[1] Manjari inānan weꞌ Bili-bilihin kapituꞌ lekket si katas ilikidin. Bessuwang hinek manamal dem surgaꞌin dem tengaꞌ ora.
[2] Manjari takiteku pituꞌ malaꞌikat manengge si harapan Tuhanin. Inurungan siye kuweꞌ tabuliꞌ tadambuwaꞌ.
[3] Manjari niyaꞌ malaꞌikat seddili magboꞌo tugtugan bulawan. Hap pī iye nengge si antag pagkulubananin. Ekka kamanyan pangurung si iye supaya magsaget ne bengngi kamanyanin duk pangampun kēmon meꞌ aꞌa sukuꞌ si Tuhanin, sābune manugtug kamanyanin laꞌi si lamisahan bulawan si harapan kursihin.
[4] Umbu kamanyan ineggas weꞌ malaꞌikatin magtuhut duk pangampun meꞌ aꞌa sukuꞌ si Tuhanin padiyataꞌ laꞌi si harapan Tuhanin.
[5] Manjari ineddoꞌ weꞌ malaꞌikatin tugtuganin bu pinennoꞌan weꞌ ne duk bale ebbut amban diyataꞌ lamisahan miyaꞌan, ubus bu ilakasan weꞌ ne pī si dunya. Magtawus magletteꞌ duk maglugung duk maglalat duk linug dem dunyahin.
[6] Manjari malaꞌikat pituꞌin magmemes ne sōng nihup dangan-dangan kuweꞌ tabuliꞌ pinangurung si siyehin.
[7] Manjari tinihup weꞌ dambuwaꞌ malaꞌikatin kuweꞌ tabuliꞌ bakas pinangurung si iyehin. Pagtihupne, magtawus banes ayis duk ebbut laboꞌ pī si dunya magsaget duk lahaꞌ. Da bahagiꞌ dunyahin eggas weꞌ ebbut miyaꞌan sampay da bahagiꞌ meꞌ kakayuhanin duk meꞌ sabetin eggas. Duwe bahagiꞌin gaꞌ eggas.
[8] Manjari tinihup isab weꞌ malaꞌikat mapasunuꞌin kuweꞌ tabuliꞌ pinangurung si iyehin. Pagtihupne, magtawus niyaꞌ kuweꞌ bantuk punu hadje eggas ilakasan pī dem tahik. Manjari da bahagiꞌ tahikin manjari lahaꞌ ne. Duwe bahagiꞌin gaꞌ.
[9] Magtawus isab matey da bahagiꞌ sasuku maꞌellum dem tahikin. Duwe bahagiꞌin gaꞌ matey. Duk da bahagiꞌ isab meꞌ kappalin magkaꞌat. Duwe bahagiꞌin gaꞌ.
[10] Manjari tinihup weꞌ katellu malaꞌikatin kuweꞌ tabuliꞌ pinangurung si iyehin. Pagtihupne, magtawus niyaꞌ poteꞌan hadje kuweꞌ bantuk laꞌal kayat laboꞌ amban diyataꞌ langit pī si da bahagiꞌ meꞌ boheꞌ duk meꞌ buwal boheꞌ si dunyahin. Duwe bahagiꞌin gaꞌ kalaboꞌan.
[11] Inēnan poteꞌan miyaꞌan “Paꞌit” peggeꞌ da bahagiꞌ meꞌ boheꞌin ngapaꞌit duk ekka aꞌa matey sakaliꞌ inumde boheꞌ miyaꞌan peggeꞌ ngapaꞌit manamal.
[12] Manjari tinihup weꞌ kaꞌampat malaꞌikatin kuweꞌ tabuliꞌ bakas pinangurung si iyehin. Pagtihupne, magtawus ngalindem da bahagiꞌ mata ellewin duk bulanin duk meꞌ poteꞌanin. Duwe bahagiꞌin gaꞌ. Hangkan dem da ellewin ampat ora lindem si dunya duk kellawanin isab ampat ora gaꞌi ngurung dantaꞌ bulanin duk meꞌ poteꞌanin.
[13] Sābuku mamayamin, niyaꞌ takiteku manaꞌul maglayangan langkew diyataꞌ mahawan. Takaleku suwalanen pales, paꞌinne, “Allo! Allo! Asal makatalew-talew teꞌed balaꞌ matekka si kēmon meꞌ aꞌa si dunyahin bang ne tihup tellu malaꞌikat dambulihin meꞌ kuweꞌ tabuliꞌ pinangurung si siyehin.”