[1] ئێکە عیسا هەر دوانزە شاگردەگەێ چڕی وە لاێ خوەێ و هاز و تواناێ چارەسەر کردن گشت مڵەیکەتەیل و شەفا دان مەریزیەیل دا وە پێان
[2] و ئمجا کلێان کرد تا جاڕ پاشاێەتی خوداوەن بکیشن و شەفا بێەن.
[3] عیسا وە پێان وەت: "هیچ چشتێگ ئڕا ناو ڕێ ئەول خوەدانا مەوەن، نە گوچان، نە جانتای، نە نان، نە پۊل، تاهەێ دڵنگ زێاتییش مەوەن.
[4] وە هەر ماڵێگ ک چین، لە ئەو ماڵە بمینن تا ئەو وەختە ک خوازین لە ئەو شارە بچین.
[5] ئمان لە هەر وڵاتێگ ک لە گرد نەیشتنەدان، وەختێگ پسا لە ئەورە وە ڕێەو چین تووز پادان بتەکننەو تا بوودن وە شاتیێگ ئڕاێان."
[6] ئەوانیش کەفتن وە ئابادیەیلا و جاڕ خەوەر خوەش کیشان و شەفاێ مەریزەیل دان.
[7] وەختێگ هرۆدۆس ئانتیپاس حاکم جەلیلیە لە کارەیل عیسا باخەوەرەو بۊ، سەر لە لێ شێویا، چۊن فرە کەس وەتن ک یە یەحیاێ قوسڵدەرە ک لە مردنا زینێەو بۊە.
[8] فرە کەسیش وەتن ک یە ئەلیاس نەبیە ک هاتێەسەو یا کەسانەیلێگیش وەتن یە یەکێگ لە پەێقەمەرەیل دەورەێ ڕاسانە ک سەر هێز داێە.
[9] هرۆدۆس وەت: "م خوەم سەر یەحیا لە لەشێەو کردم، سە ئێ پیاوە کیە ک ئێ چۊنەو حکاێەتەیلێگ لە لێ ئەژنەوم؟" ئمجا تواس ک بۊنێدنەێ.
[10] وەختێگ کلکەردەگان عیسا هاتنەو، هەرچێگ ک کردۊن ئڕەێ عیسا باس کردن. ئەۊیش شاگردەگانێ وەلا برد و وە دزیەو چێن وە شار بۊچگڵەێگ وە ناو بەێت سەیدا.
[11] ئمان مەردمان ڕەسینەو و ئمجا کەفتن ئەو شوونێ، عیسایش پێشوازی لە لێان کرد و باس پاشاێەتی خوداوەن ئڕاێان هاورد و ئەوانە ک حاجەت وە شەفا، داشتن شەفا دا.
[12] دەم ئێوارە شاگردەگان هاتن وە لاێ عیسا و وەتن: "ئێ مەردمانە مرەخەس بکە تا شاێەد بچن وە ئێ دیەکە و ئابادیەیل دەور و وەرە تا خواردنێگ و جێ خەوێگ بۊننەو، چۊن ئێرە ک ئیمە هایمن لە تێ چووڵ بیاوانە."
[13] ئمان عیسا لە جواوێان وەت: "ئێوە چشتێگ ئڕەێ خواردن بێەن وە پێان." ئەوانیش وەتن: "ئیمە تەنیا پەنج گلە نان و دو گلە ماسی دیریمن، باێە بچیمن ئڕا گشت ئێ مەردمە نان گیر باریمن؟"
[14] چۊن نزیکەێ پەنج هزار نەفەر بۊن. عیسا وە شاگردەگانێ وەت: "بنیشننەێان ئەو زەۊ؛ بڕ وە بڕ، هەر بڕێگ نزیک وە پەنجیا کەس."
[15] ئەوانیش گشتێ مەردم دانیشانن.
[16] عیسا پەنج گلە نان و دو گلە ماسیەگە گرت ئەو دەس و ڕۊ هەڵگەردان ورەو ئاسمان، برەکەت دا وە پێان و نانەگان شکان و داگەێان وە شاگردەگانێ تا بنەنەێان لە وەر دەس مەردم.
[17] گشتێ خواردن و تێر بۊن. چشتێگ ک لە وەر دەس مەنەو دوانزە سەوەتە هۊردە نان بۊ.
[18] ڕووژێگ عیسا وە تەنیا دوا کرد، تەنیا شاگردەگانێ لە نزیکێ بۊن. لە لێان پرسی: "مەردمان ئۊشن م کیم؟"
[19] ئەوانیش جواو دان: "یەحیاێ قوسڵدەر، بڕێگ ئۊشن ئەلیاس، باقی مەردمیش ئۊشن یەکێگ لە پەێقەمەرەیل دەورەێ ڕاسانید."
[20] عیسایش وە پێان وەت: "ئەنۊ ئێوە م وە کی زانین؟" پترۆس جواو دا: "مەسیح خودا."
[21] ئمجا وە پێان سپارش کرد باس ئێ چشتە لە لاێ هیچکەس نەکەن.
