[1] Missā pe iye namba si aku, paꞌinne, “Nulat kew si mangantanan si pagtipunan meꞌ aꞌa sukuꞌ si aku si lahat Sardisin duk inin sulatun: “Lapal inin amban aku, iye mangantanan Niyawa Tuhanin duk poteꞌan pituꞌin. Kataꞌuhanku du bang ine hininangbin. Kataꞌuhanku isab weꞌ ekka magpaꞌin weꞌ nuhut koꞌ teꞌed kaꞌam kinabayaꞌankun, saguwaꞌ gaꞌi du iyan toꞌo. Gaꞌi du kaꞌam nuhut teꞌed.
[2] Papateng kaꞌam. Papagenun bi sandelbi si akuhin pādpād niyaꞌ pe talebbi sandelbi duk du gaꞌi tahalaꞌ kēmon. Peggeꞌ paglilingku meꞌ hinanganbin, gaꞌi pe tewwaꞌ si matahan Tuhankun.
[3] Hangkan pikil-pikilun bi meꞌ toloꞌ mabennal bakas takalebi duk kinahagadbi tagnaꞌin. Tuhutun bi teꞌed meꞌ toloꞌ miyaꞌan duk pagsusunanun bi meꞌ dusebin duk lebbahanun bi ne. Bang gaꞌi kaꞌam papateng, bessuwang ku hadja iyan tekka piyu si kaꞌam kuweꞌ aꞌa panangkew. Gaꞌi iyan bisan kataꞌuhanbi bang waktu ine papiyukun.
[4] Saguwaꞌ niyaꞌ pe kaꞌam luꞌu si Sardis, gaꞌ legebi meꞌ semmekbin, hātinen gaꞌ kaꞌam bakas nuhut maghinangan laꞌat. Nuhut du kaꞌam iyan aku lumengngan magsemmek poteꞌ peggeꞌ pataꞌ kaꞌam nuhut aku.
[5] Sasuku manggaꞌi taboꞌo weꞌ sassatin pinasemmekan du siye poteꞌ kuweꞌ miyaꞌan duk gaꞌi du pasewanku ēnden amban dem libru panulatan ēn meꞌ aꞌa taga umul gaꞌ tamanannen. Duk pabawagku laꞌi si panaꞌanan Samakun duk meꞌ malaꞌikatnen weꞌ siye inin sukuꞌ si aku.
[6] “Kēmon kaꞌam taga tayingehin, subey pakalebi pinaꞌin Niyawa Tuhan si meꞌ pagtipunan meꞌ aꞌa sukuꞌ si akuhin.”
[7] Duk paꞌinne ne isab, “Nulat kew si mangantanan si pagtipunan meꞌ aꞌa sukuꞌ si aku si lahat Piladelpihin duk inin sulatun: “Lapal inin amban aku, iye masutsi duk mabennalin. Aku mangantan kunsiꞌ Sultan Daꞌudin. Bang lukaku, gaꞌ niyaꞌ makatambelne. Bang tambelku isab, gaꞌ niyaꞌ makalukane.
[8] Kataꞌuhanku du bang ine hinangbin. Kataꞌuhanku gaꞌi du kaꞌam basag. Saguwaꞌ matuyuꞌ du kaꞌam nuhut meꞌ toloꞌkun duk teteg du kaꞌam si aku. Niyaꞌ gawang lukaku si kaꞌam, gaꞌ niyaꞌ makatambelne.
[9] Pakale kaꞌam. Meꞌ aꞌa maluꞌu magmā-mā meꞌ Yahudi siye, meꞌ aꞌa sukuꞌ si Tuhanin, magdustaꞌ hadja siye. Iye matoꞌohin, sukuꞌ si nakuraꞌ seyitanin siye. Daꞌakku du siye iyan piyu pasujud si kaꞌam duk kataꞌuhande du iyan weꞌ kaꞌam kinalasahankun.
[10] Matuyuꞌ du kaꞌam nuhut pangandaꞌakankun weꞌ subey kaꞌam magsandal. Hangkan ipatte du kaꞌam isab supaya gaꞌ niyaꞌ baya-bayabi bang tekka kasigpitanin si tibuꞌukan dunya panuleyan kēmon meꞌ aꞌa si dunyahin.
