[1] هەر لەو ئانە کەسانێگ لە ئەورە بۊن ک باس ئەو خەڵک جەلیلیە ئڕەێ عیسا کردن، ک پیلاتۆس خۊنێان ئەول قوروانیەگانێانا کردۊدن وە یەکا.
[2] عیسا لە لێان پرسی: "ئایا ئێوە فکر کەین ک چۊن ئەو جەلیلیەیلە لە باقی مەردمان جەلیلیە گوناکارتر بۊنە، چۊنەو عەزاوێگ کیشانە؟
[3] باێە وە پیدان بۊشم، نە! ئەگەر ئێوەیش تەوبە نەکەین، گشتێدان هەر وەو شێوازە لە ناو چین.
[4] یا ئەو هەیژدە نەفەرە ک لە ڕمیان برجەگەێ سیلوام وە ملیانا کوشیان، ئێوە فکر کەین ک ئەوان لە ئەو باقی مەردمان ئورشەلیم گونابارترەک بۊنە؟
[5] وە ڕاس وە پیدان بۊشم، نە! ئمان ئەگەر تەوبە نەکەین، ئێوەیش گشتێدان لە وێنەێ ئەوان لە ناو چین."
[6] ئێکە ئمجا ئێ مەسڵەتە ئڕاێان هاورد: "باوەمەردێگ دار ئەنجیرێگ لە ناو باخ ئەنگۊرەگەێ ناۊدن، ئێکە وەختێگ هاتەو دیارێ ئڕەێ سەمەرەگەێ، چشتێگ نەیەو.
[7] وە باخەوانەگەێ وەت: 'یە سێ ساڵ ئازێارە وە ئەزرەت ئەنجیرێگەو تیەمەو دیار ئێ دارە و هێمان هیچ لە لێ نەیمە، بووڕەێ، ئڕەێ چوە باێە لەکێگ زەۊ داوڕێد!'
[8] باخەوانەگەێ لە جواوێ وەت: 'گەورەم! با یەێ ساڵ تریش بیلیمنەێ، تا دەورێ هەڵدروومنم و سڕ بکەمە پاێ.
[9] ئەگەر ئێ ساڵ بەر گرت خوو خاس، ئەگەر نە، ئمجا بووڕەێ.'"
[10] عیسا لە ڕووژ شەمە لە کەنێشتێگ لە پسا ئامووژگاری خەڵق کرد.
[11] جا بزان چوە بۊ، ژنێگ لە ئەورەۊە، ک یە هەیژدە ساڵ بۊ ک تۊش جن خووێگ هاتۊدن و دی قووخ داۊدن و ئەسڵەن نەتوانس ڕاس بووسێدن.
[12] وەختێگ عیسا ئەو ژنە دی، چڕیەێ و وە پێ وەت: "خاتوو! لە نەخوەشیەگەد ئازاد کریاید."
[13] ئمجا عیساێ خاوەن شکۆ دەس نا ئەو بان سەرێ، گورج ڕاس هەڵسا ئەو پا و دەس کرد وە زکر خودا کردن.
[14] ئمان پێشەواێ کەنێشتەگە لە یە ک عیسا لە ڕووژ شەمە شەفا داۊدن قینێ هات و وە مەردمەگە وەت: "شەش ڕووژ هەس ک ئاێەم باێە لە تێان کار بکەێدن، لە ئەو ڕووژەیلە بان تا شەفا بگرین نە لە ڕووژ شەمە."
[15] ئمان عیسا جواوێ دا و وەت: "ئەێ دوڕۊ! ئایا ئێوە، گلە وە گلەدان، لە ڕووژ شەمە مانگا یا خەرەگاندان لە تەۊلە ئەو دەیشت نیەتیەرین تا ئاوێان بێەین!
[16] ئمان ئێ ژنە ک دۊەت ئبراهەمە و یە هەیژدە ساڵ ئازێارە شەێتان داگرتێەسەێ، نەباێە لە ڕووژ شەمە ئازاد بکریەێدن؟"
[17] وەختێگ عیسا لەوا وەت، مخاڵفەگانێ گشت خەجاڵەتەو بۊن و گشتێ مەردمەگەیش خوەشحاڵەو بۊن لە ئەو کردەیل دیاریە ک لە دەس عیسا هەڵکەفتن.