[22] و وەت: "کوڕ ئاێەم باێەد زەجر و زۊخ فرەێگ بکیشێد، کاهنەیل گەورا و ئاخونەیل شەریعەت و کەێخودایل هاشا لە لێ بکەن، بکوشیەێدن و لە ڕووژ سێهم لە مردنا هەڵسێدن."
[23] ئێکە ئمجا وە گشتێان وەت: "ئەگەر کەسێگ خوازێدن ئەو پەێڕەوشت م بکەفێدن، باێەد لە خوەێ واز بارێدن و ڕووژانە سەلیبەگەێ خوەێ وە کووڵ بکیشێدن و لە شوون م باێدن.
[24] چۊن ئەوانە ک خوازن گیان خوەێان نجات بێەن، لە دەس دەنەێ و ئەوانە ک گیانێان وە خاتر م لە دەس دەن، وە ڕاس نجاتێ دەن.
[25] فایدەێ بوودن وە چوە، ئەگەر کەسێگ تمام دنیا بارێدن وە دەس ئمان نەفس خوەێ لە دەس بەێدن یان خراو بکەێدن.
[26] هەرکەس لە من و قسیەگانم شەرم بکەێدن، کوڕ ئاێەمیش وەختێگ لە وەرەسەێ شەوکت خوەێ و باوگ ئاسمانی و مەلاێکە موقەدەسەگانەو باێدنەو، لە لێان شەرم کەێدن.
[27] ئمان وە ڕاس وە پیدان ئۊشم، بازێگ لە ئەوانە ک لە ئێرە وسانە تا پاشاێەتی خوداوەن وە چەو نەۊنن، نیەمرن."
[28] نزیکەێ هەیشت ڕووژ پشت سەر ئەو قسیەیلە، عیسا پترۆس و یووهەنا و یاقووب ئەول خوەێا برد و چێ ئڕا بان کۊەێگ تا دوا بکەێدن.
[29] هەناێ لە پسا دوا کرد، شێوەێ دەمچەوێ هەوەز بۊ و دڵنگەگانێ سفێد بریقەکەرەو بۊن.
[30] وە یەێهەو ئەوان دین ک دو نەفەر تر، مووسا و ئەلیاس لە پسا ئەولێا قسیە کەن.
[31] جەماڵێان پڕ شەوکەت بۊ و باس لە سەفەر ئاخرەت عیسا کردن، ک باێە وەێ زۊ لە ئورشەلیم تەکمیلێ بکەێدن.
[32] هەرسەێ پترۆس و ڕەفیقەیلێ خەو گرتۊدنەێان، ئمان هێمان چەوێان وریاێ بۊ. ئەوان ئجڵاڵ عیسا و ئەو پیاوەیلە ک لە کنارێ وساۊن، دین.
[33] هەناێ ئەوان خوازین بچن، پترۆس وە عیسا وەت: "گەورەم، فرە خاسە ک ئیمە هایمن لە ئێرە، با سێ گلە چەرداخ درس بکەیمن، یەکێگ ئڕا ت، یەکێگ ئڕا مووسا و یەکێگیش ئڕا ئەلیاس." ئمان پترۆس خوەێیش نەزانس چوە ئۊشێدن.
[34] لەێ ئانە هەورێگ هڵات و باڵێ کیشا لە سەرێان. وەختێگ پسا لە ناو هەورەگە گوم بۊن، ڕخێان چێ.
[35] ئێکە ئمجا لە ناو هەورەگەێا دەنگێگ هات ک وەت: "یە کوڕ منە، خوەم هەڵوژانمەسەێ، وە قەوڵێ بکەن."
[36] وەختێگ دەنگەگە تمام بۊ، ئەوان عیسا وە تەنیا دین. ئەوانیش لە ئەو ڕووژەیلە بێ دەنگ بۊن و لە باوەت ئەو چشتەیلەو ئەول کەسا قسیە نەکردن.
[37] ئەو ئێ ڕووژ، وەختێگ ئەوان لە کۊەگە ئەو خوار هاتن، مەردمان فریەێگ هاتن وە پیریێەو.
[38] ئمجا یەکێگ لە ناو جماعەتەگەێا هاوار کرد: "مامووسا، دەسم وە داواند بەو سەر کوڕەم، یە تەنیا مناڵ منە.
[39] هەر وە ساتێگ مڵەێکەتێگ گرێدنەێ و قیژ وڵنگ خەێدن وە پێ، ورەو ئیلا و ئەولا هەڵوەشنێدنەێ تا ئەورە ک دەمێ کەف کەێدن، لا وە لەشێ خەێدن و ئمجا وە سەختی لە گیانێەو بوودن.
[40] لاڵکیام لە شاگردەگاند تا ئەو مڵەێکەتە لە کووڵێەو بکەن، ئمان نەتوانسن."
[41] عیسا لە جواوێ وەت: "هەێ جماعەت بێ باوەڕ و ڕێ وە شۊم، تا کەێ م باێە ئەولدانا بووم و جەوردان بکیشم؟ کوڕەد بار وە ئێرە بزانم!"
