[1] لە ئەو سەردەمە، سزار ئۆگۆستۆس فەرمان دا تا تمام مەردمان ئمپراتووری ڕووم سەرشماری بکریەن.
[2] یە یەکمین سەرشماری بۊ، لە سەردەمێگ ک کیرینیووس حاکم سووریەۊ.
[3] ئڕا ناو نۊسان، هەرکەسێگ چێەو وە شار و مڵک ئابا و ئەژدادی خوەێ.
[4] ئمجا یووسف، ک لە نەوادەیل داوت پەێقەمەر بۊ، باێە بچیاتادنەو وە بەێت لەحم یەهوودیە، شار داوت. سە لە ناسریەێ جەلیلیەوە چێ ئڕا ئەورە.
[5] یووسف ئەول مەریەما، ک دەزۊرانێ بۊ و ئلان دی زگێ گەوراوا بۊدن، چێ ئڕا ناو نۊسان.
[6] لە ئێ بەێنە ک ئەوان لە ئەورە بۊن، وادەێ پێا بۊن مناڵەگەێ هاتەو جێ.
[7] ئەۊیش کوڕ نووزگەێ خوەێ هاوردە دنیا و لە کوڵپێچنەکێگ پێچانەێ و نادەێ لە ناو ئاخوڕێگ، چۊن لە کاروانسەراگە هیچ وتاقێگ ئڕاێان نەۊدن.
[8] لە ئەو دەورگردە شوانەیلێگ بۊن، ک ئەو شەوە شەووریاێ ڕیەنەگانێان کردن.
[9] وە یەێهەو فرێشتەێگ لە لاێ خوداوەنەو وە پێان نازڵ بۊ، شەوکەت خوداوەن گرتەێان لە وەر و چرچ گەوراێگ چێ لە گیانێان.
[10] فرێشتەگە وە پێان وەت: "ڕخدان نەچوودن، بزانن ک مزگانی خوەشێگ ئڕادان هاوردمە ک ئڕا خوەشی گشت مەردمانە.
[11] ئمڕوو لە شار داوت پەێقەمەر نجاتدەرێگ ئڕادان پێا بۊە، ئەۊیش مەسیحە، ک خوەێ هەر ئەو مەولاێ خاوەن شکۆهەسە.
[12] کلگ وەو نیشانە، ک مناڵێگ لە توو کوڵپێچنەکێگ دۊنین ک لە ناو ئاخوڕێگ دانریاس."
[13] وە یەێهەو جەرخەێ گەوراێگ لە سەربازەیل ئاسمانی دیار دان و ئەول فرێشتەگەێا زکر خودا کردن:
[14] "ستاێش ئڕا خوداس لە ئەرش ئاڵا، ئاشتی لە زەۊ ئڕا ئەوانە ک خوداوەن لە لێان ڕازیە."
[15] وەختێگ فرێشتەگان لەێ نوو چێنەو وە ئاسمان، شوانەگان وە یەکترەکی وەتن، "بان تا بچیمن وە بەێت لەحم، تا ئێ هەڵکەفتە ک تەتیاس و ئێ پەێقامە ک خودا وە پیمان نیشان داگە بۊنیمن."
[16] ئەوانیش وە تاو هاتنەو و لەورە یووسف و مەریەم دین و ئەو مناڵە ک لە ناو ئاخوڕەگە بۊ.
[17] وەختێگ ک وە چەو خوەێان دین ئمجا باس ئەو پەێقامە ک فرێشتەگان وە پێان داۊن پەخشەو کردن.
[18] گشت ئەو مەردمانە ک ئەو حاڵ حکاێەتە لە شوانەگان ئەژنەفتن، لە تاجب سەرێان سڕ مەن.
[19] ئمان مەریەم تمام ئەو قسیەیلە وە هۊرێ مەن و داێەم لە مەوردێان فکرەو کرد.
[20] شوانەگان لەێ بەێنە ک پسا چێنەو ئڕا ناو ڕیەنەگانێان زکر خودا کردن و ئڕا ئەو چشتەیلە ک ئەژنەفتۊن و وە چەو خوەێان دۊن شکرانەوژێر گەورای خودا بۊن.
[21] لە هەیشتمین ڕووژ پێا بۊن عیسا هەناێ وەخت خەتنە کردنێ هات، ناوێ نریا عیسا. ئێ ناوە لە زوانی فرێشتەێ خوداوە ئڕاێ دیاری کریاۊدن، تاهەێ وەرجلە یە ک داڵگێ وە پێ حامڵە بوودن.
[22] وەختێگ دەورەێ پاکیێان وە پەێ قانوون مووسا هاتەو سەر، ئەوان عیسا بردن وە ئورشەلیم تا پێشکەشێ بکەن وە خوداوەن
[23] ئەو چۊن ک لە قانوون خوداوەن نۊسریاس "کوڕێگ ک مناڵ ئەوەڵ هەر ژنێگ بوودن باێەد پێشکەشێ بکریەێدن وە خوداوەن"
[24] سە ئەوانیش ئەو قوروانیە گ وە پەێ شەریعەت خوداوەن دیاری کریاۊدن پێشکەش کردن، یانێ یا جفتێگ گەناسر یان جفتێگ وەچگە کەمووتەر.
[25] لەولاێا، هەر لە ئەو سەردەمە پیاوێگ خاس و خوداترس وە ئسم شەمعوون لە ئورشەلیم بۊ ک چەوەڕێ هاتن مەسیح نجاتدەر ئسرائیلۊ. ڕووحۆلقودووس وە دیار سەرێەو بۊ.
[26] ڕووحۆلقودووس وەحی وە پێ کردۊدن ک تا مەسیح خوداوەن وە چەو خوەد نەۊنیدن، نیەمریدن.
