[1] Manjari, niyaꞌ takiteku kuweꞌ sattuwa paguwaꞌ amban dem tahik. Pituꞌ kōknen duk sampūꞌ tanduknen. Meꞌ tanduknen pinapīhan korona duk meꞌ lendoꞌnen sinulatan ēn laꞌat bang si Tuhan.
[2] Sattuwa takiteku inin kuweꞌ luwe katuliꞌ duk hadje manamal. Meꞌ bettisnen bantuk bettis hayep banuwang, talem kukkunen duk hadje, duk behenen kuweꞌ behe limaꞌung. Pinangurung weꞌ nagahin si sattuwa inin balakatnen duk inurungan iye kapatut magbayaꞌ si dunya.
[3] Dambuwaꞌ kōk sattuwa inin bakas bakat duk makamatey iye siꞌ, saguwaꞌ kawuliꞌan du bakatne miyaꞌan. Hangkan meꞌ aꞌa si dunyahin ulaliꞌ manamal duk nuhut ne siye si sattuwa miyaꞌan.
[4] Kēmon meꞌ aꞌahin sinumba weꞌ de nagahin peggeꞌ inurungan weꞌ ne kapatut sattuwahin. Sinumba isab weꞌ de sattuwahin. Paꞌinde, “Gaꞌ niyaꞌ balakatan kuweꞌ sattuwa iyan. Gaꞌ niyaꞌ makaꞌatu si iye.”
[5] Pinasagadan sattuwa inin magbayaꞌ si dunya dem ampatpuk-duwe bulan. Pinasagadan isab iye magabbu duk bisan bissā-bissāhanne Tuhanin pinasagadan hadja iye.
[6] Laꞌat hadja binissānen sabab Tuhanin duk sabab ēnnen duk patennaꞌannen, hātinen surgaꞌin duk sabab kēmon mapatennaꞌ si surgaꞌin.
[7] Pinasagadan isab sattuwahin magbonoꞌ duk meꞌ aꞌa Tuhanin sampay tadaꞌag siye weꞌ ne. Duk inurungan iye kapatut magbayaꞌ si kēmon aꞌa amban kēmon kabangsa-bangsahan duk kalahat-lahatan duk amban kēmon bayuꞌ-bayuꞌan bissāhan duk kēmon pagsultanan.
[8] Sattuwa inin sinumba du weꞌ kēmon aꞌa si dunyahin, sasuku gaꞌ tasulat ēnden dem libru sukuꞌ si inēnan Bili-bilihin, iye bakas pinapateyin. Gaꞌ pe dunyahin pinapanjari, andang ne tasulat dem libru inin ēn meꞌ aꞌa taga umul salama-lamahin.
[9] Na, pakale teꞌed kaꞌam, bang niyaꞌ du tayingebi.
[10] Bang pangaral Tuhan kaꞌamin siniggew kaꞌam, asal siniggew du kaꞌam. Bang pangaral Tuhan kaꞌamin matey pineddang kaꞌam, asal matey pineddang du kaꞌam. Hangkan kaꞌam meꞌ sukuꞌ si Tuhanin, subey kaꞌam magsandal hadja duk subey pabasagbi sandelbin.
[11] Manjari niyaꞌ ne isab takiteku sattuwa paguwaꞌ amban dem bulak, niyaꞌ duwe tandukne dikiꞌ-dikiꞌ kuweꞌ tanduk bili-bili saguwaꞌ suwalanen kuweꞌ suwala naga.
[12] Ginuna weꞌ ne kapatut pinangurung si iye weꞌ sattuwa bakas kawuliꞌan bakatnen. Ginagahan weꞌ ne kēmon meꞌ aꞌa si dunyahin dinaꞌak sinumba si siye sattuwa dehellu miyaꞌan.
[13] Sattuwa mapasunuꞌ inin makahinang hinangan makaꞌulaliꞌ; tadaꞌakne ebbutin laboꞌ amban langit pitu si dunya si pagmatahan meꞌ aꞌahin kēmon.
[14] Ekka aꞌa kaꞌakkalan weꞌ ne duk taboꞌo-boꞌo sabab hinangan makaꞌulaliꞌ hininangnen weꞌ balakat amban sattuwa dehelluhin. Dinaꞌak weꞌ sattuwa dambulihin meꞌ aꞌahin ngahinang limbagan pamahadje sattuwa bakas mabakat weꞌ bessihin bu kawuliꞌan ne.
[15] Inurungan balakat isab sattuwa mapasunuꞌ miyaꞌan makellum limbagan sattuwa dehelluhin, hangkan makabissā ne; duk maguldin limbagan miyaꞌan dinaꞌak pinapatey sasuku manggaꞌi manumba si iyehin.
[16] Ginagahan weꞌ ne kēmon aꞌahin, langkew ke pagaꞌanen atawa diyawaꞌ, dayahan ke atawa miskin, banyagaꞌ ke atawa dumaꞌin. Ginagahan siye kēmon subey minalkahan diyataꞌ tangande kanawanin atawa diyataꞌ lendoꞌde.
[17] Gaꞌ niyaꞌ aꞌa makajari melli atawa magpabelli ine-ine bang gaꞌ iye bakas kamalkahan. Malka miyaꞌan ēn sattuwa dehelluhin atawa lumero gantiꞌ ēnnen.
[18] Hunit lumero inin piniha hātinen. Saguwaꞌ sine-sine niyaꞌ kataꞌune, tataliꞌne du bang ine hāti lumero sattuwa inin. Peggeꞌ ēn aꞌa du iyan. Lumero inin ennem hatus duk ennempuk-ennem.