[1] Manjari takiteku weꞌ maningkoloꞌ si kursi miyaꞌan niyaꞌ antananne katas ilikid si tanganne kanawanin. Katas ilikid miyaꞌan tasulatan diyalem-bukut duk ilekket sīngnen mimpituꞌ supaya gaꞌi taluka.
[2] Duk niyaꞌ takiteku malaꞌikat basag manamal missā papales, paꞌinne, “Niyaꞌ ke tuꞌu pataꞌ ngānan meꞌ lekket katas ilikid inin bu ngalukane?”
[3] Saguwaꞌ gaꞌ niyaꞌ takasuwaꞌ diyataꞌ langit atawa si dunya atawa si ahilat taga kapatut ngaluka katas ilikid miyaꞌan bu matsa bang ine bakas sinulat diyalemnen.
[4] Magtangis ku teꞌed peggeꞌ gaꞌ niyaꞌ takasuwaꞌ bisan dangan pataꞌ ngaluka katas ilikid miyaꞌan duk matsane.
[5] Manjari dangan meꞌ bahiꞌin missā si aku, paꞌinne, “Daꞌa kew magtangis. Payamanun. Tadaꞌag ne nakuraꞌ seyitanin weꞌ Isa Almasi, iye inēnan Limaꞌung amban bangsa Yudahin; tubuꞌ Sultan Daꞌud iye duk bangsahan iye. Hangkan pataꞌ iye ngānan pituꞌ lekketin duk ngaluka katas ilikidin.”
[6] Manjari niyaꞌ takiteku kuweꞌ Bili-bili nengge laꞌi si antag kursihin, si tengngaꞌ meꞌ ampat malaꞌikat sakabayuꞌin duk meꞌ duwempuk-ampat bahiꞌin. Niyaꞌ takiteku si baran Bili-bilihin tandaꞌ weꞌ bakas pinapatey iye. Niyaꞌ pituꞌ tandukne duk pituꞌ isab matanen. Meꞌ pituꞌ matane miyaꞌan tandaꞌ Niyawa Tuhan pinapitune si tibuꞌukan dunyahin.
[7] Manjari pasōng Bili-bili miyaꞌan pī si maningkoloꞌ si kursihin bu ineddoꞌ weꞌ ne katas ilikidin amban tanganne kanawanin.
[8] Sakaliꞌ miyaꞌan eddoꞌne, magtawus pasujud si iye ampat malaꞌikat sakabayuꞌin duk duwempuk-ampat meꞌ bahiꞌin, bahasa mudji iye. Dangan-dangan meꞌ bahiꞌin niyaꞌ antanande alpa duk tugtugan bulawan pennoꞌ weꞌ kamanyan. Peggeꞌ bengngi kamanyan miyaꞌan tandaꞌ meꞌ pangampun meꞌ aꞌa sukuꞌ si Tuhanin.
[9] Duk magkalang siye kalangan baꞌahu, paꞌinde, “Kaꞌu hadja dendangan taga kapatut ngeddoꞌ katas ilikid iyan duk ngānan lekketnen. Taga kapatut kew peggeꞌ bakas kew pinapatey, duk lahaꞌnu mabuꞌusin iye mangalekkat meꞌ aꞌahin supaya siye manjari meꞌ aꞌa sukuꞌ si Tuhanin. Meꞌ aꞌa inin amban kēmon kabangsa-bangsahan, amban kēmon bissāhan, amban kēmon kalahat-lahatan duk amban kēmon pagsultanan.
[10] Hininang siye weꞌ nu bangsa sultan duk meꞌ imam supaya siye maghinang si Tuhan. Duk magbayaꞌ siye si dunya si pasōngan.”
[11] Manjari mayam ku balik duk makakale ku suwala meꞌ malaꞌikat ibu-ibuhan. Nengge siye ngaliput kursihin duk ampat malaꞌikat sakabayuꞌin duk duwempuk-ampat meꞌ bahiꞌin.
[12] Magkalang siye pinapales, paꞌinde, “Bili-bili bakas pinapateyin pataꞌ pinudji. Hadje teꞌed kapatutnen. Lalem teꞌed kataꞌunen. Basagan iye manamal duk dayahan teꞌed iye. Addatante bi iye. Pahadjete bi iye. Pudjite bi iye.”
[13] Manjari takaleku isab magkalang kēmon bakas pinapanjari weꞌ Tuhan diyataꞌ langitin duk si bulakin duk si ahilatin duk dem tahikin. Aweꞌ, kēmon-kēmonin bakas pinapanjari dem alamin magkalang siye, paꞌinde, “Pudjite bi maningkoloꞌ si kursihin. Pudjite bi Bili-bilihin. Pagaddatante bi duk pahadjete bi iye salama-lama, peggeꞌ iye mabalakatanin.”
[14] Ampat malaꞌikat sakabayuꞌin nambag, paꞌinde, “Amin.” Ubus duwempuk-ampat meꞌ bahiꞌin pasujud duk mudji.