[27] سە ئەو ڕووژە وە دڵاڵەت ڕووحۆلقودووس هاتۊدن وە پەرەستگا. لەێ ئانە وەختێگ یووسف و مەریەم، عیسا ک هێمان مناڵێگ بۊ، هاوردن تا وە ڕەسم شەریعەت پێشکەشی بکەن،
[28] شەمعوون لە ئەورە بۊ، عیسا گرت وە باوش خوەێەو و نووڕس وە دەمچەوێ و زکر خودا کرد و وەت:
[29] "هەێ خوداێ بان دەس، جا با پەێ وادەکرد خوەد، ئێ خوڵامدە لە سەکامەتی بمرێدن.
[30] نجاتەگەێ ت دیمە دی وە چەوەیل خوەم
[31] ک ت ئڕا گشت مەردماند وە ئاراوە هاوردید.
[32] نۊرێگ ئڕەێ ڕووژنای هۊرشەێ تمام ئوومەتەیل و ماێەێ شانازی مەردماند، بەنی ئسرائیل."
[33] داڵگ و باوگ عیسا سەرسام مەنن لە ئەو قسیەیلە ک لە باوەت عیسا وەتیا.
[34] ئێکە شەمعوون بەرەکەت دا وە پێان و وە مەریەم داڵگێ وەت، "بزان ک ئێ مناڵە بوودن وە ماێەێ ڕمیان و سەر هێز دان کەسان فرەێگ لە بەنی ئسرائیل. ئەێزەن بوودن وە نیشانەێگ ک ئەولێا دژاێەتی کریەێدن.
[35] سە زات نادیاری دڵ فرە کەس کەفێدن ئەو دەیشت، هەروها شمشێرێگ گیان تنیش پاچنێد."
[36] ژنێگ پەێقەمەر بۊ، ئسمێ ئانا، دۊەت فانوئل لە تاێفەێ ئاشێر. گەوراساڵ بۊ. هەفت ساڵ پاش شۊ کردنێ وە ئازەوێەری، ئەول پیاوەگەێا ژیەێدن.
[37] لەوەولا تا وە ئلان ک هەیشتا و چوار ساڵێ بۊ هەر وە بیوە مەنۊدنەێ و لە ناو پەرەستگا بۊدن و هیچ وەخت ئەو دەیشت نەچۊدن، یەێ دەنە مەخشووڵ ڕووژێ گرتن و عەبادەت خودا بۊە.
[38] لەێ بەێنە ک شەمعوون پسا ئەول مەریەم و یووسفا قسیە کەێدن، ئەۊیش تیەێدن وە لاێان و دەس کەێدن وە زکر خودا کردن و ئێکە باس ئەو مناڵە ئڕا گشتێ ئەوانە ک چەوەنووڕ ئازادی ئورشەلیم بۊنە کەێدن.
[39] وەختێگ ئەوان گشتێ ڕسوومات شەریعەت خوداوەن ئڕا مناڵەگە ئەو پەرتخ تیەرن، چنەو وە وڵات خوەێان، وە ناسریەێ جەلیل.
[40] ئەو مناڵە ئازا و سڵامەت گەورا بۊ، پڕ لە حکمەت. نەزەر ڕەحمەت خودا هەمۊشە ئەولێا بۊ.
[41] باوگ و داڵگ عیسا هەر ساڵ ئڕا عەێد پەسخە چێن وە ئورشەلیم.
[42] وەختێگ عیسا بۊ وە دوانزە ساڵان، وە ڕەسم جاران لە وادەێ پەسخە چێن ئڕا ئەورە.
[43] بادەز جەژن، ئەوان کەفن وە ڕێا تا بچنەو وە ناسریە، ئمان عیسا لە ئورشەلیم مینێدن وە جێ. باوگ و داڵگێ ئەوەڵ نیەڕەسنەو.
[44] فکر کردن، خوو ها لەێ ناو کاروانە ئڕەێ خوەێ. چەن ڕووژێگ پێ چێ، وەختێگ دین نیەسەێ، ئمجا دەس کردن وە منەی کردنێ لە لاێ قەوم و ئاشنایل.
[45] وەختێگ لە ئەورە نەینەوەێ، پلیانەو ورەو ئورشەلیم تا لە ئەورە لە شوونێ بگەردن.
[46] دۊاێ سێ ڕووژ لە ناو پەرەستگا دینەوەێ، نیشتێە لە ناوهەێن ئاخونەیل و گووش لە لێان تەکنێدن و سئاڵ لە لێان پرسێدن.
[47] تمام ئەو مەردمانە ک گووش لە لێ تەکانن، لە ئەوڕەسین و ئەێزەن جواوەگانێ تاجب مەنن.
[48] وەختێگ مەریەم و یووسف لە ئەورە دینەێ، سەرسام مەنن. مەریەم وە پێ وەت: "کوڕم، یە ئڕا لەوا وە پیمان کردید؟ من و باوگد لەوبە لە تڵەود گەردیمنە شێت بۊمنە!"
[49] ئەۊیش لە جواوێان وەت: "ئڕا لە شوونم گەردین؟ مەگەر نەزانسین باێە لە ماڵ باوگم بووم!"
[50] ئمان ئەوان لە ماناێ ئەو جواوێە نەڕەسینەو.
[51] ئێکە ئمجا ئەول ئەوانا هاتەو ئڕا ناسریە و دی وە قەوڵێان کرد. داڵگێ تمام ئێ هەڵکەفتەیل و قسیەیلە لە سینێ هەڵچان.
[52] عیسا ڕووژ وە ڕووژ لە زانێاری و باڵا و ئەێزەن لە ڕەزامەندی خوداوەن و لە ناو مەردمان لە ترەختی بۊ.