[1] لەێ بەێنە، وەختێگ جماعەتێگ هزاران کەسی خڕەو بۊ، ئەو چۊنە ک پسا پاوڵاێ یەکترەکی کردن، عیسا ئەوەڵ دەس کرد وە قسیە کردن ئڕەێ شاگردەگان خوەێ: "هۊردان وە خەۊرترش فریسیەیلەو بوودن، ئەۊش دڕۊ بۊنێانە.
[2] هیچ چشت ئەوشاریاوێگ نیە ک ئەو دەیشت نەکەفێدن و هیچ ڕازێگ نیە ک بەرمەڵاوا نەودن.
[3] سە بزانن ک هەر چشتێگ ک لە تیەریکانی وەتینە، لە ڕووژنای ئەژنەویەێدن و هەر چشتێگ ک لە پشت دەرەیل بەسیاێ وەتینە، لە بان ماڵەیلەو جاڕێ کیشیەێدن.
[4] "وە پیدان بۊشم هاوکوڕەیل؛ لە ئەوانە ک لەش ئاێەم کوشن ڕخدان نەچوودن، ک لەوە فرەتر چشتێگ ئەو بان دەسێان نیەتێدن.
[5] ئمان وە پیدان ئۊشم ک ڕخدان لە کی باێەد بچوودن، ڕخدان لە ئەو کەسە بچوود ک بادەز کوشتن تواناێ یە دێرێدن ک لە دووزەخ بخەێدن. وە ڕاس ئەۊە ک باێەد ڕخدان لە لێ بچوودن.
[6] "مەگەر نیە ک پەنج گلە مەلۊچگ وە دو پەناوای فرووشن؟! تاهەێ هیچکام لە ئەو مەلۊچگەیلیشە لە هۊر خوداوە نیەچن.
[7] تا ئەورە ک تمام مۊەیل سەردانیش شماریانە. ڕخدان نەچوودن ک ئەرزش ئێوە لە ئەو مەلۊچگەیلە فرە فرەترەکە.
[8] "سە وە پیدان ئۊشم، هەرکەسێگ ک لە وەر دەم باقی مەردمان وە پیم باوەڕ بارێدن، کوڕ ئاێەمیش ئەێزەن لە وەر دیوان خودا و فرێشتەیلێ دەفا لە لێ کەێدن.
[9] ئمان هەرکەسێگ ک لە وەر دەم مەردمان لە م هاشا بکەێدن، لە وەر دیوان خودا و فرێشتەیلێ لە لێ هاشا کریەێدن.
[10] ئەێزەن هەرکەسێگ ک وە کوڕ ئاێەم قسیە بکەێدن، بەخشیەێدن، ئمان هەرکەسێگ ک کفر ڕووحۆلقودووس بکەێدن، نیەوەخشیەێدن.
[11] وەختێگ تیەرنەدان وە وەر دیوان کەنێشتەیل یا وە دیوان حاکمەیل و فەرمانڕەوایل، پەژارەێ یە نێاشتوون ک چۊن لە خوەدان دەفا بکەین یا چوە باێە بۊشین،
[12] چۊن هەر لەو ئانە ڕووحۆلقودووس خوەێ ئەو چشتە ک باێە بۊشیەێد نەێدن لە زواندان."
[13] یەکێگ لە ناو مەردمەگەێا وە عیسا وەت: "مامووسا، وە براگەم بۊش تا میراتەگەێ باوگمان ئەول منا بەش بکەێدن."
[14] ئمان عیسا وە پێ وەت: "پیاێ خاس، کی وەتێە م قازی یا بەشکەر بەێن ئێوەم!"
[15] ئێکە ئمجا وە جماعەتەگە وەت: "بنووڕن! لە وەراێوەر هەر جوور هرس دانێگ پا بێەن وە گەز، چۊن ژیان هیچکەس وە فرە بۊن دارای نیە."
[16] ئێکە ئمجا مەسڵەتێگ ئڕاێان هاورد: "پیاو دەوڵەمەنێگ زار و زەۊ نەختێگ داشت ک دەخڵ فریەێگ لە لێ وە دەس هاورد.
[17] ئمجا ئەول خوەێا فکر کرد؛ 'چوە باێە بکەم، دی شوونێگ ئڕا ئمار کردن دەخڵ نەێرم؟'
[18] ئێکە وەت: 'ئها ڕەسیمەو، ئێ ئمارەیلە ڕمنم و ئێکە لە شوونەگەێان ئمار فرە گەوراترەکێگ درس کەم و گشت دەخڵەگەم لە تێ کووەو کەم.
[19] ئمجا وە خوەم ئۊشم، 'کوڕەگە، ئەوەسە دەخڵ فرە فرەێگ ئمار کردیدە ئڕەێ ساڵێار فرەێگ. دی پاڵەو بێە، بخوە، بکیشە بان و خوەش بژی.
