[1] عیسا پشت سەر یە، ک قسیەگانێ ئڕا ئەو مەردمە ئەو پەرتخ برد، چێ وە کەفەرناحووم.
[2] لە ئەورە ئەفسەر ڕوومیێگ بۊ، ک بەردەێگ داشت، ک فرە وە قەێرێ زانس. ئمان بەردەگەێ بیمارحاڵ و لە نەز گیان کەنین بۊ.
[3] وەختێگ ئەفسەرەگە لە هاتن عیسا خەوەردارەو بۊ، بڕێگ لە کەێخودایل یەهوود کل کرد وە لاێ عیسا، تا لێ بخوازن، باێدن و شەفاێ بەردەگەێ بێەێدن.
[4] هەناێ ئەوان هاتن وە لاێ عیسا، لاڵکیان لە لێ و وەتن: "لێاقەت یە دێرێدن، ک ت ئێ کارە ئڕاێ بکەیدن
[5] چۊن ئەۊ خاتر مەردم خوەمان فرە تواێدن، تاهەێ کەنێشتێگیش ئڕامان درس کردێە."
[6] ئمجا عیسا ئەول ئەوانا چێ، ئمان وەرجلە یە ک ئەو جێ بچن، ئەفسەرەگە چەن نەفەر لە ڕەفیقەیلێ کل کرد تا لە وەرەو وە پێ بۊشن: "گەورەم، وە خوەد زامەت مەێە، چۊن م لێاقەت یە نەێرم ک ت بایدن وە ماڵم،
[7] م خوەمیش ئەێزەن لێاقەت یە نەێرم، ک وە خزمەت جنابد باتام، سە لە هەر جاێگەو ک هەیدن، کڵامێگ بفەرما تا بەردەگەم خاسەو بوودن.
[8] چۊن م خوەم ئاێەمێگم ک ژێردەسم، ئەێزەن سەربازەیلێگیش هان لە ژێر دەسم؛ وە یەکلێان ئۊشم 'بچوو!'، چوودن، وە ئەوەکە ئۊشم 'بەو!'، تیەێدن. ئەێزەن وە بەردەگەم ئۊشم 'یە بکە!'، ئەۊیش ئەو کارە کەێدن."
[9] وەختێگ عیسا ئەو پەێقامە ئەژنەفت، حەێران مەن. سەر هەڵگەردانەو ورەو ئەو جماعەتە ک لە شوونێ بۊن و وەت: "وە ڕاس وە پیدان ئۊشم، ک تاهەێ لە ئسرائیلیش چنەو ئێمانێگ نەیمە."
[10] وەختێگ ئەوانە ک وە شوون عیساوا کل کریاۊن، چێنەو وە ماڵ، دین ک بەردەگە خاسەو بۊە.
[11] کەمێگ لە ئەوە ئەو دۊا، عیسا چێ ئڕەێ شارێگ وە ناو نائین، شاگردەگانێ و جماعەت گەوراێگ ئەولێا بۊن.
[12] هەناێ ڕەسین وە دەروازەێ شارەگە، لەێ ئانە دی، ک بڕ گەوراێگ لە مەردم لە پسا تەرم تەنیا کوڕ بیوەژنێگ لەو شارە ئەو دەیشت بەن.
[13] هەناێ عیساێ خاوەن شکۆ چەوێ کەفت لە ئەو بیوەژنە، دڵێ ئڕاێ سزیا، ئمجا وە پێ وەت: "مەگیر"
[14] ئێکە هات ئەو نزیک و دەس کیشا لە دارەمەیتەگە، ئەوانە ک دارەمەیتەگە هەڵگرتۊن، وسان. عیسا وەت: "هەێ کوڕ، ئەول تنا ئۊشم، هەڵس!"
[15] مردێەگە ڕاسەو بۊ و دەس کرد وە قسیە کردن، ئمجا عیسا داگەێ ئەو دەس داڵگێ.
[16] جا هەوڵ و هراس گشتێ گرت لە وەر، گشت زکر خودا کردن و وەتن: "پەێقەمەر گەوراێگ لە ناومان سەر هێز داێە." و "خودا چەو خەێرێگ وە مەردمان خوەێا هڵاوردێە."
[17] ئێ خەوەرە لە سەرانسەر ناوچەێ یەهوودیە و دەورگردێ پەخشەو بۊ.
