[1] Paꞌinne pe, “Nulat kew si mangantanan si pagtipunan meꞌ aꞌa sukuꞌ si aku si lahat Epesusin. Duk inin sulatun: “Lapal inin amban aku, iye taga poteꞌan pituꞌ si tanganne kanawanin duk malumengngan si tengngaꞌ meꞌ pituꞌ tengenan payitaꞌan bulawanin.
[2] Kataꞌuhanku du meꞌ hinangbin. Kataꞌuhanku weꞌ lubagan kaꞌam maghinang duk matuyuꞌ kaꞌam magsandal bisan ine-ine kasigpitanbin. Kataꞌuhanku isab weꞌ gaꞌi kaꞌam kasulutan si meꞌ hinangan meꞌ aꞌa malaꞌat iyan duk bakas ne tapaliksaꞌ weꞌ bi meꞌ aꞌa maluꞌu magmā-mā kawakilan siye duk kataꞌuhanbi ne weꞌ dustaꞌan siye.
[3] Asal matuyuꞌ kaꞌam magsandal kasigpitan sababku duk teteg teꞌed sandelbin si aku.
[4] Saguwaꞌ niyaꞌ panallaꞌanku kaꞌam: gaꞌi ne kaꞌam malasa si aku kuweꞌ tagnaꞌin.
[5] Hangkan hep esseb-essebun bi lasabi si aku tagnaꞌin duk pagsusunanun bi duk lebbahanun bi ne dusebin. Bu hinangun bi ne meꞌ hinangan mahāp hininangbi tagnaꞌin peggeꞌ bang gaꞌi lebbahanbi dusebin, piyu ku duk ānanku du tengenan payitaꞌanbin amban lugalnen.
[6] Saguwaꞌ kahāpan ku isab si kaꞌam peggeꞌ kabunsihan weꞌ bi hinangan meꞌ aꞌa manuhut Nikolaihin, saliꞌ du isab duk bunsiku si meꞌ hinanganden.
[7] “Kēmon kaꞌam taga tayingehin, subey pakalebi pinaꞌin Niyawa Tuhan si meꞌ pagtipunan meꞌ aꞌa sukuꞌ si akuhin.” Paꞌinne pe, “Sasuku manggaꞌi taboꞌo weꞌ sassatin urunganku iye kapatut mangan buwaꞌ kayu amban poꞌon kayu mangurung umul malaꞌi si palaꞌihan Tuhanin.”
[8] Manjari missā iye si aku balik, paꞌinne, “Nulat kew si mangantanan si pagtipunan meꞌ aꞌa sukuꞌ si aku si lahat Ismirnahin, duk inin sulatun: “Lapal inin amban aku. Aku tagnaꞌin duk aku isab tamanannen; aku bakas mamateyin bu ellum ku balik.
[9] Kataꞌuhanku du meꞌ kasusehanbin; kataꞌuhanku weꞌ miskin kaꞌam saguwaꞌ iye matoꞌohin dayahan du kaꞌam si surgaꞌ. Kataꞌuhanku isab weꞌ binissā-bissāhan laꞌat kaꞌam weꞌ meꞌ aꞌa magmā-mā Yahudi siye, meꞌ aꞌa sukuꞌ si Tuhanin, bu gaꞌi iyan toꞌo. Meꞌ tindeg seyitanin siye.
[10] Daꞌa kaꞌam tinalew ine-ine kabinasahan tekka si kaꞌam. Pakale kaꞌam! Sōng suleyan seyitanin du kaꞌam iyan; niyaꞌ kaꞌam iyan inisi dem kalabusu duk bininasa kaꞌam dem sampūꞌ bahangi. Saguwaꞌ pateteg kaꞌam si aku bisan kaꞌam pinapatey duk tumbasanku du kaꞌam umul gaꞌ tamananne.
[11] “Kēmon kaꞌam taga tayingehin, subey pakalebi pinaꞌin Niyawa Tuhan si meꞌ pagtipunan meꞌ aꞌa sukuꞌ si akuhin.” Paꞌinne pe, “Sasuku manggaꞌi taboꞌo weꞌ sassatin gaꞌi iye pinapeddiꞌan si narkaꞌ, iye pinaꞌin kamatey kaminduwenen.”
[12] Manjari missā ne isab iye si aku, paꞌinne, “Nulat kew si mangantanan si pagtipunan sukuꞌ si aku si lahat Pergamohin duk inin sulatun: “Lapal inin amban aku, iye taga bessi matalem matane kaduwembiyaꞌin.
[13] Kataꞌuhanku du bang antag patennaꞌanbin. Luꞌu kaꞌam si lahat mabantu pagsumbahan nakuraꞌ seyitanin. Saguwaꞌ teteg du kaꞌam nuhut aku duk gaꞌ du lebbahanbi sandelbi si akuhin bisan masa pamapatey pu Antipasin. Matuyuꞌ hep iye magmahalayak lapalkun hangkan iye pinapatey luꞌu si lahat seyitan iyan.