[42] وەختێگ کوڕە لە پسا هات، ئەو ڕووح خەبیسە کوتاگەێ وە زەۊا و پلێ دا. ئمان عیسا خوڕیا لە مڵەێکەتەگە و شەفاێ کوڕە دا و داێەوەێ ئەو دەس باوگێ.
[43] گشتێ لە گەورای خودا سەرسام مەنن. لەێ ئانە ک گشتێ لە کارەگەێ عیسا حەێران مەنۊن، وە شاگردەگانێ وەت:
[44] "بیلنا ئێ قسیەیلە خاس بچن وە گووشدانا؛ کوڕ ئاێەم دریەێدن وە ژێر دارەو و خریەێدن لە دەس ئاێەمەیل."
[45] ئمان ئەوان لە ئەو قسیە نەڕەسینەو، ماناگەێ لە لێان شاریاۊدنەو تا لە لێ نەڕەسنەو. ئەوانیش ڕخێان چێ لە بووت ئەو قسیەوە لە لێ بپرسن.
[46] چەقپەڵێگ لە ناوێان هێز گرت ک کامێان لە ئەودۊاێان گەوراترەکە.
[47] ئمان عیسا ک زانس هەر کامێان لە لاێ خوەێانەو چۊ فکر کەن، مناڵ بۊچگێگ هاورد و نیشانەێ ئەو لاێ خوەێ
[48] و وە پێان وەت: "هەرکەسێگ مناڵێگ لەواێ ئێ مناڵە وە خاتر م قەبوول بکەێد، وە ڕاس م قەبوول کردێە و هەرکەسێگیش ک م قەبوول داشتوودن وە ڕاس قەبوول ئەو کەس داشتێە ک کل م کردێە. بۊچگترین ناودان گەوراتریندانە."
[49] یووهەنا لە جواوێ وەت: "گەورەم، ئیمە یەکێگ دیمن ک وە ناو ت مڵەێکەت لە کووڵ مڵەێکەتدارەو کرد. ئیمە نواێ گرتیمن، چۊن ئەۊ لە شاگردەیلد نەۊ."
[50] عیسا وە پێ وەت: "نواێ مەگرن، چۊن هەرکەسێگ دژ وە ئێوە نیە، هاوڕێدانە."
[51] وەختێگ ڕووژەیل هەڵگەردیان عیسا ورەو خودا نزیکەو بۊ، ئڕا وە ئورشەلیم چێن پا دا وە گەز.
[52] ئمجا کلکەردەیلێگ لە نواێ خوەێ کل کرد. لە سەر ڕێەگەێان چێن وە ئابادیێگ لە سامرەئیەگان تا ئەورە ئڕا هاتن عیسا ئامادە بکەن.
[53] ئمان مەردم ئابادیەگە لە گرد نەیشتنەێان، چۊن ڕۊ لە ئورشەلیم بۊن.
[54] هەناێ یاقووب و یووهەناێ شاگردێ چۊنەو دین، وەتن: "مامووسا، تواید تا دوا بکەیمن ک ئاگر لە ئاسمانەو بوارێدن و لە ناو بوەێدنەێان [هەر ئەو چۊنە ک ئیلیا کرد]؟"
[55] ئمان ئەۊ لاوە کرد و تنیا لە لێان [:ئێوە نیەزانین لە چ زاتێگین!
[56] چۊن کوڕ ئاێەم ناتێە تا خراو و خاپۊر بکەێدن، ئمان هاتێە تا نجات بێەێدن]. ئمجا کەفتن وە ڕێا تا وە ئابادی ترەک.
[57] لە بەێن ڕێ یەکێگ وە عیسا وەت: "م خوازم بووم وە پەێڕەود و لە شووند بام، وە هەر کوورەێا بچیدن."
[58] عیسایش وە پێ وەت: "هەر ڕوویێگ کوناڕوویێگ دێرێدن، هەر مەلەوەرێگ لانەێگ دێرێد، ئمان کوڕ ئاێەم هیچ شەوماواێگ نەێرێدن ک لە تێ سەرەو بنەێدن."
[59] عیسا وە یەکتر وەت: "بەو بکەف ئەو شوون م!" ئەۊیش وەت: "مامووسا، بیلا ئەوەڵ بچم تەرمەگەێ باوگم خاک بکەم."
[60] ئمان عیسا وە پێ وەت: "بیلا مردێەیل خوەێان مردێ خوەێان خاک بکەن، ئمان ت بچوو مزگانی پاشاێەتی خوداوەن پەخشەو بکە."
[61] کەس تر وەت: "م کەفم ئەو شوون ت مامووسا، ئمان بیل تا ئەوەڵ لە ماڵ و مناڵ خوەم ماڵئاوای بکەم."
[62] عیسایش وە پێ وەت: "کەسێگ ک دەسێ وە گاوەسنەو بوودن و چەوێ وە پشت سەر خوەێ، وە دەرد پاشاێەتی خوداوەن نیەخوەێدن."