[1] Manjari inin, niyaꞌ ne isab takiteku malaꞌikat duwaꞌi amban surgaꞌ magboꞌo kunsiꞌ tambel lowang manggaꞌi tatekkadin duk magboꞌo karena bohat.
[2] Siniggew weꞌ ne nagahin, iye sawe amban tagnaꞌ awwalley. Iye miyaꞌan hibilis atawa nakuraꞌ seyitanin. Duk kinarena iye dem da ngibu tahun.
[3] Ubus bu ilakasan iye weꞌ malaꞌikatin pī dem lowang manggaꞌi tatekkadin duk kinunsiꞌ weꞌ ne tambelnen duk pinapīhan indan duk gaꞌi taluka. Kinalabusu seyitanin supaya gaꞌi ne kaꞌakkalanne meꞌ kabangsa-bangsahanin tiggelan gaꞌi puwas da ngibu tahunin. Pagpuwas da ngibu tahun miyaꞌan pinaleppa du iye daddaliꞌ.
[4] Manjari ngite ku meꞌ kursi. Meꞌ maningkoloꞌ diyataꞌ meꞌ kursi miyaꞌan, kaꞌurungan siye kapatut ngahukum. Damikkiyan kiteku isab niyawa meꞌ aꞌa bakas pinapatey sabab pagmahalayakde toloꞌ mabennal pinakitaꞌu weꞌ Isa Almasihin duk pagmahalayakde lapal Tuhanin. Gaꞌ bakas sumbade sattuwahin atawa limbagannen. Duk gaꞌ isab siye kamalkahan malka sattuwahin si lendoꞌde atawa si tangande. Meꞌ aꞌa inin ellum balik duk tumuhut siye pu si Isa Almasi magbayaꞌ dem da ngibu tahun.
[5] Iye miyaꞌan tagnaꞌan pagpakellum balik meꞌ pateyin. Sinduwe meꞌ pateyin gaꞌ ellum balik tiggelan gaꞌ pe puwas da ngibu tahun miyaꞌan.
[6] Meꞌ matumuhut pinakellum tagnaꞌ pagpakellum balik meꞌ patey inin, kēgan teꞌed duk iledjikiꞌan siye. Gaꞌi siye makalabey katiksaꞌan salama-lamahin, iye pinaꞌin kamatey kaduwenen. Hininang siye bangsa imam maghinang si Tuhan duk pu Almasi, duk tumuhut siye pu si Almasi magbayaꞌ dem da ngibu tahun.
[7] Pagpuwas ne da ngibu tahun, pinaleppa du nakuraꞌ seyitanin amban dem lowang pangalabusuhan iyehin.
[8] Duk paguwaꞌ iye iyan pī ngakkalan meꞌ kabangsa-bangsahan makanat si ampat pidjū alamin. Inēnan siye Gog duk Magog, hātinen banta Tuhanin. Pagtipun nakuraꞌ seyitanin kēmon meꞌ aꞌa miyaꞌan supaya siye magbonoꞌ. Banes teꞌed meꞌ aꞌahin kuweꞌ meꞌ umus si higad tahik.
[9] Palanjal ne siye ngalatag tibuꞌukan lahatin duk iliput weꞌ de kampu meꞌ aꞌa sukuꞌ si Tuhanin duk puweblo inelleg weꞌ Tuhanin. Saguwaꞌ niyaꞌ ebbut laboꞌ amban diyataꞌ langit duk kakan ebbutin siye kēmon.
[10] Ubus miyaꞌan, siniggew ne nakuraꞌ seyitanin, iye mangakkalan meꞌ aꞌa si meꞌ kabangsahanin duk ilakasan iye pī dem ebbut meylang, kuweꞌ luhahan lamew ebbutin. Sattuwahin duk nabi manggaꞌi mabennalin bakas ilakasan ne laꞌi. Duk bininasa siye laꞌi dem ebbut miyaꞌan ellew-sangem sampay salama-lama.
[11] Manjari inin, niyaꞌ takiteku kursi poteꞌ duk hadje. Takiteku isab maningkoloꞌ malaꞌihin. Sābu miyaꞌan, bessuwang dunyahin duk langitin lanyap amban panaꞌanan Tuhanin duk gaꞌ ne siye takite balik.
[12] Manjari takiteku kēmon meꞌ pateyin, mākanak-aꞌa bahiꞌ, langkew pagaꞌanen atawa diyawaꞌ, nengge laꞌi paharap si kursi miyaꞌan. Ubus bu iluka ne meꞌ libruhin sampay libru bakas panulatan ēn meꞌ aꞌa kaꞌurungan umul gaꞌ tamanannen. Manjari kēmon meꞌ pateyin hinukum ne dangan-dangan sabab bakas tahinangde kaꞌellumden peggeꞌ laꞌi kēmon tasulat dem meꞌ libruhin.
[13] Kēmon meꞌ patey dem tahikin paguwaꞌ duk paharap si Tuhan. Damikkiyan isab kēmon meꞌ patey dem kubulin, dem ahilatin, kēmon siye paguwaꞌ duk paharap si Tuhan. Duk hinukum siye dangan-dangan sabab bakas tahinangde kaꞌellumden.
[14] Manjari kamateyin duk pahalihan meꞌ pateyin ilakasan dem ebbut meylang kuweꞌ luha lamew. Ebbut meylang inin pinaꞌin kamatey kaduwenen.
[15] Manjari sasuku gaꞌ talista ēnnen dem libru panulatan ēn meꞌ aꞌa taga umul gaꞌ tamanannen, ilakasan isab dem ebbut meylang kuweꞌ luha lamewin.