[1] Manjari sābuku mamayamin, inānan weꞌ Bili-bilihin tagnaꞌ lekket si katas ilikidin. Duk takaleku dambuwaꞌ amban ampat malaꞌikat sakabayuꞌin ngalingan. Suwalanen kuweꞌ lugung. Paꞌin malaꞌikatin, “Pī ne kew palanjal.”
[2] Manjari ngite ku kuraꞌ poteꞌ paguwaꞌ. Manguraꞌin ngantan panaꞌ. Duk niyaꞌ pī mettad korona bulawan diyataꞌ kōkne. Manjari palanjal ne iye pī magbonoꞌ duk luwal iye ngandaꞌag kemuwe matuꞌuhin sampay kuweꞌitu.
[3] Manjari inānan ne isab weꞌ Bili-bilihin kaduwe lekket si katas ilikidin. Duk takaleku kaduwe malaꞌikat sakabayuꞌin ngalingan, paꞌinne, “Palanjal ne kew.”
[4] Magtawus niyaꞌ kuraꞌ seddili paguwaꞌ, peyat manamal. Manguraꞌin inurungan bessi tahaꞌ duk inurungan iye kapatut ngānan kasanyangan amban dem dunya duk nasew meꞌ aꞌahin duk siye magbonoꞌ-binonoꞌ.
[5] Manjari inānan weꞌ Bili-bilihin katellu lekket si katas ilikidin duk takaleku katellu malaꞌikat sakabayuꞌin ngalingan, paꞌinne, “Palanjal ne kew.” Pagpayamku niyaꞌ takiteku kuraꞌ ittem paguwaꞌ. Manguraꞌin niyaꞌ antananne timbangan.
[6] Manjari niyaꞌ kuweꞌ suwala takaleku paguwaꞌ amban dem tengngaꞌ ampat malaꞌikat sakabayuꞌin, paꞌinne, “Da ubag hadja buwas tirigu atawa tellu ubag dawaꞌ tabelli si tangdan hinang da ellew. Saguwaꞌ isellanin duk boheꞌ ubas ininumin gaꞌi subey pinakaꞌatan.”
[7] Manjari inānan weꞌ Bili-bilihin kaꞌampat lekketin, duk takaleku kaꞌampat malaꞌikat sakabayuꞌin ngalingan, paꞌinne, “Palanjal ne kew.”
[8] Pagpayamku niyaꞌ takiteku kuraꞌ pusiyat manamal. Manguraꞌin ēnnen Kamatey duk niyaꞌ paturul amban dambulihanne inēnan Ahilat. Inurungan siye kapatut mapatey da bahagiꞌ meꞌ aꞌa si dunyahin, tellu bahagiꞌin gaꞌ. Bonoꞌ, unus, saki, duk hayep talun iye makajari pamapatey weꞌ duwangan miyaꞌan.
[9] Manjari inānan weꞌ Bili-bilihin kalime lekketnen. Na, ngite ku pagkulubanan duk diyawaꞌ pagkulubanan miyaꞌan, laꞌi niyawa meꞌ aꞌa bakas pinapateyin peggeꞌ magmahalayak siye lapal Tuhanin duk peggeꞌ matuyuꞌ siye magaka-aka sabab Isa Almasi.
[10] Ngalingan meꞌ niyawa miyaꞌan si Tuhan pinapales, paꞌinde, “O Tuhan, Panuhutan kamihin, kaꞌu mabalakatanin. Sutsi kew duk kapangandelan kew. Saꞌingge tiggelannen meke hukumnu meꞌ aꞌa si dunyahin duk legganu siye pasal pamapateyde kamihin?”
[11] Manjari inurungan siye dangan-dangan juba poteꞌ duk dinaꞌak dahuꞌ siye pahali-hali namba sampay jukup ne ekkahan pagkaside maghinang si Tuhanin tapapatey du isab kuweꞌ siyehin.
[12] Manjari takiteku inānan weꞌ Bili-bilihin kaꞌennem lekketin. Magtawus linug manamal dunyahin. Mata ellewin ngaꞌittem kuweꞌ semmek naynay duk bulanin ngapeyat kuweꞌ lahaꞌ.
[13] Meꞌ poteꞌanin kapagpag-pagpagan pī si dunya kuweꞌ meꞌ buwaꞌ kayu pagpag bang jedjeg kayuhin weꞌ baliyu basag.
[14] Langitin lanyap kuweꞌ katas bakas ilikid duk kēmon punuhin duk meꞌ kapūꞌ-pūꞌanin pinda ne amban pabettadanden.
[15] Kēmon meꞌ aꞌa si dunyahin hewuhalaꞌ bu ne meꞌ kasultanan si dunyahin, meꞌ aꞌa taga kapatut magbayaꞌin duk meꞌ nakuraꞌ meꞌ sundaluhin, duk meꞌ aꞌa madayahan duk mabasaganin, duk kēmon meꞌ aꞌa sinduwehin, banyagaꞌ ke atawa dumaꞌin, kēmon siye katapuk-tapukan dem meꞌ lingab duk si meꞌ kabatuhan diyataꞌ punu.
[16] Ngalingan siye pī si meꞌ punuhin duk si meꞌ batuhin, paꞌinde, “Laboꞌ kaꞌam bu debbunanun kami supaya kami gaꞌi takite weꞌ maningkoloꞌ si kursihin duk supaya isab kami gaꞌi kamulkaꞌan weꞌ Bili-bilihin.
[17] Peggeꞌ taꞌabut ne ellew pamatekka mulkaꞌ Tuhan duk Bili-bilihin si manusiyaꞌin. Bu gaꞌ niyaꞌ makasandal mulkaꞌ inin bisan sine.”