[1] Manjari inin, niyaꞌ takaleku suwala amban dem langgalin missā papales si pituꞌ malaꞌikatin. Paꞌinne, “Pī kaꞌam, buꞌusanun bi pī si dunya isi pinggan pituꞌ pennoꞌ weꞌ mulkaꞌ Tuhan iyan.”
[2] Manjari hap pī ne dambuwaꞌ malaꞌikatin muꞌusan balaꞌ dem pinggannen pī si dunya. Sakaliꞌ buꞌusanne, magtawus tomoꞌan dugsal meꞌ aꞌa taga malka sattuwahin duk bakas manumba limbagannen. Laꞌat teꞌed dugsalden duk peddiꞌ manamal.
[3] Manjari binuꞌusan isab weꞌ malaꞌikat mapasunuꞌin balaꞌ dem pinggannen pī dem tahik. Magtawus tahikin manjari kuweꞌ lahaꞌ aꞌa matey duk kēmon maꞌellum dem tahikin matey.
[4] Manjari binuꞌusan isab weꞌ katellu malaꞌikatin balaꞌ dem pinggannen si meꞌ boheꞌ duk si meꞌ tuburan boheꞌ. Magtawus boheꞌin manjari lahaꞌ.
[5] Takaleku malaꞌikat magbayaꞌ si meꞌ boheꞌin missā, paꞌinne, “O, Tuhan, kaꞌu masutsihin. Gaꞌi kew pinda kemuwe amban awwal tagnaꞌ sampay maꞌin. Bentel hadja hukumannun.
[6] Peggeꞌ pinapatey weꞌ meꞌ aꞌa si dunyahin meꞌ aꞌanun duk meꞌ aꞌa mamoꞌo lapalnun duk buꞌus weꞌ de lahaꞌden, hangkan kuweꞌitu inurungan siye weꞌ nu lahaꞌ inumde. Iye miyaꞌan matalep panumbas siyehin.”
[7] Manjari niyaꞌ ne isab takaleku suwala amban lugal pagkulubananin. Paꞌin suwalahin, “O, Tuhan, kaꞌu Tuhan Mabalakatanin. Hukumannun asal bentel duk bennal.”
[8] Manjari inin, binuꞌusan weꞌ kaꞌampat malaꞌikatin balaꞌ dem pinggannen pī diyataꞌ mata ellew. Magtawus ngapanas manamal ellewin hangkan eggas meꞌ manusiyaꞌin.
[9] Eggas meꞌ manusiyaꞌin peggeꞌ panas manamal ellewin. Hangkan binissā-bissāhan weꞌ de Tuhanin peggeꞌ iye mamaboꞌo meꞌ balaꞌ miyaꞌan. Saguwaꞌ gaꞌ du pagsusunande duk lebbahande meꞌ duseden duk gaꞌ isab pudjide Tuhanin.
[10] Manjari inin, binuꞌusan ne weꞌ kalime malaꞌikatin balaꞌ dem pinggannen pī si paningkoloꞌan sattuwa bakas mapaguwaꞌ amban dem tahikin. Magtawus ngalindem teꞌed dem pagbayaꞌannen. Kinekkeb weꞌ meꞌ aꞌahin meꞌ dellaꞌden hawal peddiꞌ talessaden.
[11] Duk binissā-bissāhan weꞌ de Tuhan si surgaꞌin sabab peddiꞌden duk meꞌ dugsalden. Saguwaꞌ gaꞌ du pagsusunande duk lebbahande meꞌ hinangande malaꞌatin.
[12] Manjari inin, binuꞌusan ne weꞌ kaꞌennem malaꞌikatin balaꞌ dem pinggannen pī si boheꞌ hadje inēnan Alpurati. Magtawus teggang boheꞌ miyaꞌan, tahinang lān pinanyap para si meꞌ sultan amban meꞌ kalahatan si tampal silanganin.
[13] Manjari niyaꞌ takiteku tellu umagad kuweꞌ bantuk meꞌ bekbak paguwaꞌ amban dem behe nagahin duk amban behe sattuwahin duk amban behe nabi manggaꞌi mabennalin.
[14] Umagad miyaꞌan seyitan du; maghinang siye meꞌ hinangan makaꞌulaliꞌ. Pī siye inin si meꞌ kasultanan si tibuꞌukan dunyahin, ngandaꞌak siye magtipun supaya siye magbonoꞌ si ellew bakas ginantaꞌ weꞌ Tuhan Mabalakatanin, iye ellew makatalew-talewin.
[15] Manjari missā Isa Almasi, paꞌinne, “Pakale kaꞌam. Bessuwang ku hadja iyan tekka kuweꞌ aꞌa panangkew paꞌasek dem lumaꞌbi waktu gaꞌi ase-asebi. Asal kēgan teꞌed meꞌ aꞌahin bang tekka ku ngape pe siye ngagadan aku duk andang ne siye magsemmek. Gaꞌi du siye magkuwantang duk gaꞌ du niyaꞌ kaꞌiyaꞌande bisan siye pī paluwas si kaꞌekkahan aꞌa.”
[16] Manjari binoꞌo weꞌ tellu seyitanin meꞌ kasultananin pinagtipun laꞌi si lahat inēnan Amageddon bang si bissāhan Hibrani.
[17] Manjari inin, binuꞌusan weꞌ kapituꞌ malaꞌikatin balaꞌ dem pinggannen pī si mahawan. Magtawus niyaꞌ suwala pales paguwaꞌ amban kursi dem langgalin. Paꞌin suwalahin, “Ubus ne.”
[18] Magtawus maglalat duk magletteꞌ duk maglugung duk linug teꞌed manamal. Gaꞌ bakas linug kuweꞌ miyaꞌan kemuwe tagnaꞌ manusiyaꞌin pinapanjari. Asal iye miyaꞌan linug tamanan mabasag teꞌedin.
[19] Na, magtawus kepak puweblo mabantuhin patellu bahagiꞌ duk kēmon puweblo si meꞌ kalahat-lahatanin magkaꞌat. Manjari taꞌesseb weꞌ Tuhanin meꞌ duse dem puweblo mabantu inēnan Babilonin. Dalil pinaꞌinum weꞌ Tuhanin meꞌ aꞌa malaꞌihin boheꞌ ubas dem sawannen, hātinen pinalessa weꞌ ne si siye mulkaꞌnen.
[20] Manjari lanyap kēmon kapūꞌ-pūꞌanin duk lanyap isab sampay kēmon kapunu-punuhanin.
[21] Kalaboꞌ-laboꞌan isab meꞌ ayisin kuweꞌ batu hadje amban diyataꞌ langit pī si meꞌ manusiyaꞌin. Bohatan dambuwaꞌ ayisin niyaꞌ limempūꞌ kilu. Hangkan meꞌ aꞌahin binissā-bissāhan weꞌ de Tuhanin peggeꞌ lumanduꞌ paminasa si siyehin sabab balaꞌ pinatekka Tuhan si siye miyaꞌan.