[1] Manjari inin, niyaꞌ takiteku langit baꞌahu duk dunya baꞌahu. Langit tagnaꞌin duk dunya tagnaꞌin duk sampay tahikin ubus ne lanyap.
[2] Duk takiteku isab puweblo masutsihin, iye Awrusalam Baꞌahuhin, duwaꞌi amban diyalem surgaꞌ, amban panaꞌanan Tuhanin. Minemes puweblo miyaꞌan kuweꞌ dalil pangantin dende bakas pinasemmekan duk pinahāpan duk tahan kinawin ne duk pangantin lellahin.
[3] Manjari makakale ku suwala basag missā amban kursihin. Paꞌin suwalahin, “Na, kuweꞌitu magdambuwaꞌ patennaꞌan ne Tuhanin duk meꞌ manusiyaꞌin. Laꞌi ne Tuhanin patennaꞌ si siye duk siye ne meꞌ aꞌanen. Laꞌi ne teꞌed Tuhanin patennaꞌ si siye duk iye ne Tuhanden.
[4] Punasanne du kēmon boheꞌ mataden. Gaꞌi ne aꞌahin matey-matey. Gaꞌ ne niyaꞌ magdukka duk magtangis duk gaꞌ ne niyaꞌ peddiꞌan. Kēmon kahalan si dunya tagnaꞌin lanyap ne.”
[5] Manjari missā maningkoloꞌ si kursihin, paꞌinne, “Na, kuweꞌitu pabaꞌahuku ne kēmon-kēmonin.” Paꞌinne isab si aku, “Sulatun inin, peggeꞌ meꞌ bissā inin bennal duk kapangandelan.”
[6] Duk paꞌinne, “Tuman ne kēmon. Aku dehelluhin duk aku dambulihin, aku tagnaꞌin duk aku panambusanin. Sine-sine lekkakan paꞌinumku iye libri amban tuburan boheꞌ mangurung umul gaꞌ tamanannen.
[7] Sasuku manggaꞌi taboꞌo weꞌ sassatin, pusakaꞌanku si siye sa miyaꞌan hāpnen. Duk aku ne Tuhanden duk siye hinangku ne meꞌ anakku.
[8] Saguwaꞌ meꞌ manayikutan akuhin hawal talewde bininasahin, duk meꞌ mangalebbahan sandelde si akuhin, ilakasan du siye pī dem ebbut meylang. Damikkiyan isab sasuku maghinangan laꞌat, duk monoꞌ, duk magjina, duk ngahinang-ngahinang saweꞌne, duk numba si meꞌ tuhan-tuhan, duk kēmon magdustaꞌin, iye sukuꞌden pinapī siye dem ebbut meylang kuweꞌ luha lamewin. Iye inin pinaꞌin kamatey kaduwenen.”
[9] Manjari inin, pī si aku dangan amban pituꞌ malaꞌikat bakas mamoꞌo pituꞌ pinggan pennoꞌ weꞌ balaꞌ dambulihin. Paꞌin malaꞌikatin, “Dayiꞌ kew, pakitehanku si kaꞌu pangantin dendehin, sōng kinawin duk inēnan Bili-bilihin.”
[10] Manjari pagbayaꞌan ku weꞌ Niyawa Tuhanin duk binoꞌo ku weꞌ malaꞌikatin pī diyataꞌ punu langkew manamal. Pinakitehan weꞌ ne si aku puweblo Awrusalamin, iye puweblo masutsihin, duwaꞌi amban diyalem surgaꞌ, amban panaꞌanan Tuhanin.
[11] Puweblo miyaꞌan sinag weꞌ sahaya Tuhanin, ngillap kuweꞌ palmata mahalgaꞌ inēnan jasper, tilag kuweꞌ sāmin.
[12] Niyaꞌ dindingne paliput subuk duk langkew. Sampuk-duwe gawangnen duk kaniya-kaniya gawang miyaꞌan niyaꞌ malaꞌikat nungguꞌanne. Meꞌ gawang miyaꞌan bakas sinulatan ēn sampuk-duwe bangsa meꞌ aꞌa Israꞌilin.
[13] Niyaꞌ tellu gawang si dinding tampal silangan, tellu tampal seddepan duk amban pamābag lahat kaduwe dambiyaꞌ tellu-tellu gawang isab.
