[1] لە یەکمین ڕووژ هەفتە شەوەکی شەفەق، ژنەیل سدر و کافوورێگ ک حازر کردۊن ئەول خوەێانا هاوردن و هاتن وە سەر قەورەگە.
[2] دین سان دەرانەێ قەورەگە پل دریاس ئەو لا.
[3] ئمان وەختێگ ئەوان چێنەو ناو، تەرم عیساێ خاوەن شکۆ لەورە نەین.
[4] لەێ ئانە ک لەێ بووتەو پەشێو مەنۊن، وە یەێهەو دو پیاو وە دڵنگەیل سفێد بریقەکەرەو لە لاێان زاهر بۊن.
[5] ژنەگانیش ک وەهشەت گرتۊدنەێان وەر سەر کردنەو خوار، ئمان ئەوان وە پێان وەتن: "ئڕا چوە مینەی زینگێگ لە ناو مردێەیل کەین؟
[6] ئەۊ لەێرە نیە، ئمان زینێەو بۊە. بارنەو هۊردان ک وەختێگ هێمان لە جەلیل بۊ چۊ ئڕادان وەت،
[7] ک کوڕ ئاێەم باێە ڕادەس گوناکارەیل بکریەێد، لە سەلیب بکیشیەێد و لە ڕووژ سێهم زینێەو بوودن."
[8] ئمجا ئەوان قسیەگان عیسا کەفتەو هۊرێان
[9] و هەناێ لە قەورەگە هاتنەو، گشتێ ئێ چشتەیلە ئڕا ئەو یانزە گلە کلکەردەگان و باقی مەردم تاریف کردن.
[10] ئەو ژنەیلە ک ئێ خەوەرە وە کلکەردەگان ڕەسانن یانە بۊن؛ مەریەم مەجدەلیە، یوونا و مەریەم داڵگ یاقووب و باقی ژنەیلێگ ک ئەولێانا بۊن.
[11] ئمان ئێ قسیەیلە ئڕا ئەوان منس وە وڕینەێ بێ ماناێگ و باوەڕ وە پێان نەکردن.
[12] ئمجا پترۆس هەڵسا ئەو پا و وە دەو چێ وە دەر قەورەگە، پشت چەمان و سەر کیشا لە تێ، ئمان بێجگە لە کەتان کفنەگە چشتێگ نەی. جا هاتەو وە ماڵ، سەرسام مەنۊدن لە ئێ هەڵکەفتە ک تەتیاۊدن.
[13] جا بزان چوە بۊ، هەر لە ئەو ڕووژە دوان لە لێان لە پسا چێن ئڕا ئاوایێگ وە ناو ئمائوس، لە نزیکەێ یانزە کیلوومتری ئورشەلیم
[14] و لە پسا ئەول یەکترەکیا لە باوەت گشت ئێ چشتەیلە ک ئتفاق کەفتۊن قسیە کردن.
[15] لەێ ئانە ک ئەوان لە پسا وە گەرد یەکترەکیا گەپ دان و باس کردن، خود عیسا هاتەو نزیک و کەفت ئەولێانا.
[16] ئمان چەوەیلێان لە ئەوناسین عیسا بەسیاۊدن.
[17] ئەۊیش وە پێان وەت: "یە لەێ ناو ڕێە، گەپ چوە دەین لە پسا؟" ئەوانیش وە تماشاێگەو ک گیری لە لێ واری، بێدەنگ وسان.
[18] ئمجا یەکێگ لە لێان ک ناوێ کلیۆپاس بۊ، لە جواوێ وەت: "باێە ت تەنیا قەریبەێگ لە ئورشەلیم بۊدن، ک لە هەڵکەفتەیل ئێ ڕووژەیل ئەو شارە هیچ نیەزانید؟"
[19] ئەۊیش لە لێان پرسی: "چ چشتەیلێگ؟" ئەوانیش وەتن: "ئێ باس عیساێ ناسریە، ک پەێقەمەرێگ بۊ وە کڵام و کردار تواناێگەو لە ژێرساێ خودا و لە ناو مەردم
[20] و یە ک چۊ کاهنەیل گەورا و کەێخودایلمان ڕادەسێ کردن تا ماکوومێ وە مەرگ بکەن و کیشانەێ لە سەلیب.
[21] ئمان ئیمە ئمێدوار بۊمن ک ئەۊ هەر ئەو کەسە بوودن ک بەنی ئسرائیل ئازاد کەێدن. ئا، لەوەیشە وەولاوە، ئمڕوو یە سێهمین ڕووژە ک ئێ چشتەیلە ئتفاق کەفتنە.
[22] لەیە وەولاوە، بازێگ لەێ ژنەیل هاوڕێمانە سەرساممان کردنە. ئمڕوو شەوەکی شەفەق، ئەوان چێنەسە ناو قەورەگە،
[23] ئمان جنازەگە لە ناو قەورەگە نیەۊنن، تیەنەو و ئۊشن؛ لەورە فرێشتەیلێگ لە لێان ئەو دەیشت کەفتنە، ک وە یان وەتنە، ک ئەۊ زینێەو بۊە.
[24] بڕێگ لە هاوکوڕەیلێگ ک ئەولمانا بۊنە چێن وە قەورەگە و دۊن ک ڕیک هەر وەو جوورەسە ک ژنەگان وەتۊن، ئمان یان ئەۊ وە چەو نەۊن."
[25] ئمجا عیسا وە پێان وەت: "چەنێگ گەوجین و چەن دێر باوەڕ وە گشتێ ئەو چشتەیلە ک پەێقەمەرەیل وەتنە.
