[1] فرە کەس دەس بردن ئەو نۊسان ئەو هەڵکەفتەیلە ک لە ناوهەێنمان ئەنجام دریان.
[2] هەر ئەو چۊنە ک لە کەسانەیلێگ ک خوەێان لە ئەوەڵا شاهدحاڵ حکاێەتەیل و خزمەتکار کڵام خودا بۊنە وە پیمان ڕەسیە.
[3] عالیجناب تئۆفیلۆس، وە بوونی یەوە ک م خوەم لە ئەوەڵا لە کول چشتێگ هۊردەو بۊمە، وە ئێ نەتیجە ڕەسیم تا منیش حاڵ حکاێەت کول چشتێگ وە ڕێزبەندی دەقیقێگەو ئڕاد بنۊسم،
[4] تا وە یەقین لە درس بۊن ئەو چشتەیلە ک وە پید تالیم کریانە، دڵنێا بۊدن.
[5] لە سەردەمێگ ک هرۆدۆس کەبیر حاکم یەهوودیە بۊ، کاهن یەهوودیێگ وە ناو زەکەریا لە ئەو شارە ژیا، ک خوەێ ئەندام جەرخەێ کاهنەیل ئەبیا بۊ. زەکەریا ژنێگ داشت وە ناو ئلیزابت ک پشتەڵپشت ڕەسی وە هاروون.
[6] هەردگێان لە ژێرساێ خودا موومن بۊن و لە تمام ژیانێان بێ خەڵت و خەوش گشت فەرمانەیل و حکمەیل خوداوەن وە ڕێەو بردۊن.
[7] مناڵ نێاشتن، چۊن ئلیزابت نەزووک بۊ و خوەێانیش دی سن و ساڵێگ لە لێان ئەو سەر چۊدن.
[8] یەێ دەف ک نەوبەت کەفتۊدن ئەو جەرخەگەێ زەکەریا و ئەۊیش وەکوو کاهن لە خزمەت خودا بۊ،
[9] ئمجا وە ڕەسم و عادەت کاهناێەتی، تیرپشک کەفتەو زەکەریا تا بچوودن وە بەش ناوێن پەرەستگا و ئەسپەن دەم بەێدن.
[10] لەو بەێنە ک زەکەریا لە پسا ئەسپەن سزان، جماعەت گشت لە دەیشتەو دەس وە دوا وساۊن.
[11] لە ئەورە، لە لا ڕاس قوروانگاگەوە، فرێشتەێ ماموور خوداوەن نازڵ بۊ وە پێ و لەورە وسا.
[12] وەختێگ زەکەریا چەوێ کەفت لە لێ، ترس داوڕیەێ.
[13] ئمان فرێشتەگە وە پێ وەت: "ڕخد نەچوودن زەکەریا، چۊن دواگەد ئەژنەویا، ئلیزابت ژند کوڕێگ ئڕاد تیەرێدن و تنیش ناوێ نەیدن یەحیا.
[14] ئەو مناڵە بوودن وە ماێەێ دڵخوەشی و شادکامی تن و فرە کەسانەیل تریش لە پێا بۊنێ خوەشحاڵەو بوون.
[15] چۊن ئەۊ لە چەو خوداوەندەو بوودن وە ئاێەم گەوراێگ. ئەۊ هیچ وەخت شراو و چشتێگ ک مەس ئاێەم بکەێدن نیەخوەێدن و هە وەرجلە پێا بۊنێ لە وجوود ڕووحۆلقودووس پڕ بوودن.
[16] ئەۊ مەردمان فرەێگ لە خەڵک بەنی ئسرائیل تیەرێدنەو سەر خوداوەن خوداێ خوەێان.
[17] ئەۊ وە ڕووح و تواناێ ئەلیاسەو کەفێدن ئەو نواێ خوداوەن، دڵ باوگەیل ورەو مناڵەگانێان کیشێدن و ئەێزەن دڵاڵەت یاخیەیل ورەو زانێاری درسکارەیل کەێدن تا مەردمانێگ ئامادە ئڕەێ خوداوەن حازر بکەێدن."