[14] Pabettadan dinding si puweblo miyaꞌan sampuk-duwe batu. Meꞌ batu miyaꞌan bakas sinulatan ēn meꞌ sampuk-duwe aꞌa bakas kawakilan weꞌ si Isa, iye inēnan Bili-bilihin.
[15] Malaꞌikat mamissā si akuhin niyaꞌ boꞌo-boꞌone sukudan bulawan panukudne puweblo miyaꞌan, duk meꞌ gawangnen, duk dindingnen.
[16] Puweblo miyaꞌan pasagiꞌ, saliꞌ tahaꞌannen duk luhahannen. Sinukud weꞌ malaꞌikatin puweblohin duk sukudannen; niyaꞌ duwe ngibu duk ampat hatus kilumetro tahaꞌannen. Saliꞌ du isab luhahannen duk langkewannen.
[17] Sinukud isab weꞌ malaꞌikatin dindingin. Langkewannen ampatpūꞌ deppe si deppehante peggeꞌ sukudan manusiyaꞌ panukudnen.
[18] Dinding miyaꞌan hininangin palmata jasper. Puweblo miyaꞌan hininangin bulawan gaꞌ niyaꞌ saget-sagetne, saguwaꞌ tilag kuweꞌ sāmin.
[19] Meꞌ batu pabettadan dinding puweblo miyaꞌan pinalmatahan duk kēmon bayuꞌ-bayuꞌan palmata mahalgaꞌ. Dambuwaꞌ batuhin palmata jasper, kaduwenen palmata bilu, katellunen palmata inēnan kalkidun, kaꞌampatnen palmata gaddung,
[20] kalimenen palmata kunit, kaꞌennemnen palmata peyat, kapituꞌnen palmata binaning, kawaluꞌnen palmata gaddung magbettik-bettik, kasiyamnen palmata binaning langgaꞌ, kasampūꞌnen palmata binaning lahi-lahi gaddung, kasampuk-dambuwaꞌnen palmata bilu langgaꞌ duk kasampuk-duwenen palmata taluk teꞌed.
[21] Duk hinang tambelan sampuk-duwe gawangin sampuk-duwe mutsaꞌ. Dambuwaꞌ gawang dambuwaꞌ isab mutsaꞌ hinang tambelnen. Duk meꞌ lān si puweblo miyaꞌan bulawan gaꞌ niyaꞌ saget-sagetne, tilag kuweꞌ sāmin.
[22] Gaꞌ ku ngite langgal dem puweblo miyaꞌan peggeꞌ īꞌ ne laꞌi Tuhanin, Panuhutan Mabalakatanin duk Bili-bilihin. Hangkan gaꞌ ne niyaꞌ kagunahan langgalin laꞌi.
[23] Duk laꞌi si puweblo miyaꞌan gaꞌ niyaꞌ kagunahande si dantaꞌ ellewin atawa bulanin peggeꞌ sahaya Tuhanin mangurung dantaꞌ si siyehin duk payitaꞌanden Bili-bilihin.
[24] Kadantaꞌan weꞌ sahaya si puweblo miyaꞌan kēmon meꞌ aꞌa maglengngan si dunyahin, duk kēmon meꞌ kasultanan si dunyahin boꞌode du meꞌ alataꞌden pī dem puweblo miyaꞌan.
[25] Meꞌ gawang si puweblo miyaꞌan luka kēmon ellew. Gaꞌi ne tinambel-tambel peggeꞌ gaꞌ ne niyaꞌ sangem laꞌi.
[26] Kēmon kabantuhan meꞌ kabangsahanin duk meꞌ alataꞌden binoꞌo du pī dem puweblo miyaꞌan.
[27] Saguwaꞌ gaꞌ niyaꞌ sammal umasek pī dem puweblo miyaꞌan. Gaꞌ niyaꞌ meꞌ aꞌa maghinangan makaꞌiyaꞌ-iyaꞌ atawa magdustaꞌ umasek pī. Luwal hadja siye maꞌumasek pī dem puweblo miyaꞌan bang ēnden tasulat dem libru sukuꞌ si Bili-bilihin, iye libru pangalistahan ēn meꞌ aꞌa taga umul gaꞌ tamanannen.