[1] Manjari inin, niyaꞌ ne isab takiteku tandaꞌ seddili diyataꞌ langit asal makaꞌulaliꞌ duk makatalew teꞌed. Niyaꞌ pituꞌ malaꞌikat magboꞌo pituꞌ bayuꞌan balaꞌ. Meꞌ balaꞌ miyaꞌan, iye ne tamanan meꞌ balaꞌin peggeꞌ ubus miyaꞌan puwas ne astel Tuhanin.
[2] Manjari niyaꞌ takiteku kuweꞌ bantuk tahik tinglak kuweꞌ sāmin duk kuweꞌ sagetan ebbut isab. Takiteku isab meꞌ aꞌa manggaꞌ tadaꞌag weꞌ sattuwahin. Gaꞌ siye numba sattuwahin duk limbagannen, duk gaꞌ siye kamalkahan lumero tandaꞌ ēn sattuwahin. Laꞌi siye nengge-nengge si higad kuweꞌ tahikin duk kēmon siye niyaꞌ alpa antanande bakas pangurung Tuhanin si siye.
[3] Magkalangan siye kalangan si Musa ley, iye daraꞌakan Tuhanin, duk kalangan Bili-bilihin. Iye inin kalanganden, “O Tuhan, kaꞌu Tuhan Mabalakatanin. Balakatan meꞌ hinangannun duk makaꞌulaliꞌ teꞌed. Kaꞌu Sultan meꞌ kabangsa-bangsahanin. Bentel kēmon hinangannun duk bennal.
[4] Sine manggaꞌi matalew si kaꞌuhin, Tuhan? Sine manggaꞌi mamahadje kaꞌuhin? Kaꞌu hadja dambuwaꞌ-buwaꞌ masutsihin. Kēmon kabangsahanin magtipun du iyan mudji kaꞌu peggeꞌ meꞌ hinangannu mabentelin mattan si meꞌ aꞌahin kēmon.”
[5] Ubus miyaꞌan, takiteku langgal si surgaꞌin luka duk takiteku laꞌi inēnan Bilik Tamanan Masutsihin.
[6] Manjari paguwaꞌ pituꞌ malaꞌikat magboꞌo pituꞌ bayuꞌan balaꞌin amban langgal. Semmekden gaꞌ niyaꞌ lege-legene, makasilew poteꞌnen, duk pinekkes dākanden duk bulawan.
[7] Manjari inurungan meꞌ malaꞌikat pituꞌ miyaꞌan dangan-dangan pinggan bulawan weꞌ dangan meꞌ malaꞌikat sakabayuꞌin. Meꞌ pinggan miyaꞌan pennoꞌ weꞌ mulkaꞌ Tuhanin, iye Tuhan maꞌellum gaꞌ tamanannen.
[8] Manjari, langgal miyaꞌan pennoꞌ weꞌ umbu, tandaꞌ sahaya duk balakat Tuhanin. Gaꞌ niyaꞌ kapadiyalem pī dem langgal tiggelan gaꞌi pe puwas pituꞌ balaꞌ binoꞌo weꞌ pituꞌ malaꞌikatin.