[18] زەکەریا وە فرێشتەگە وەت: "لە کوورەو بزانم ک لەوا بوود؟ ئاخر م خوەم پیرم و ژنەمیش سن و ساڵ فریەێگ لە لێ چێە؟!"
[19] فرێشتەگە جواوێ دا: "من جبرائیلم، هام لە خزمەت خوداوەن، کل کریامە تا ئێ مزگانیە ئڕاد بارم.
[20] ئمان ئلان وە مدوو یە ک ت وە قسیەگانم باوەڕ نەکردید، لە ئلانا لاڵ بۊدن و دی نیەتوانیدن قسیە بکەێدن تا ئەو ڕووژە ک ئێ چشتەیلە گشتێ لە وادەێ خوەێان وە دی بان."
[21] لەێ بەێنە مەردمان چەوەنووڕ زەکەریا بۊن، گشتێ سەرسام مەنۊن، ک ئڕا ئەوقرە تۊل کیشا.
[22] وەختێگ دەس ئاخر هاتەو دەیشت، نەتوانس وە گەرد مەردمەگەێا قسیە بکەێدن. لەوەولا مەردمان ڕەسینەو، ک لە ناو پەرەستگاگە جڵوەێگ ئڕاێ ئەو دەیشت کەفتێە، چۊن وە حرەکەت دەس و دەم چشتەیلێگ ئڕاێان وەت.
[23] وەختێگ ک زەمان خزمەت کردنێ لە پەرەستگا تمام بۊ، چێەو وە ماڵ خوەێ.
[24] دۊاێ ئەو ڕووژەیلە ئلیزابت ژنێ زگێ پڕ بۊ. پەنج مانگ ئازێار خوەێ لە ماڵ ئەو دەیشت نێا. ئەۊ وەت:
[25] "یە ئەو چشتەسە ک خوداوەن ئڕام کردێە، ک ڕەحمێ وە حاڵم هات و ئێ تانەێ بان شانمە لە ناو خەڵک لاورد."
[26] وەختێگ زگ ئلیزابت شەشمانگان بۊ، خودا فرێشتەێ جبرائیل کل کرد وە ناسریە، شارێگ لە ناوچەێ جەلیل،
[27] وە لاێ دۊەت ئازەوێگ وە ناو مەریەم، ک دەزۊران پیاوێگ وە ئسم یووسف لە بنەماڵەێ داوت نەبی بۊ.
[28] جبرائیل هات وە لاێ مەریەم و وە پێ وەت: "سڵام، هەێ عەزیزکەردەێ خودا! خوداوەن ها ئەولدا."
[29] ئمان مەریەم خاترپەشێو بۊ و لە وەر خوەێەو فکرەو کرد، یە دی چ جوور کەێف خوەشیێگە!
[30] فرێشتەگە وە پێ وەت: "ڕخد نەچوودن، چۊن نەزەر خەێر خوداوەن ها وە پید.
[31] یەسە ت دگیانەو بۊدن و کوڕێگ تیەریدن و ناوێ نەیدن عیسا.
[32] ئەۊ وە گەورای ڕەسێدن و مەردمان وە کوڕ خوداێ بان سەر ناسنەێ. خوداوەن خودایش تەخت پاتشای داوت پەێقەمەر باپیرەلجەدێ دەێدن وە پێ.
[33] ئەۊ ئڕەێ هەمۊشە بوودن وە حاکم کوانێ بنەماڵەێ یاقووب. ئەو پاشاێەتیە هیچ وەخت وە ئاخر نیەڕەسێدن."
[34] ئمان مەریەم وە فرێشتەگە وەت: "چۊنەو چشتێگ چۊ بوودن، م دۊەت ئازەوم؟"
[35] جبرائیل لە جواوێ وەت: "ڕووحۆلقودووس وە پید نازڵ بوودن، ئمجا توانا و هاز خوداێ بان سەر گرێدنەد لە ژێرساێ خوەێ. سە ئەو مناڵیشە ک لە تنا پێا بوودن موقەدەس و پیرۆزە و هەروها وە کوڕ خودا ناسیەێدن.