[18] ئێکە عیسا وەت: "پاشاێەتی خوداوەن منێدن وە چوە؟ و وە گەرد چ چشتێگا باێە هەڵسەنگنمەێ؟
[19] مینێدن وە دەنک خەرتەلێگ ک یەکێگ هەڵگرت و وەشانەێ وە ناو باخەگەێەو. سەونز کرد و بتەوە دا. مەلۊچگەیل ئاسمان لە ناو پەلەگانێ لانە بەسان."
[20] لەێ نوو وەت: "وە گەرد چ چشتێگا باێە پاشاێەتی خوداوەن هەڵسەنگنم؟
[21] مینێدن وە خەۊرترشێگ ک ئافرەتێگ ئەول سێ کەمووڵە ئاردا کردەێ وە یەکا تا گشتێ هڵاێدن."
[22] عیسایش لە بەێن ڕێ ورەو ئورشەلیم، یەک لە شوون یەک خڕ خوارد وە ئابادی و شارەگانەو و ئامووژگاری خەڵک کرد.
[23] کەسێگ لە لێ پرسی: "گەورەم! ئایا کەمن ئەوانە ک نجات پێا کەن؟" عیسایش لە جواوێ وەت:
[24] "هەوڵ بێەن تا لە دەرانەێ تەنگەو بچینەو ناو، وە پیدان بۊشم؛ چۊن فرە کەس زوور دەن بچنەو ناو، ئمان نیەتوانن.
[25] ئمان هەناێ خاوەن ماڵ هەڵسێد و دەرانەگە دابخەێد، ئێوە لە دەیشت وە جێ مینیەین. ئمجا تەقە دەین لە دەر و ئۊشین: 'گەورەم! دەرانەگە ئڕامان واز بکە!' ئمجا ئەۊیش لە جواودان ئۊشێد: 'م نیەناسمەدان و نیەزانم خەڵک کوورەین.'
[26] ئێکە ئێوە ئمجا ئۊشین: 'ئیمە ئەول یەکا نان و نمەکێگ داشتیمنە و ت لە ناو کۊچەیل ئامووژگاریمان کردید.'
[27] ئمان ئەۊ ئۊشێد: 'م نیەناسمەدان و نیەزانم لە کوورەوە تیەین، لیم دۊرەو کەفن گشتێدان، هەێ گەنەکارەیل!'
[28] وەختێگ وە چەوەیل داچەقیاێەو ئبراهەم و یاقووب و ئسحاق و ئەو باقی پەێقەمەرەیل لە پاشاێەتی خوداوەن دۊنین و خوەدان ئەو دەیشت خریاێ، ئمجا گیرسن و جیڕەێ دێان مینێدنەو پیدان.
[29] جا مەردمان لە ڕووژهڵات و ڕوژاواوە، لە باکوور و لە باشوورەو تیەن و لە پاشاێەتی خوداوەن ئەو سەر خوان خواردن نیشن.
[30] وە ڕاس بزانن، ئەو دۊا کەفتێەیلێگ هەن ک ئەو نوا کەفن، هەروها نوا کیشەیلێگ هەن ک کەفن ئەو دۊا."
[31] لەو ساتە چەن گلە فریسی هاتن و وە عیسا وەتن: "لە ئێرە بچوە ڕێەو، چۊن هرۆدۆس خوازێد بکوشێدنەد."
[32] ئەۊیش وە پێان وەت: "بچن و وە ئەو ڕوویە ئڕام بۊشن؛ 'یەسە م ئمڕوو و سوو مڵەێکەتەگان لە کووڵ مەردمەو کەم و ناخوەشەیل شەفا دەم و ڕووژ سێهم تیەمەو پەرتخ کارەگەم.'
[33] ئمان ئمڕوو و سوو و دسوو باێە لە ڕێ بووم، چۊن نەکردەنیە ک پەێقەمەرێگ لە دەیشت ئورشەلیم بکوشیەێدن.
[34] "ئاخ ئورشەلیم و داخ ئورشەلیم! خۊنی پەێقەمەریل و سەنگوارانکەر کلکریاگەیل! چەن جاران تواسمە مناڵەگاند گردەو بکەم، وێنەێ مامرێگ ک جۊجگەگانێ لە ژێر باڵ خوەێ جەمەو کەێدن، ئمان ئێوە نەتواسین!
[35] ئەوەسە ماڵەگەدان وە چووڵ ئڕادان وە جێ مینێد. وە پیدان بۊشم: ئێوە دی م وە چەو نیەۊنین تا ئەو وەختە ک بۊشین: 'خوزگە وەو کەسە ک لە ژێر ناو خوداوەن تیەێدن.'"