[20] ئمان خودا وە پێ وەت: 'گەوج هۊچ مەزان! هە ئمشەو گیاند لە لید سێنیەێد. جا ئەو چشتەیلە ک گردەو کردیدنە وە کی بڕەسێدن؟'
[21] سە ئێ چۊنەسە ئڕا ئەو کەسەیلە ک ئڕەێ خوەێان جەمەو کەن و ئمان لە لاێ خودا دەوڵەمەن نین."
[22] جا عیسا وە شاگردەگانێ وەت: "سە وەێ خاترە وە پیدان ئۊشم؛ پەژارەێ ژیان نێاشتوون. وە فکر یەوە مەچن ک چوە بخوەین، یا ئڕەێ لەشدان ک چوە لە وەر بکەین.
[23] چۊن ژیان فرە فێشترەکە لە خواردن و لەشیش لە دڵنگ.
[24] بنووڕن وە قڵایل، نە تۊەم خەن و نە درەو کەن، نە ئمار دێرن و نە کەێان، ئمان خودا ڕووزیێان دەێدن. جا ئێوە چەنێگ لە ئێ مەلەیلە باێەخدارترەکین!
[25] کام لە ئێوە وە خوسە خواردن تۊەنێدن ساتێگ وە ژیان خوەێ فرەوا بکەێدن!
[26] سە وەختێگ تواناێ کار بۊچگێگ چۊن یەیشە نەێرین، جا ئڕا خەم ئەو دۊاێ خوەین؟
[27] بنووڕن وە گوڵاڵەیل ک چ جوور هێز گرن، نە خوەێان شەکەت کەن و نە خوری ڕسن، وە پیدان بۊشم ک سڵەێمان وە سەر ئەو هەمگە شەوکەتێەو هەم چشتێگ لەواێ یانە لە وەر نەکرد.
[28] سە ئەێ کەم باوەڕەیل، وەختێگ خودا چۊنەو دڵنگێگ لە وەر گیاێگ کەێدن، ک ئمڕوو زینێە و سوو لە کوانێ خریەێدن، بزانن ئڕەێ ئێوە چوە کەێدن!
[29] سە خەم مەخوەن و دڵگران یە مەون ک چوە بخوەین،
[30] چۊن ئێ چشتەیلە تەنیا وەرواسە و فکر و خێاڵ دنیاپەرەسەیلن. باوگ ئاسمانیدانیش زانێدن ک ئێوە هەوەجەدان ها وە ئێ چشتەیلەو.
[31] سە لە جێ یانە بکەفن ئەو شوون پاشاێەتی خوداوەن گ لە ئەورە ئێ چشتەیلیشە گشت دریەێدن وە پیدان.
[32] "ڕخدان نەچوودن هەێ جماعەت بۊچگ، چۊن باوگ ئاسمانیدان وە شەوق و مەیلەو ئەو پاشاێەتیە دەێدن وە پیدان.
[33] ماڵ و دارایدان بفرووشن و بەشێ بکەن لە نەدارەیل. کیسەیلێگ ئڕا خوەدان درس بکەن ک هیچ وەخت نەداڕزیەن، گەنجێگ ئاسمانی ک لە بەێن نەچوودن، لە ئەورە ک هیچ دزێگ نیەتۊەنێدن لە لێ ئەو وەر بچوودن و هیچ مووریانەێگ نیە.
[34] چۊن لە هەر جاێگ ک گەنجەگەدان بوودن، دڵدانیش ها لە ئەورە.
[35] "داێەم دڵنگ لە وەر و گورج بوون و چراخدان بیلنا هە ڕووشن بمینێدن.
[36] لەواێ ئەوانە بوون ک چەوەنووڕ ئەوهاتن سەروەرەگەێانن، تا هەناێ لە سۊر هاتەو و تەقە دا لە دەر فلفەور دەرەگە ئڕاێ واز بکەن.
[37] خوەزێمەو چۊنەو بەردەیلێگ ک سەروەرەگەێان لە وەخت ئەوهاتن لە سۊرەو وە خەوەر دۊنێدنەێان. وە ڕاس وە پیدان بۊشم، پشت بەسێدن و کەفێدن لە خزمەتێان و ئڕا خورد و خوراک نەێدنەێان ئەو زەۊ.
[38] ئەگەر لە نیمەشەو یا دەم شەوەکی باێدن ئەو جێ و وە خەوەر بۊنێدنەێان، بێگومان کەفێدن لە خزمەتێان.
[39] "ئمان یە بزانن، ئەگەر خاوەن ماڵ بزانێد ک دزەیل لە چ سات و وەختێگ تیەن، هیچ وەخت نیەیلێدن ماڵەگەێ بووڕن.