[36] تا وە بەێنەت ئڕاد بۊشم، ئلانیش ئلیزابت قەومدان وە سەرانەێ پیریەو وە کوڕێگ دگیانەو بۊە، زگیشێ شەش مانگانە، کەسێگ ک ئەوسا وە پێ وەتیا نەزووک.
[37] هیچ چشتێگ ئڕا خوداوەن نەکردەنی نیە."
[38] مەریەمیش وەت: "سە ئێرنگە ک لەواسە، م هام لە خزمەت خوداوەن. بیل تا وە دی باێدن، هەرچێگ ک ت ئۊشیدن." ئمجا فرێشتەگە چێ وە ڕێەو.
[39] لە یەکێگ لە ئەو ڕووژەیلە مەریەم گورجانە چێ وە شارۆچکەێگ لە پاکۊەیل مەنتەقەێ یەهوودیە.
[40] لە ئەورە چێ وە ماڵ زەکەریا و ئەول ئلیزابتا حەواڵپرسی کرد.
[41] وختێگ ئلیزابت دەنگ حەواڵپرسی مەریەم ئەژنەفت، مناڵەگەێ زگ ئلیزابت کەفتە جم و جۊل و لەێ ئانە ئلیزابت پڕ بۊ لە ڕووحۆلقودووس.
[42] ئلیزابت وە دەنگ بەرز هاوار کرد، "ت لە ناو ژنەیل بمارکیدن و مناڵەگەێ زگدیش ها وە برەکەتەو.
[43] ئێ هەمگە شانازیە چۊ ئڕا م ڕەسی ک داڵگ مەولاێ خاوەن شکۆ باێدن وە سەردانم!
[44] ئاخر هەناێ دەنگ حەواڵپرسی ت ئەژنەفتم، مناڵەگەێ زگم لە خوەشی بزڕکیا.
[45] خوەزێمەو ئەو کەسە ک باوەڕ هاوردێە، ک ئەو چشتە ک خوداوەن وە پێ وەتێە، وە دی تیەێدن."
[46] مەریەم وەت: "گەورای خوداوەن زکر گیانمە،
[47] وە ئەو خوداێ نجاتدەرمە، ڕووحم دڵشادە
[48] ک هاوردێە ڕەحمێگ وە بۊچگانەی خزمەتکارەگەێ، لێە وەو لاوە مەردم پشتەڵپشت وە تەوەڕک ناوم تیەرن.
[49] چۊن تەنیا تواناێ عاڵەم، کردەیل گەوراێگ ئڕام کردێە، ناوێ موقەدەس و پیرۆزە.
[50] ڕەحمێ پشتەڵپشت پەێ کەسانێگە، لە لێ خەوف داشتوون.
[51] تواناێ خوەێ لە یەد قودرەتێ نیشان داێە، ئەوانە ک لە خێاڵ خوەێان مەقروور بۊن، تەرفاوەتۊن خس.
[52] زووردارەیل لە تەخت ئەو خوار کیشا، بەندەیل بۊچگ وە گەورای ڕەسان.
[53] ورسێەیل لە خەێر و برەکەت تێر کرد، دەوڵەمەنەیل وە دەس پەتی کلەو کرد.
[54] دەسمیەت بەندەیل خوەێ، بەنی ئسرائیل کردێە، تا ڕەحمێ وە هۊر بمینێد.
[55] پەێ ئەو قەوڵە ک وە باوگ و باپیرانمان، وە ئبراهەم و ئەوڵادێ ئڕەێ هەمۊشە دا."
[56] مەریەم چشتێگ نزیک وە سێ مانگ لە لاێ ئلیزابت مەن و ئمجا لەوەولا چێەو ئڕا ماڵ خوەێ.
[57] وەخت پێا بۊن مناڵەگەێ ئلیزابت هات و کوڕێگ هاورد.
[58] هەناێ هاوسایل و قەومەیلێ ئەژنەفتن ک خوداوەن چ مەرحەمەت گەوراێگ وە پێ کردێە، گشتێ دڵخوەشەو بۊن وە گەردێانا.
