[1] یەێ ڕووژ، هەناێ عیسا لە ناو پەرەستگا مەخشووڵ ئامووژگاری مەردمان بۊ و کەلیمەێ خودا کرد، کاهنەیل گەورا و ئاخونەیل شەریعەت وە گەرد کەێخودایلا هاتن
[2] و وە پێ وەتن: "بۊش بزانیم، وە ئجازەێ کی ئێ کارەیلە کەیدن؟ کی ئێ دەسڵاتە داێە وە پید؟"
[3] عیسایش لە جواوێان وەت: "منیش توام پرسێارێگ لە لیدان بکەم: وە پیم بۊشن بزانم،
[4] قوسڵ دان مەردم وە دەس یەحیا، لە ئاسمانەو هاتۊدن یا فکرێگ لە بنەچەک ئاێەمانە بۊ؟"
[5] ئەوانیش لە ناو خوەێان لە سەرێ باس کردن و وە یەکترەکی وەتن: "ئەگەر بۊشیمن 'لە ئاسمانەو'، ئمجا ئەۊ ئۊشێد: 'سە ئڕا وە پێ باوەڕ نەکردین؟'
[6] ئەگەر بایمن بۊشیمن 'لە تەرەف ئاێەمەو'، مەردمان کوچگ وارانمان کەن، چۊن ئەوان وە یەقین زانن ک یەحیا پەێقەمەرە."
[7] سە ئەوان لە جواو وەتن ک ئەوان نیەزانن لە تەرەف کامێانەو بۊە.
[8] ئێکە عیسا وە پێان وەت: "سە منیش وە پیدان نیەۊشم، وە چ دەسڵاتێگەو ئێ کارەیلە کەم."
[9] ئمجا عیسا دەس کرد وە هاوردن ئێ مەسڵەتە ئڕەێ مەردمەگە: "باوەمەردێگ باخ ئەنگۊرێگ نا و داێەێ ئەو دەس چەن باخەوان و خوەێ چێ وە وڵات ترەک ئڕەێ ماوەێ دۊر و دریژێگ.
[10] لە فەسڵ ئەوچنین ئەنگۊر، بەردەێگ کل کرد وە لاێ باخەوانەگان تا بەش خوەێ لە ئەنگۊرەگە ئڕاێ کل بکەن، ئمان ئەوان ڕشیان وە ملێا و وە دەس پەتی کلێ کردنەو.
[11] ئێکە خاوەن باخ بەردەێ ترەک کل کرد. ئەوان ڕشیان وە مل ئەو بەردەیشا و نەخاس وە پێ وەتن و وە دەس پەتی کلێ کردنەو.
[12] سێهمین بەردەیش کل کرد، زەخمی ئەۊیش کردن و خسنەێ ئەو دەیشت.
[13] ئمجا خاوەن باخ وەت، 'باێە چوە بکەم، جما؟ کوڕ نازارم کل کەم، شاێەد ئترام یەۊ گرتن.'
[14] ئمان وەختێگ باخەوانەیل کوڕەێ دین، ئەول یەکترەکیا وەتن: 'یە وارسەگەێە، با تا بکوشیمنەێ، تا دی ئێ میراتە ئڕەێ خوەمان بمینێدنەو.'
[15] سە لە باخەگە خسنەێ ئەو دەیشت و کوشتنەێ. جا ئلان خاوەن باخ باێە چوە ئەولێانا بکەێدن؟
[16] تیەێدن و قەتڵ باخەوانەگان بڕێدنەو و باخ ئەنگۊرەگەێ دەێدن ئەو دەس باخەوانەیل ترەک." هەناێ مەردمەگە ئێ چۊنە ئەژنەفتن وەتن: "خودا نەکەێدن!"
[17] ئمان عیسا نووڕس وە پێان و وەت: "خوو ماناێ ئێ خەتە لە تەورات چوەس؛ 'ئەو کوچگە ک بەنایل فڕەێ دان ئلان بۊەس وە قەوارەێ نەفش دیوار؟'
[18] هەرکەس بکەفێدن وە مل ئەو کوچگا، شکیەێدن لە یەک و ئەو کوچگیشە وە مل هەرکەسێگا بکەفێدن، هۊرد هڕووشێ کەێدن."
[19] هەناێ ئاخونەیل شەریعەت و کاهنەیل گەورا ڕەسینەو ک عیسا ئێ مەسڵەتە لە ئەوان هاوردێە، تواسن هەر لە ئەو شوونە بگرنەێ، ئمان ڕخێان لە مەردمەگە چێ.
[20] ئمجا ئەوانیش عیسا خسن لە بێز چەو و جاسووسەیلێگ کل کردن ک خوەێان وە بێ شک وێنەێ ئاێەمەیل درسکارێگ وە عیسا نزیکەو بکەن تا لە بان قسیەگان خوەێ گیرێ بارن و بەنەێ ئەو دەس زابتەیل دارلحکوومە و ماموورەیل فەرمانڕەوا.
