[1] Manjari inurungan ku kayu-kayu panukudan duk paꞌinne, “Pī kew, sukudun langgal Tuhanin duk pagkulubananin. Duk itungun bang piye meꞌ aꞌa magsambahayang malaꞌihin.
[2] Saguwaꞌ daꞌa ne sakupun sinukud lame langgalin. Daꞌa sukudun peggeꞌ antag miyaꞌan pamasukuꞌ ne si meꞌ aꞌa manggaꞌi sukuꞌ si Tuhanin. Paglabbaꞌande du dem ampatpuk-duwe bulan puweblo masutsihin, iye puweblo sukuꞌ si Tuhanin.
[3] Daꞌakku du pī duwe saksiꞌkun. Magsemmek siye karut, duk magpalataꞌ siye lapal Tuhanin dem da ngibu duk duwe hatus duk ennempūꞌ ellew miyaꞌan.”
[4] Duwe saksiꞌ miyaꞌan, inēnan siye duwem poꞌon kayu jaitun duk duwe payitaꞌan binettad si harapan Tuhanin, iye magbayaꞌ si dunyahin.
[5] Bang niyaꞌ magdahulakaꞌ si siye, niyaꞌ ebbut paguwaꞌ amban dem behede magmula sasuku manguntarahan siyehin. Hangkan sine-sine maghinang laꞌat si siye bugtuꞌ matey hadja.
[6] Taga kapatut siye nambelan langitin supaya gaꞌi ulan tiggelande magpalataꞌ lapal Tuhanin. Taga kapatut isab siye pinamanjari lahaꞌ meꞌ tuburan boheꞌin duk taga kapatut siye maboꞌo bayuꞌ-bayuꞌan balaꞌ pitu si dunya sumiyan-sumiyan kabayaꞌande.
[7] Manjari, bang ne siye ubus magpalataꞌ lapal Tuhanin, niyaꞌ iyan sattuwa makatalew-talew paguwaꞌ amban dem lowang manggaꞌi tatekkadin duk magbonoꞌ siye. Tadaꞌag iyan weꞌ ne duwanganin duk tapapateyne.
[8] Bangkeyden pinasagadan hadja laꞌi si kalsara si puweblo mabantuhin, iye puweblo bakas pamapateyan Panuhutanden ilansang diyataꞌ olom. Pangēn puweblo miyaꞌan Sodom duk Misil saguwaꞌ dumaꞌin inin ēnne teꞌedin, ēn dalilan hadja.
[9] Ekka aꞌa amban kēmon kalahat-lahatan duk kabangsa-bangsahan duk bayuꞌ-bayuꞌan bissāhan duk pagsultanan hap pī laꞌi mayaman bangkeyden dem tellu ellew duk tengaꞌ duk gaꞌi daꞌakde kinubul.
[10] Kēgan meꞌ aꞌa si tibuꞌukan dunyahin; maglami-lami siye duk magurung-inurung lasa-lasahan siye peggeꞌ matey ne duwangan nabi miyaꞌan. Peggeꞌ siye miyaꞌan bakas moꞌo kabinasahan si meꞌ aꞌa si dunyahin.
[11] Saguwaꞌ paglabey tellu ellew duk tengaꞌ, pinakellum siye balik weꞌ Tuhanin duk nengge siye. Kēmon makakite siyehin kadahitan manamal.
[12] Manjari makakale duwangan nabi miyaꞌan suwala pales amban surgaꞌ magpaꞌin si siye, “Dayiꞌ kaꞌam pitu padiyataꞌ.” Na, magtawus siye taboꞌo weꞌ inalak pī si surgaꞌ sābu laꞌi mayam-mayam meꞌ bantaden.
[13] Sābu miyaꞌan isab, bessuwang linug basag manamal. Da bahagiꞌ puweblohin magkaꞌat, siyam bahagiꞌin gaꞌ du. Niyaꞌ pituꞌ ngibu meꞌ aꞌa mamateyin, sabab linug miyaꞌan. Meꞌ aꞌa matalebbihin, meꞌ manggaꞌ mamateyin, kadahitan manamal, hangkan pinudji weꞌ de Tuhan malaꞌi si surgaꞌin.
[14] Puwas ne kaduwe balaꞌ makatalewin saguwaꞌ katellunen sōng tekka ne.
[15] Manjari tinihup ne weꞌ kapituꞌ malaꞌikatin kuweꞌ tabuliꞌ inantanannen. Pagtihupne, magtawus ku makakale meꞌ suwala pales amban surgaꞌ. Magdūs siye, paꞌinde, “Gaꞌ niyaꞌ seddili magbayaꞌ si dunyahin kuweꞌitu. Luwal Panuhutanten bi, Tuhanin duk tapeneꞌnen, Almasi. Duk magbayaꞌ iye salama-lama.”
[16] Manjari duwempuk-ampat meꞌ bahiꞌin, siye maningkoloꞌ si kurside si panaꞌanan Tuhanin, pasujud siye mudji Tuhanin
[17] duk paꞌinde, “O, Tuhan, Panuhutan kamihin. Balakatan kew teꞌed. Gaꞌi kew pinda kemuwe awwal tagnaꞌ sampay kuweꞌitu. Magsukul teꞌed kami si kaꞌu peggeꞌ tapakitehannu ne balakatnu mahadjehin duk tinagnaꞌan ne weꞌ nu pagbayaꞌnu si dunyahin.
[18] Meꞌ aꞌa manggaꞌi makahagad si kaꞌuhin astel manamal, peggeꞌ taꞌabut ne waktu pagmulkaꞌnu si siyehin, duk waktu pangahukumnu meꞌ pateyin. Taꞌabut ne waktu panumbasnu meꞌ daraꞌakannun, meꞌ kanabihanin, duk kēmon meꞌ aꞌa sukuꞌ si kaꞌuhin, kēmon magaddatan kaꞌuhin, hadje-dikiꞌ saliꞌ-saliꞌ. Inin ne waktu pamakaꞌat sasuku mamakaꞌatan dem dunyahin.”
[19] Manjari luka langgal Tuhan si surgaꞌin duk takite laꞌi diyalem baꞌul pangisihan sulat pagjanjiꞌan Tuhan duk meꞌ aꞌanen. Pagluka langgalin, magtawus maglalat duk niyaꞌ letteꞌ duk maglugung. Linug isab duk ekka ayis laboꞌ kuweꞌ hadje batu amban diyataꞌ langit.