[59] وەختێگ بۊ وە هەیشت ڕووژان مناڵەگە، گشتێ جەمەو بۊن تا خەتنەێ بکەن، ئەوان خوازین ناوێ بنەن زەکەریا، چۊنەو باوگێ.
[60] ئمان داڵگێ وەت: "نە، باێە ناوێ بنریەێدن یەحیا."
[61] ئەوانیش وەتن: "ئمان هیچکەس لە قەوم و کارەێ ئێوە چۊنەو ناوێگ نەێرێدن."
[62] ئمجا ئەوانیش وە ئشارە لە باوگێ پرسین تا ئەۊ چوە ناوێ بنەێدن.
[63] زەکەریا لە لێان تەختەێگ تواس و لە بانێ نۊسا، "ناوێ یەحیاس"، گشتێ سەرسام مەنن.
[64] دەریدەم زەکەریا لەێ نوو زوان واز کرد و دەس کرد وە زکر خودا کردن.
[65] ترس و ڕخ گشت هاوساگان گرت لە وەر و لە تمام مەنتەقەێ پڕ لە کەش و کۊەێ یەهوودیە باس ئەو چشتەیلە بۊ وە نەقڵ مەردم.
[66] هەرکەسێگ ک ئەو باسە ئەژنەفت، لە لاێ خوەێەو فکر کرد، "ئێ مناڵە بوودن وە چوە؟" چۊن وە ڕاس دەس خوداوەن ها ئەول ئێ مناڵا.
[67] ئێکە ئمجا زەکەریاێ باوگیشێ پڕ بۊ لە ڕووحۆلقودووس و چۊنەو زکر خودا کرد:
[68] "گەورای وە زات خوداوەنا هاتێە، خوداێ ئسرائیل، چۊن مەردمان خوەێ کردێەس وە سەر و لەێ نوو سەنێەسانەو.
[69] ئەۊ نجاتدەر تواناێگ ئڕامان کل کردێە لە بنەماڵەێ داوت پەێقەمەر، خزمەتکار خوەێ.
[70] ئەو جوورە ک هە لە قەدیما، لە زوانی پەێقەمەرە پیرۆزەگان خوەێەو وەتێە.
[71] ئازاد بۊن لە دەس دژمنەیلمان و ئەوانە ک بەدێان لە لیمان تێدن.
[72] چۊنەو ک وە باوگ و باپیرەیلمان مەرحەمەت گەورا کرد وە ڕاس خوداوەن عەهد و پەێمان پیرۆز خوەێ لە هۊرەو نەورد.
[73] ئەو قەوڵ و قەسەمە ک وە ئبراهەم باپیرەلجەدمان داۊدن.
[74] ئیمە لە دەس دژمنەیلمان ئازاد کریایمن، سە ئیمە توانیمن بێ هیچ خەوف و خێاڵێگ لە خزمەت خوداوەن بۊمن.
[75] تمام ژیانمان وە پاکی و درسی لە وەر دەمێ بۊمن.
[76] ڕووڵە! تنیش بۊدن وە پەێقەمەر خوداێ بان سەر، چۊن کەفیدن ئەو نواێ خوداوەن و ڕێ ئڕەێ ئەۊ ئامادە کەێدن.
[77] تا وە مەردمانێ نیشان بەێدن چجوور وە بەخشیان گوناگانێانەو وە ئازادی بڕەسن.
[78] وە خاتر بەزێەری گەوراێ خوداس، ک چۊنەو تریفەێ خوەر شەوەکیان لە ئاسمانا ڕشیەێدن وە ملمانا.
[79] تا ئەوانە ک لە تیەریکان یا لە ساێەێ مەرگ نیشتنە، ڕووشنەو بکەێدن و پایلمان بخەێدن ئەو ڕێ ئاشتی."
[80] ئمجا مناڵەگەیش گەورا بۊ و لە هاز و تواناێ ڕووحی ترەختی کرد. یەحیا لە بیاوان ژیا تا ئەو ڕووژە ک لە ناو مەردم بەنی ئسرائیلا زهوور کرد.