[1] Manjari ngite ne ku isab dambuwaꞌ malaꞌikat basag duwaꞌi amban surgaꞌ putus weꞌ inalak duk niyaꞌ birarali paliput si kōkne. Luwenen sinag kuweꞌ ellew duk meꞌ paꞌanen kuweꞌ bantuk olom kayat.
[2] Niyaꞌ antananne likidan katas dikiꞌ bakas iluka ne. Padiꞌikne bettisne kanawanin diyataꞌ tahik duk bettisne bibangin diyataꞌ bulak.
[3] Manjari ngalingan iye pinapales duk suwalanen kuweꞌ helling limaꞌung pales. Pagubus iye ngalingan, sinambag iye weꞌ lugung pituꞌin pinapales.
[4] Pagubus maglugung, sōng sulatku ne pinaꞌin lugungin. Saguwaꞌ niyaꞌ suwala takaleku amban surgaꞌ. Paꞌin suwalahin si aku, “Ennaꞌun hadja dem ateynu bakas pinaꞌin meꞌ lugungin. Daꞌa sulatun.”
[5] Manjari malaꞌikat takiteku mangandiꞌik diyataꞌ tahik duk diyataꞌ bulakin, pinatengge weꞌ ne tanganne kanawanin tudju langit, bahasa panapane.
[6] Duk napa iye si Tuhan maꞌellum salama-lamahin, iye mamapanjari langitin duk bulakin duk tahikin duk kēmon bayuꞌ-bayuꞌan diyalemden. Napa malaꞌikatin, paꞌinne, “Iyuꞌ Tuhanin pakale-kale, asal gaꞌi ne teꞌed katangguhan.
[7] Saguwaꞌ bang tihup kapituꞌ malaꞌikatin iye kuweꞌ tabuliꞌ inantanannen, magtawus ne tumanan Tuhanin garaꞌne sipukin bakas pinalataꞌ hadja weꞌ ne si meꞌ daraꞌakannen, hātinen si meꞌ kanabihanin.”
[8] Manjari takaleku ne isab suwala bakas mamissā si aku amban surgaꞌin. Paꞌin suwalahin si aku, “Pī kew, eddoꞌun likidan katas maluka si tangan malaꞌikat manengge diyataꞌ tahik duk diyataꞌ bulakin.”
[9] Na, hap pī ne ku si malaꞌikatin bu pināku weꞌ ku likidan katas madikiꞌin amban iye. Paꞌinne si aku, “Eddoꞌun ne bu kakanun. Mamis iyan kuweꞌ gulaꞌ buwani dem behenu saguwaꞌ lessem bang dem bettengnu.”
[10] Na, ineddoꞌ ne weꞌ ku likidan katas madikiꞌin amban tangan malaꞌikatin bu kinakan weꞌ ku. Mamis kuweꞌ gulaꞌ buwani dem beheku. Saguwaꞌ pagtatellenku ne, ngalessem dem bettengku.
[11] Manjari niyaꞌ missā si aku, paꞌinne, “Subey palataꞌnu balik lapal Tuhanin pasal sōng pinatekkane si meꞌ aꞌa amban magseddili-seddili lahat, duk bangsa duk bissāhan duk sampay si meꞌ kasultanan.”