[18] شاگردەیل یەحیا خەوەر گشت ئێ چشتەیلە وە یەحیا ڕەسانن. یەحیایش دوان لە شاگردەگانێ وە لاێ خوەێ چڕی و
[19] کلێان کرد تا لە عیساێ خاوەن شکۆ بپرسن: "ئایا ت ئەو کەسەیدنە ک باێە باێدن، یا ئیمە باێە هێمان چەوەنووڕ یەکترەک بووسیمن؟"
[20] وەختێگ ئەوان چێن وە لاێ عیسا، وەتن: "یەحیاێ قوسڵدەر ئیمە کل کردێە وە لاێ ت، تا لە لید بپرسیم: 'ئایا ت ئەو کەسەیدنە ک باێە باێدن، یا ئیمە باێە هێمان چەوەنووڕ یەکترەک بووسیمن.'"
[21] لەو بەێنە، عیسا لە پسا فرە کەس لە مەریزی و نەخوەشی و جن خوو پاکەو کرد و ئەێزەن کوورەیل فریەێگیش بیناوا کرد.
[22] ئمجا وە شاگردەگان یەحیا وەت: "بچن و ئڕەێ یەحیا لە ئەو چشتەیلە ک دینە و ئەژنەفتینە بۊشن؛ کوور چەوەێ ڕووشناوا بوودن، شەل کەفێدن ئەو پا، گەڕوگول پاکەو بوودن، کەڕ ئەژنەوێدن، مردێ هەڵسێدن ئەو پا، مزگانی خوەش وە فەقیر و هەژار دریەێدن.
[23] خوەزێمەو هەرکەسێگ ک دڵێ لە م وە گومان نیەکەفێدن."
[24] وەختێگ کلکریاگەیل یەحیا چێنەو، ئمجا عیسا دەس کرد وە قسە کردن لە باوەت یەحیا ئڕەێ ئەو جماعەتە: "وە ئەو بیاوانە چووڵ چینە تا چ چشتێگ بۊنین؟ تەرکە قامێشێک ک وا شەکنێدەێ!
[25] ئەنۊ ئڕا دیتن چ چشتێگ چین وە ئەورە؟ کابراێگ ک دڵنگ نەرمێگ ها لە وەرێ! نە! بزانن، ئەوانە ک دڵنگ خاس لە وەر کەن و مدڵ بان ژیەن، هان لە ناو کاخەیل شاهانە.
[26] سە، ئڕا دیتن چوە چینەس وە ئەورە؟ پەێقەمەرێگ؟ ئا، م وە پیدان ئۊشم، ک یەحیا لە پەێقەمەرێگیش ئەوبانترەکە.
[27] ئەۊ کەسێگە ک لە باوەتێ نۊسیاس؛ 'بزان ک م پەێقەمەر خوەم وەرجلە ت کل کەم، کەسێگ ک ڕێگاێ ت لە وەرەو ئڕاد ئامادە بکەێدن.'
[28] وە ڕاس پیدان بۊشم، داڵگ نەزایە کەسێگ ک لە یەحیا ئەوبانترەک بوودن، ئمان وە سەر یەوە لە پاشاێەتی خوداوەن بۊچگترین کەس لە ئەۊ گەوراترەکە."
[29] گشت ئەو مەردمە ک ئێ قسیەیلە ئەژنەفتن، تاهەێ باجگرەگانیش، وە نەخشەێ خودا ئڕەێ نجات مەردمانێ ئقرار کردن، چۊن گشتێان لە سەر دەس یەحیا قوسڵ گرتۊن.
[30] ئمان فریسیەیل و ئاخونەیل شەریعەت لە ئێ نەخشە و بەرنامەێ خودا ئڕا خوەێان لام هاوردن چۊن لە گرتن قوسڵ لە دەس یەحیا هاشا کردۊن.
[31] جا وەت: "وە گەرد چ چشتێگا باێە ئێ مەردمانە هەڵسەنگنم؟ مینن وە چوە، چمانێگ؟
[32] مینن وە مناڵەیلێگ ک لە ناو بازاڕ دانیشتنە و ئەو یەکترەکی چڕن؛ 'ئڕادان دزەلە ژەنیمن، ئمان ئێوە هەڵپەڕگە نەکردین؛ موور هاوردیمن، ئێوە نەگیرسین.'