[26] مەگەر قرار نەۊ مەسیح تمام ئێ عەزاوەیلە بکیشێدن و ئێکە وارد شکۆ و شەوکەت خوەێ بوودن."
[27] ئمجا دەس کرد وە شیەو کردن گشت ئەو چشتەیلە ک لە باوەت خوەێ لە تەورات مووسا تا وە کتاوەیل باقی پەێقەمەرەیل نۊسیاس.
[28] وەختێگ هاتنەو نزیک ئەو ئابادیە ک لە پسا ئڕا ئەورە چێن، عیسا چۊنەو کرد، چمان تواێدن ئڕەێ شوون ترەک بچوودن.
[29] ئمان ئەوان لە بەونی لاڵکیان لە لێ، وەتن: "لە لاێ ئیمە بووسیە، چۊن دی هڵاێە ئێوارەس و دی ڕووزێار نەمەنێە." جا ئەۊیش چێ ئەو ناو تا لە لاێان بووسێدن.
[30] وەختێگ وە گەرد ئەوانا لە سەر سفرە بۊ، نانێگ هەڵگرت زکر خودا کرد و شکانەێ و داگەێ وە پێان.
[31] ئەوسا چەوەیلێان واز بۊ و ناسینەوەێ، ئەۊیش لە چەوێان خەێوا هات.
[32] ئەوانیش وە یەکترەکی وەتن: "نەۊ لە ناو ڕێ هەناێ پسا ئڕامان قسە کرد، هەناێ کتاو پیرۆز ئڕامان شیەو کرد، دڵمان چمان لە ئاگر هەڵقرچیا!"
[33] هەر لە ئەو ساتە هەڵسان و پلیانەو ورەو ئورشەلیم. لە ئەورە دین ک ئەو یانزە شاگردەگە و هاوڕێەیلێان گردەو بۊنە.
[34] لە پسا ئۊشن: "لە ڕاسیا مەسیح خاوەن شکۆ زینگەو بۊە و خوەێ وە شەمعوون نیشان داس."
[35] ئەوانیش باس ئەو چشتە کردن ک لە ناو ڕێ ئتفاق کەفتۊدن و یە ک چ جوور لە وەخت شکانن نانەگە ئەوشناسۊنەێ.
[36] لەێ ئانە ک ئەوان باس ئێ چشتەیلە کردن، عیسا خوەێ لە ناوهەێنێان وسا و وە پێان وەت: "سڵام وە پیدان."
[37] ترس و وەهشەت داگرتەێان، خێاڵ کردن ڕووحێگ هاتێەسە وەر چەوێانا.
[38] ئەۊیش وە پێان وەت: "ئڕا ڕخدان چوودن، ئڕا چە دگومانی کەفتێەسە دڵدان؟
[39] بنووڕن وە دەسەیلم و پایلم، بنووڕن خود خوەمم. دەس بێەن وە قەێمەو و بزانن، ئڕا یە ک ڕووح گووشت و سقان نەێرێدن، هەر ئەو چۊنە ک دۊنین م دێرم."
[40] هەناێ ئێ چشتەیلە وەت، دەسەیلێ و پایلێ نیشانێان دا.
[41] ئەوان هێمان لە خوەشیا تاجب مەنۊن و نەتوانسن باوەڕ بکەن ک عیسا وە پێان وەت: "چشتێگ ئڕەێ خواردن لە ئێرە دیرین؟"
[42] ئەوانیش چەپاڵێگ ماهی برشیاێ ئڕاێ هاوردن.
[43] ئەۊیش لە وەر دەمێان هەڵگرت و خواردەێ.
[44] ئمجا وە پێان وەت: "یانە قسەگان م بین ک وەختێگ هێمان وە گەرددانا بۊم ئڕادان وەتم ک کول چشتێگ ک لە باوەت م لە تەورات مووسا و زەبوور و کتاوەیل ئەو دۊاێ پەێقەمەرەیل نۊسیاس باێە وە واقعیەت بڕەسێدن."
[45] ئێکە ئمجا زەێنێان واز کرد تا لە نووسراوەێ پیرۆز بڕەسنەو
[46] و وە پێان وەت: "ئێ چۊنەو نۊسریاس؛ ک مەسیح باێە عەزاو مەرگ بکیشێدن و لە ڕووژ سێهم لە مردنا هەڵسێدن
[47] و یە ک تەوبە و بەخشیان گونایل گشت نەتەوەیل وە ئسم عیسا جاڕ بکیشیەێدن، هەر لە ئورشەلیما دەس وە پێ بکەێدن.
[48] ئێوە شات ئێ چشتەیلەینە
[49] و بزانن، م قەوڵەگەێ باوگم ئڕادان کل کەم. سە هەر لەێرە لە ناو شار بمینیەن تا وە هازێگ لە ئاسمانا خڵات بکریەین."
[50] ئێکە کەفتەو نواێان ورەو دەیشت تا وە نزیکەیل بەێت عەنیا، لەورە دەس کردەو بان و برەکەت دا وە پێان.
[51] لەێ بەێنە ک لە پسا برەکەت دا وە پێان، لە لێان جیاوا بۊ و چێ ورەو ئاسمان.
[52] ئەوانیش پشت ئڕاێ چەمانن و وە دڵخوەشی گەوراێگەو هاتنەو وە ئورشەلیم
[53] و لەوەولا هەمۊشە لە پەرەستگا بۊن و ستاێش خودا کردن.