[21] ئمجا ئەوان لە عیسا پرسین: "مامووسا، ئیمە زانیمن ک حەق ها وە جنابدان لە چشتەیلێگ ک ئۊشین و ئامووژگاری کەین، جنابدان ئەو پشت هیچ لاێەنێگ نیەنەین، تەنیا لە ڕاسی و درسی، ڕێ خودا نیشان دەین.
[22] ئایا ڕەواس ک ئیمە باج بەیمن وە سزار یا نە؟"
[23] ئمان عیسا ک لە فیت فەنێان ڕەسۊدنەو وە پێان وەت:
[24] "دینارێگ نیشانم بێەن. ئسم و عەکس کی ها وە قەێەو؟" ئەوانیش وەتن: "هن سزار."
[25] عیسایش وە پێان وەت: "سە ئەو چشتەیلە ک هن سزارن بێەن وە سزار و ئەو چشتەیلە ک هن خودان بێەن وە خودا."
[26] سە نەتوانسن لە وەر دەم مەردمەو وە قسیەگان خوەێ بخەنەێ لە دام و گشتێ نق بڕین، چۊن سەرسام مەنۊن لە ئەو جواوە ک عیسا وە پێان داۊدن.
[27] ئێکە چەن نەفەرێگ لە سەدووقیەیل هاتن وە لاێ عیسا. سەدووقیەیل ئۊشن قێامەتێگ وجوود نەێرێدن
[28] ئەوانیش لە عیسا پرسین: "مامووسا، مووسا ئڕامان نۊساس ئەگەر کەسێگ براگەێ وە وجاخ کوور مرد و ژنەگەێ وە جێ مەن، باێە بیوەێ براگەێ بخوازێدن و مناڵەگانێ ئڕا براگەێ گەورا بکەێدن.
[29] سە برا، هەفت گلە برا بۊن، یەکمینەێان ژن خوازی و وە وجاخ کوور مرد.
[30] دووهمین براگە ژنەێ خوازی و ئەۊیش وە وجاخ کوور مرد
[31] ئێکە سێهمین براگە ژنە خوازی و هەر وەێ شێوە تا ڕەسی وە براێ هەفتمین گشتێ وە وجاخ کوور مردن.
[32] دەس ئاخر ژنەیش مرد،
[33] جا لە قێامەت ئێ ژنە هن کامێانە؟ خوو ئەۊ شۊ کردێە وە هەر هەفتێان."
[34] عیسا وە پێان وەت: "مەردمان ئێ دنیا ژن خوازن و شۊ کەن،
[35] ئمان ئەوانە ک لێاقەت ڕەسین وە ئەو دنیا و زینێەو بۊن دێرن نە ژن خوازن و نە شۊ کەن،
[36] تاهەێ لە ئەورە دی نیەمرن، ئڕا یە ک دی وێنەێ فرێشتەیلن و ئەوڵاد خودان، چۊن ئەوڵاد قێامەتن.
[37] "یەیشە ک مردێەیل زینێەو بوون خود مووسا ڕووشنێەو کەێدن، لە ڕاوهات بنجگەگە، لە ئەورە ک لە خوداوەن وە عنوان خوداێ ئبراهەم، خوداێ ئسحاق و خوداێ یاقووب باس کەێدن.
[38] ئێ خودا، خوداێ مردێەیل نیە، خوداێ زینێەیلە، چۊن لە لاێ ئەۊ ئەوان گشتێان زینێن."
[39] ئمجا بڕێگ لە ئاخونەیل شەریعەت وەتن: "مامووسا، جواو خاسێگ دایدن."
[40] چۊن ئەوان دی جرئەت نەکردن پرسێار ترەک لە لێ بپرسن.
[41] ئێکە عیسا وە پێان وەت: "خوو چۊن ئۊشن مەسیح کوڕ داوتە؟
[42] چۊن داوت خوەێ لە کتاو زەبوور ئۊشێد: خوداوەن وە مەولاێ خاوەن شکۆهم وەت: 'بنیش ئەو دەس ڕاسم
[43] تا وەختێگ دژمنەیلد بخەم لە خاک پاد.'
[44] یەسە داوت وە پێ ئۊشێدن مەولاێ خاوەن شکۆ، سە چۊ توانێد کوڕێ بوودن؟"
[45] لە وەر دەم گشت مەردمەگەوە عیسا وە شاگردەگانێ وەت:
[46] "هۊردان وە ئاخونەیل شەریعەتەو بوودن، جماعەتێگ ک خوەشێان تیەێد ئاباێ شووڕ لە وەر، وەێ ناوا خڕ بخوەن. گەز گەز باڵا کەن ئڕا یە ک لەێ ناو بازاڕە وە ئترامەو ئەولێانا حەواڵپرسی بکریەێدن و خوازن لە کەنێشت و لە میوانیەیل لە ڕەدیف یەکم بنیشن.
[47] ماڵ بیوەژنەیل خوەن و ئڕەێ نمایش دان خوەێان دوایل دریژ دریژ خوەنن. یانە مکافات گەورەتر کیشن."