dunyahin peggeꞌ tahak ne kēmon.”
[19] Manjari ilabadan ne weꞌ malaꞌikatin sanggutnen pī dem dunya bu kinehet weꞌ ne meꞌ pungut ubasin amban bāhanne, ubus bu ilakasan weꞌ ne pī dem pagpeggaꞌan hadje. Hāti dalilan inin, ilegga teꞌed meꞌ aꞌa pinagmulkaꞌan weꞌ Tuhanin.
[20] Na, meꞌ ubasin pineggaꞌ laꞌi si pagpeggaꞌan si luwasan puweblo. Mapaguwaꞌ amban pagpeggaꞌanin lahaꞌ kuweꞌ dunuk palasey, niyaꞌ meꞌ tellu hatus kilumetro talahannen duk lalemnen taman kakkang kuraꞌ.