[33] ئڕەێ یە ک یەحیاێ قوسڵدەر ک هات، نە نان خوارد و نە شراو، ئمان ئێوە ئۊشین: 'مڵەێکەت ها لە گیانێ.'
[34] کوڕ ئاێەم هاتێە، وێنەێ ئەو باقی مەردم نان و ئاو خوەێدن، ئمجا ئێوە ئۊشین: 'کابراێ فرە ترخن و شراوخوەرێگە و هاودەم باجگرەیل و باقی گوناکارەیلە.'
[35] ئمان حکمەت خودائی لە لاێەن گشت مناڵەیل ئێ حکمەتەو خوەێ نیشان دەێدن."
[36] یەکێگ لە فریسیەیل لە عیسا خوازی تا ئەول یەکا نان بخوەن، عیسایش چێ وە ماڵ کابرا و نیشتەو سەر سفرە.
[37] ژن گونابارێگ لەو شارە ک ئەژنەفتۊدن، ک عیسا لە ماڵ کابراێ فریسی داواتە، نەمی ئەو بتڵ ئەڵەبەسترێگ ئەتر و
[38] چێ و لە پشت سەر عیسا وە سەر پاوا دەس کرد وە گیرسن، ئەو چۊنە ک ئرمێسێ ڕشیا وە مل پایل عیساێا و ئەۊیش وە گیس خوەێ سڕیانەو. ئێکە ئمجا ماچ بان پاێ عیسا کرد و ئەتر سای وە پێانا.
[39] وەختێگ ئەو فریسیە ک داوات عیسا کردۊدن، ئێ چۊنە دی، ئەول خوەێا وەت: "ئەگەر ئێ پیاوە پەێقەمەر بوودن، حەتمەن باێە بزانێدن، ک ئێ ژنە چجوور ژنێگە، چۊن ژن گونابارێگە."
[40] عیسا وە پێ وەت: "شەمعوون، خوازم چشتێگ وە پید بۊشم." ئەۊیش وەت: "گەورەم، بفەرما بۊش".
[41] "باوەمەرد دەوڵەمەنێگ دو گلە قەردار داشت؛ پانسەد دینار وە لاێ یەکێگەو، وە لاێ ئەوەکەوە پەنجیا دینار.
[42] وەختێگ هەردگێان نەتوانسن قەردەگان بێەنەو، باوەمەرد خاوەن قەرد قەردەگانێان بەخشا. سە ئمجا کام لە لێان باێە فرەتر مەمنوونێ بوون؟"
[43] شەمعوون جواو دا: "فکر بکەم ئەوە ک قەرد فرەترەکێگ وە لاێەو بۊە." ئمجا عیسا وە پێ وەت: "قەزاوات درسێگ کردیدن."
[44] عیسا وەر کردەو ئەو ژنە و وە شەمعوون وەت: "ئێ ژنە دۊنیدن؟ م هاتم وە ماڵ ت، ت ئاوێگ وە پیم نێایدن تا پایلم وە پێ بشوورم، ئمان ئێ ژنە پایلم وە ئرمێسێ شوورد و وە گیسێ وشکێەو کرد.
[45] ت ماچم نەکردید، ئمان لە وەختێگەو ک هامە ماڵ ت، ئێ ژنە گوڕەێگوڕ ماچ پایلم کەێدن.
[46] ت وە ڕۊن زەێتوونیش چەور سەرم نەکردیدن، ئمان ئەۊ وە ئەتر پایلم چەور کرد.
[47] سە وە پید ئۊشم؛ گونایل ئێ ژنە، وە سەر یەوە ک فرەیش بۊن، بەخشیان، وە ئێ خاترەسە ک محەبەت و دووساێەتی فرەێگ لە خوەێ نیشان دەێد. ئمان کەسێگ ک گونایل کەمترەکێگ لە لێ بوەخشیەن، محەبەت و دووساێەتی کەمترەکێگیش دێرێدن."
[48] ئمجا وە ژنەگە وەت: "گوناگاند بەخشیان."
[49] ئمان ئەو مەردمە ک لە ئەورە لە سەر ئەو داواتە بۊن لە وەر خوەێانەو وەتن: "یە دی کیە! تا ئەو تنانەتە ک گونایلیش بەخشێدن."
[50] ئمجا عیسایش وە ژنەگە وەت: "باوەڕد نجاتد دا، بچوو وە سڵامەت."