[1] Puwas miyaꞌan, ngite ku ampat malaꞌikat nengge si ampat pidjū alamin nagang baliyuhin supaya gaꞌi nihup pī si dunya duk si tahik atawa bisan si dam poꞌon kayu.
[2] Duk niyaꞌ takiteku malaꞌikat seddili paguwaꞌ amban silangan moꞌo-moꞌo pagmalkahan Tuhanin, iye maꞌellum gaꞌ tamanannen. Ngalingan iye papales pī si ampat malaꞌikat bakas kaꞌurungan kapatut weꞌ Tuhanin makaꞌatan dunya duk tahikin.
[3] Paꞌin malaꞌikatin si siye, “Daꞌa dahuꞌ pakaꞌatanun bi dunyahin duk tahikin duk meꞌ kakayu-kayuhanin samantaꞌan gaꞌ pe kamalkahan meꞌ daraꞌakan Tuhanten bi diyataꞌ lendoꞌde.”
[4] Manjari inakahan ku bang piyangan minalkahan si lendoꞌden. Ekkahanden koꞌ da hatus duk ampatpuk-ampat ngibu amban kēmon kabangsahan tubuꞌ si Israꞌilin.
[5] Amban tubuꞌ si Yuda sampuk-duwe ngibu kamalkahanin. Amban tubuꞌ si Ruben sampuk-duwe ngibu kamalkahanin. Amban tubuꞌ si Gad sampuk-duwe ngibu kamalkahanin.
[6] Amban tubuꞌ si Aser sampuk-duwe ngibu kamalkahanin. Amban tubuꞌ si Naptali sampuk-duwe ngibu kamalkahanin. Amban tubuꞌ si Manasse sampuk-duwe ngibu kamalkahanin.
[7] Amban tubuꞌ si Simiyun sampuk-duwe ngibu kamalkahanin. Amban tubuꞌ si Libi sampuk-duwe ngibu kamalkahanin. Amban tubuꞌ si Issakal sampuk-duwe ngibu kamalkahanin.
[8] Amban tubuꞌ si Sebulun sampuk-duwe ngibu kamalkahanin. Amban tubuꞌ si Yusup sampuk-duwe ngibu kamalkahanin. Amban tubuꞌ si Benjamin sampuk-duwe ngibu kamalkahanin.
[9] Puwas miyaꞌan, ngite ku panenan aꞌa, banes manamal, gaꞌi taꞌitung. Meꞌ aꞌa miyaꞌan amban kēmon pagsultanan si dunya, amban kēmon kabangsa-bangsahan, amban kēmon kalahat-lahatan, duk amban kēmon bayuꞌ-bayuꞌan bissāhan. Laꞌi siye nengge paharap si kursihin duk si inēnan Bili-bilihin. Magjuba poteꞌ siye duk magboꞌo siye dangan-dangan kuweꞌ bantuk tuggu dawen lahing.
[10] Missā siye pinapales, paꞌinde, “Pudjite bi Tuhanten bi, iye maningkoloꞌ si kursihin duk pudjite bi isab inēnan Bili-bilihin peggeꞌ siye manimbul kitehin bi amban hukuman duseten bi.”
[11] Kēmon malaꞌikatin magtengge ngaliput kursihin duk ngaliput meꞌ bahiꞌin duk ampat malaꞌikat sakabayuꞌin. Manjari pasujud siye paharap tudju kursihin duk pinudji weꞌ de Tuhanin.
[12] Paꞌinde, “Amin. Pudjite bi Tuhanten bi. Pahadjete bi iye. Addatante bi iye, peggeꞌ lalem teꞌed kataꞌunen, hadje teꞌed kapatutnen duk balakatnen. Magsukul kite bi si iye sampay salama-lama. Amin.”
[13] Manjari dangan meꞌ bahiꞌin nilew aku, paꞌinne, “Kataꞌuhannu ke bang sine meꞌ aꞌa magjuba poteꞌ iyan duk bang amban siye?”
[14] “Gaꞌi kataꞌuhanku, Tuwan. Kaꞌu iye mangataꞌuhan iyehin,” iye miyaꞌan sambungkun. Paꞌinne si aku, “Siye miyaꞌan meꞌ aꞌa bakas makalabey kabinasahan mahadjehin. Bakas dekdakande ne semmekden dem lahaꞌ Bili-bilihin duk poteꞌ ne, hātinen kaꞌānan ne duseden.
[15] Iye iyan jānnen hangkan siye luꞌu nengge si harapan kursi Tuhanin. Maghinang siye si Tuhan ellew-sangem si panaꞌananne. Inipat du siye weꞌ maningkoloꞌ si kursihin peggeꞌ laꞌi iye si siye.
[16] Gaꞌi ne teꞌed siye inusan atawa lekkakan. Gaꞌi ne siye panasan weꞌ ellew atawa ine-ine panas.
[17] Peggeꞌ inēnan Bili-bilihin, iye malaꞌi si kursi Tuhanin, ipatne du siye duk boꞌone siye pī si meꞌ buwal boheꞌ gaꞌi teggang. Duk punasan Tuhanin du kēmon boheꞌ mataden.”