[14] Saguwaꞌ niyaꞌ panallaꞌanku kaꞌam: niyaꞌ kaꞌam luꞌu nuhut toloꞌ si Balaꞌamin. Masa awwalley tinoloꞌan hep weꞌ si Balaꞌam si Balak bang inumey duk taboꞌone magduse meꞌ aꞌa Israꞌilin. Taboꞌo siye weꞌ ne magduse sakaliꞌ ne siye mangan kinakan sinōngan si meꞌ tuhan-tuhanin duk magjina ne siye.
[15] Damikkiyan, niyaꞌ du isab luꞌu si kaꞌam nuhut toloꞌ si Nikolaihin.
[16] Hangkan hep, pagsusunanun bi ne meꞌ dusebin duk lebbahanun bi ne. Peggeꞌ bang gaꞌi, piyu ku si kaꞌam mura duk atuhanku siye. Iye pangatukun bessi mapaluwas amban dem behekun.
[17] “Kēmon kaꞌam taga tayingehin, subey pakalebi pinaꞌin Niyawa Tuhan si meꞌ pagtipunan meꞌ aꞌa sukuꞌ si akuhin.” Paꞌinne pe, “Sasuku manggaꞌi taboꞌo weꞌ sassatin urunganku iye kinakan amban dem surgaꞌ inēnan manna. Urunganku isab siye dangan-dangan batu poteꞌ duk laꞌi tasulat ēnde baꞌahuhin. Gaꞌ niyaꞌ ngataꞌuhan ēn miyaꞌan luwal hadja pangurungan iyehin.”
[18] Manjari paꞌinne pe si aku, “Nulat kew si mangantanan si pagtipunan meꞌ aꞌa sukuꞌ si aku si lahat Tatirahin duk inin sulatun: “Lapal inin amban aku, Anak Tuhanin. Matakun kuweꞌ bantuk kayat ebbut duk bettiskun ngillap kuweꞌ tumbaga bakas ilanuꞌan.
[19] Kataꞌuhanku du meꞌ hinangbin. Kataꞌuhanku weꞌ hadje lasabin duk basag isab sandelbin. Matuyuꞌ kaꞌam nabangan saweꞌbi duk matuyuꞌ kaꞌam magsandal kasigpitan. Kataꞌuhanku mas hāp hinanganbin kuweꞌitu amban tagnaꞌin.
[20] Saguwaꞌ niyaꞌ panallaꞌanku kaꞌam: niyaꞌ luꞌu dende si kaꞌam inēnan Jesebel magmā-mā weꞌ iye dambuwaꞌ nabi magpalataꞌ lapal Tuhanin. Pasagadanbi hadja iye magtoloꞌ si meꞌ daraꞌakankun bu sabab pagtoloꞌnen tapadupang ne siye hangkan taboꞌo ne siye magjina duk mangan meꞌ kinakan bakas sinōngan si meꞌ tuhan-tuhan.
[21] Bakas ne iye sessaꞌanku dinaꞌak magsusun ne duk ilebbahan ne dusene magjinahin, saguwaꞌ gaꞌi iye ngatu.
[22] Pakale kaꞌam, patekkahanku du iye saki boꞌone pabāk. Kēmon isab saweꞌne bakas magjinahin pahunitanku teꞌed. Bang gaꞌi pagsusunande duk lebbahande hinangande duk dende iyan, asal patekkaku inin si siye mura.
[23] Duk papateyku kēmon manuhut toloꞌ dende iyan supaya kataꞌuhan meꞌ masandel si aku si meꞌ pagtipunanin kēmon, weꞌ aku mangataꞌuhan bang ine diyalem atey duk diyalem pikilan manusiyaꞌin. Duk tumbasanku meꞌ hinangbin dangan-dangan mapataꞌ si kaꞌamin.
[24] “Saguwaꞌ niyaꞌ kaꞌam luꞌu si Tatira, gaꞌ du tuhutbi toloꞌ malaꞌat inin. Gaꞌ taꞌayabi iye inēnande toloꞌ malalem amban seyitanin. Na, gaꞌ niyaꞌ seddili panessaꞌku si kaꞌam amban inin:
[25] kimmatanun bi teꞌed ine-ine bakas pinasukuꞌ si kaꞌamin samantaꞌan gaꞌi pe ku tabalik piyu.
[26] Sasuku manggaꞌi taboꞌo weꞌ sassatin duk matuyuꞌ nuhut meꞌ pangandaꞌakankun sampay si kamateyde, urunganku siye kapatut saliꞌ kuweꞌ pinangurung Samaku akuhin. Urunganku siye kapatut magbayaꞌ si meꞌ kabangsa-bangsahanin. Basag pagbayaꞌden kuweꞌ dalil basiꞌ gaꞌi polong, duk bantaden kuweꞌ paliyuk pessaꞌ. Pangurungku isab si siye māgahin.
[29] “Kēmon kaꞌam taga tayingehin, subey pakalebi pinaꞌin Niyawa Tuhan si meꞌ pagtipunan meꞌ aꞌa sukuꞌ si akuhin.”