[1] Manjari inin, niyaꞌ takiteku tandaꞌ makaꞌulaliꞌ teꞌed paguwaꞌ diyataꞌ langit. Ngite ku dende magsemmek kuweꞌ sahaya ellewin. Panenggehannen diyataꞌ bulan duk niyaꞌ sampuk-duwe poteꞌan kuweꞌ korona diyataꞌ kōkne.
[2] Dende miyaꞌan sōng nganak duk peddiꞌan iye hangkan magkilahap.
[3] Manjari niyaꞌ ne isab tandaꞌ makaꞌulaliꞌ teꞌed paguwaꞌ diyataꞌ langit. Ngite ku naga peyat hadje manamal. Pituꞌ kōknen duk sampūꞌ tanduknen. Kōknen kapituꞌ taga korona.
[4] Ilatip weꞌ nagahin duk engkone da bahagiꞌ meꞌ poteꞌan diyataꞌ langitin, duk ilakasan weꞌ ne pī si dunya. Duwe bahagiꞌin gaꞌ lapey. Manjari nengge iye paharap si dende sōng manganakin supaya pagluwas nakanakin magtawus takakanne.
[5] Manjari nganak dendehin lella saguwaꞌ gaꞌ du takakan weꞌ nagahin peggeꞌ magtawus taꞌagew duk taboꞌo pī si Tuhan laꞌi si kursi Tuhanin. Iye pangaral nakanak lella miyaꞌan, magbayaꞌ iye si kēmon kabangsahanin si pasōngan duk basag pagbayaꞌnen kuweꞌ basiꞌ gaꞌi polong.
[6] Na, dendehin pagubus iye nganak lahi pī si lahat makagindew-gindew bakas pinanyap weꞌ Tuhanin para si iye. Laꞌi iye pinatennaꞌ duk inipat dem da ngibu duk duwe hatus duk ennempūꞌ ellew.
[7] Manjari inin, magbonoꞌ ne laꞌi si surgaꞌ. Disi Mikaꞌil duk meꞌ tindegne malaꞌikatin magbonoꞌ duk nagahin duk ngatu teꞌed nagahin duk meꞌ tindegnen.
[8] Saguwaꞌ tadaꞌag nagahin duk meꞌ tindegnen. Duk gaꞌi ne siye makajari patennaꞌ laꞌi si surgaꞌ.
[9] Naga mahadje miyaꞌan ilakasan ne amban surgaꞌ. Iye ne hep inēnan sawe awwalley. Niyaꞌ pe pangēn iye seddili, hibilis atawa nakuraꞌ seyitanin. Iye mangakkalan meꞌ manusiyaꞌin kēmon. Ilakasan iye pī si dunya magtuhut duk meꞌ tindegnen kēmon.
[10] Manjari niyaꞌ takaleku suwala pales laꞌi si surgaꞌ magpaꞌin, “Taꞌabut ne waktu panimbul Tuhan meꞌ manusiyaꞌin. Pinakitehan ne weꞌ Tuhanin basagnen magbayaꞌ. Pinakitehan isab weꞌ Almasi kapatutnen magbayaꞌ. Peggeꞌ ubus ne ilakasan amban surgaꞌ nakuraꞌ seyitanin, iye luwal manuksaꞌ meꞌ kapungtinaꞌihanten bi. Ellew-sangem gaꞌi iye pahali nuksaꞌ siye si panaꞌanan Tuhanin.
[11] Saguwaꞌ tadaꞌag du iye weꞌ meꞌ kapungtinaꞌihanten bi. Gaꞌi ne siye katamaꞌan tinuksaꞌ sabab lahaꞌ si Isa, iye inēnan Bili-bilihin, lahaꞌne bakas mabuꞌusin pamuwas duseden. Tadaꞌag isab seyitanin sabab toloꞌ mabennal bakas pinalataꞌden. Duk paglillaꞌde umulden bisan siye pinapatey.
[12] Hangkan magkēg kaꞌam sasuku maglahat tuꞌu si surgaꞌin. Saguwaꞌ makaꞌaseꞌ-aseꞌ teꞌed kaꞌam meꞌ maluꞌu si dunyahin duk si tahikin peggeꞌ iyuꞌ ne duwaꞌi piyu si kaꞌam nakuraꞌ meꞌ seyitanin. Astel teꞌed iye manamal peggeꞌ kataꞌuhanne weꞌ sōng taꞌabut ne gantaꞌannen.”
[13] Na manjari, sakaliꞌ kataꞌuhan nagahin weꞌ īꞌ iye ilakasan si dunya, palupug iye pī si dende bakas manganak lella miyaꞌan.
[14] Saguwaꞌ inurungan dendehin weꞌ Tuhanin duwe peppik manaꞌul hadje supaya iye lumayang pī si lugal pinanyap para si iyehin laꞌi si lahat makagindew-gindew. Duk inipat iye laꞌi tellun tahun duk tengaꞌ duk iye gaꞌi taꞌabut weꞌ sawehin, hātinen nagahin.
[15] Manjari sinepput weꞌ nagahin dendehin duk boheꞌ ekka teꞌed amban dem behene supaya taboꞌo dendehin weꞌ boheꞌin.
[16] Saguwaꞌ tinabangan dendehin weꞌ bulakin. Muwekkaꞌ paluka bulakin bu pabuꞌus pī diyalem bulak boheꞌ amban dem behe nagahin.
[17] Astel manamal nagahin si dendehin. Hangkan binoꞌo weꞌ ne magbonoꞌ meꞌ anak-ampu dendehin. Siye ne meꞌ manuhut pangandaꞌakan Tuhanin duk matuyuꞌ teꞌed nuhut toloꞌ mabennal panoloꞌ si Isahin.
[18] Laꞌi nagahin nengge si higad tahik.