[40] ئێوەیش باێە هەمۊشە حازر بۊن، چۊن کوڕ ئاێەم لە ساتێگ چاوەڕوان نەکریاێ تیەێدنەو."
[41] پترۆس وەت: "گەورەم، مەنزوورد لە هاوردن ئێ مەسڵەتە ئیمە بۊ یا کول کەسێگ؟"
[42] عیساێ خاوەن شکۆهیش لە جواو وەت: "ئەو زابت درسکار و زانا کیە، ک لە لاێەن سەروەرێەو بوودن وە ماسوول قوڵامەگانێ، تا لە وەخت خوەێ خواردن وە پێان بێەێدن.
[43] خوەزێمەو ئەو قوڵامە ک سەروەرەگەێ لە وەخت ئەو جێ هاتن لە حاڵ چۊنەو کار کردنێگ بۊنێدنەێ.
[44] وە ڕاس وە پیدان بۊشم، ئەۊ چۊنەو قوڵامێگ کەێدن وە ماسوول گشت مڵک و ماڵێ.
[45] ئمان ئەگەر قوڵامەگە فکر بکەێدن 'سەروەرم دێر تیەێدنەو'، سە ئمجا دەس بکەێدن وە دان لە باقی بەردە و کەنیزەگان و خواردن و شراو ئەو سەر کیشان و مەس کردن،
[46] خاوەن ئەو بەردە لە ڕووژ و ساتێگ تیەێدنەو ک ئەۊ هە چەوەنووڕێ نیە و ئمجا شەل کوتێ کەێدن و کلێ کەێدنەو وە ناو بێ باوەڕەیل.
[47] ئەو بەردە ک بزانێد ک سەروەرەگەێ چوە لە لێ خوازێدن، ئمان خوەێ ئڕا ئەو چشتە ک ئەۊ خوازیە، حازر نەکردۊدن، کوشیان خاسێگ لە لێ کریەێدن.
[48] ئمان کەسێگ ک نەزانێد و کارێگ بکەێدن ک شاێەن لە لێ دان بوودن، نەرمە کوشیانێگ لە لێ کریەێدن. لە کەسێگ ک فرە دریاس وە پێ، چشت فرەێگیش تواسیەێدن. لە هەرکەسێگ ک چشت فرەترەکێگ لە لاێ وە ئامانەت نریاس، بازخواست فرەترەکێگیش کریەێدن.
[49] "م هاتمە تا ئاگر بارم وە زەۊ و خوازێارم ک هە ئلان ئاگرێگ تێ بۊاتاد.
[50] ئمان قوسڵێگ ها لە ڕێم، چەنێگ تەنگی و ئازار دێرم تا باێدن ئەو پەرتخ.
[51] ئێوە فکر کەین ک م هاتمە تا ئاشتی بارم وە ئێ دنیا؟ باێە وە پیدان بۊشم، نە، ئمان جیاتی!
[52] لە ئلان وەو لاوە ئەگەر پەنج کەس لە ماڵێگ بوون، لە یەک جیاوا بوون، دو دژ وە سێ و سێ دژ وە دو؛
[53] باوگ لە کوڕ و کوڕ لە باوگ، داڵگ لە دۊەت و دۊەت لە داڵگ، خەسۊرە لە وەۊ و وەۊ لە خەسۊرە جیاوا بوون."
[54] ئەێزەن وە مەردمەگە وەت: "وەختێگ دۊنین ک هەورێگ لە ڕووژاواێا هێز گرێد، ئێوە فەوری ئۊشێن؛ 'تواێد واران بوارێد'، ئمجا وارێد.
[55] وەختێگ دۊنین چەپ وا لە باشوورا هەڵکەێد، ئۊشین، سام کەێد، هە لەێوایشە بوودن.
[56] هەێ ڕێاکارەیل! ئێوە توانین لە گەردش زەۊ و ئاسمان بڕەسینەو، سە ئڕا نیەتۊەنین لە ڕووزێار ئمڕوو بڕەسینەو!
[57] "ئڕا ئڕەێ خوەدان نیەتۊەنین قەزاوات بکەین، ک چوە درسە؟
[58] سە هەناێ ئەول تەرەفدانا هاین لە ڕێ تا بچین وە لاێ قازی، لە هەێن ڕێ تەقەلا بکەن تا چەق پەڵەگەدان بووڕینەو، وەگەرنە کیشنەدان وە دادگا و قازی دەێدنەدان ئەو دەس کەمەنکار و کەمەنکاریش خەێدنەدان لە بن زندان.
[59] وە پیدان ئۊشم؛ لە ئەورە ئەو دەیشت نیەتیەین تا ئاخر قورووشەگەێ نێەینەو."