[11] Mura du ku piyu balik si dunya. Tentemanun bi teꞌed kēmon pinasukuꞌ si kaꞌamin supaya gaꞌ niyaꞌ makaꞌagew pahalaꞌbin.
[12] Sasuku manggaꞌi taboꞌo weꞌ sassatin, pahadjeku iye si panaꞌanan Tuhankun. Pateteg iye laꞌi duk gaꞌi ne teꞌed iye tahalaꞌ salama-lama. Sulatku laꞌi si baranne ēn Tuhankun duk ēn puweblo Tuhanin, iye inēnan Awrusalam baꞌahuhin. Iye inin puweblo duwaꞌi du iyan amban surgaꞌ, amban Tuhankun. Sulatku isab laꞌi si baranne ēnku baꞌahuhin.
[13] “Kēmon kaꞌam taga tayingehin, subey pakalebi pinaꞌin Niyawa Tuhan si meꞌ pagtipunan meꞌ aꞌa sukuꞌ si akuhin.”
[14] Duk paꞌinne pe, “Nulat kew si mangantanan si pagtipunan meꞌ aꞌa sukuꞌ si aku si lahat Laodikeahin duk inin sulatun: “Lapal inin amban aku. Aku inin inēnan si Amin. Kapangandelan ku duk kēmon bissākun bennal. Aku poꞌon kēmon pinapanjari weꞌ Tuhanin.
[15] Kataꞌuhanku du meꞌ hinanganbin weꞌ si ellet nuhut kaꞌam duk gaꞌi. Dalilnen kuweꞌ kaꞌam boheꞌ gaꞌi panas, gaꞌi isab haggut. Kabayaꞌankun bang nuhut kaꞌam aku, nuhut ne teꞌed kaꞌam, bang gaꞌi, na, gaꞌi ne teꞌed.
[16] Saguwaꞌ peggeꞌ magduwe-duwe pikilanbin sabab aku, kuweꞌ dalil boheꞌ si ellet panas duk haggut, hangkan luwaꞌante du kaꞌam iyan amban dem beheku.
[17] Paꞌinbi weꞌ dayahan kaꞌam duk hāp kaꞌellumanbin. Paꞌinbi weꞌ gaꞌ ne niyaꞌ sukalbi. Saguwaꞌ iye matoꞌohin, kuweꞌ kaꞌam pessek, gaꞌi kataꞌuhanbi bang saꞌingge teꞌed kaꞌam. Kaꞌaseꞌ-aseꞌ kaꞌam peggeꞌ miskin kaꞌam, hātinen kulang sandelbin. Kuweꞌ isab kaꞌam meꞌ aꞌa gaꞌ niyaꞌ semmekne.
[18] Hangkan sessaꞌante kaꞌam, subey kaꞌam melli amban aku bulawan lunglun duk kaꞌam ngadayahan teꞌed. Subey isab kaꞌam melli amban aku semmek poteꞌ panemmekbi dibin duk katampengan baranbin duk kaꞌam gaꞌi iyaꞌ. Duk subey isab kaꞌam melli tambal amban aku panambalbi matabin duk ne kaꞌam ngite.
[19] Sasuku kinalasahankun biꞌatanku duk leggaku duk siye ngapetten. Hangkan matuyuꞌ kaꞌam si hinangan hāp, pagsusunanun bi ne meꞌ dusebin duk lebbahanun bi ne.
[20] Pakale kaꞌam, iyuꞌ ku kuweꞌ dalil aꞌa nengge si gawangbi nuttuk makiluka. Bang niyaꞌ aꞌa makakale suwalakun bu lukane gawangin, padiyalem ku duk magtuhut kami mangan.
[21] Sasuku manggaꞌi taboꞌo weꞌ sassatin urunganku siye kapatut ningkoloꞌ si bihingku diyataꞌ paningkoloꞌankun duk nuhut siye aku magbayaꞌ. Kuweꞌ du akuhin, tadaꞌag weꞌ ku nakuraꞌ seyitanin duk ningkoloꞌ ne ku si bihing Samaku Tuhanin si paningkoloꞌannen.
[22] “Kēmon kaꞌam taga tayingehin, subey pakalebi pinaꞌin Niyawa Tuhan si meꞌ pagtipunan meꞌ aꞌa sukuꞌ si akuhin.”