[1] جارێگ لە ڕووژ شەمەێگ عیسا ئڕا نان خواردن چێ وە ماڵ یەکێگ لە سەرکردەیل فریسیەگان. ئەوانە ک لە ئەورە بۊن خسنەێ لە بێز چەو.
[2] جا بزان چوە بۊ، لە وەر دەمێ پیاوێگ بۊ ک لەشێ ئاو هڵاوردۊدن.
[3] ئمجا عیسا لە تەوراتناسەیل و فریسیەیل پرسی: "شەفا دان مەریز لە ڕووژ شەمە حکمێ چوەس، ڕەواس یا ناڕەوا؟"
[4] ئمان ئەوان بێدەنگ مەنن. ئمجا عیسا شەفاێ باوەمەرد نەخوەش دا و ڕەدێ کرد.
[5] ئێکە وە پێان وەت: "کامدان حازرین ئەگەر لە ڕووژ شەمە مناڵ یا کەڵێاێگدان بکەفێدن لە چاڵێگ، فلفەور نەدرارینەێ؟"
[6] هیچکامێان نەتوانسن جواوێ بێەن.
[7] هەناێ دی ک باقی میوانەگان چۊ توان بنیشن ئەو لا بان مجڵس، مەسڵەتێگ ئڕاێان هاورد؛
[8] "وەختێگ وە سۊرێگ داوات کریاید، لە لا بان دیواخان مەنیش، هاتێ یەکێگ لە ت ئەوبانترەکیش لە لاێەن خاوەن سۊرەو داوات کریاۊدن.
[9] ئمجا خاوەن سۊر ک هەردگدان داوات کردێە، هاتێ باێدن و وە پید بۊشێدن: 'ئێ شوونە ئڕا ئەو کەسە خالی بکە!' سە ئمجا تنیش وە خەجاڵەتیەو تەک دەیدن ئەو خوارتر.
[10] ئمان وەختێگ داوات کریاید، بچوو و بنیش لە خوار دیواخان، تا وەختێگ ک خاوەن سۊر باێد، هاتێ وە پید بۊشێدن: 'هاوڕێ، هەڵس بنیش لەێ بانە!' ئەوسا لە وەر چەو گشتێەو ئترامدان چوودەو بان.
[11] چۊن هەرکەس ک خوەێ وە گەورا بزانێدن، بۊچگەو بوودن و هەرکەس ک خوەێ وە بۊچگ بزانێد، وە گەورای ڕەسێدن."
[12] هەروها وە ئەو کەسە ک داواتێ کردۊدن وەت: "ڕەفیقەیل و برا و خوەیشکەیل یا قەومەیل و هاوسایل دەوڵەمەن ئڕەێ خواردن نیمەڕووژە یان شام وەێ چەوەنووڕیەو داوات مەکە تا ئەوانیش داواتد بکەن و جواو میوانیەگەد بێەنەو.
[13] ئمان ئەگەر میوانیێگ ئەو ڕێ خەیدن، ئاێەمەیل هەژار و کوچ و شەل و کوور داوات بکە.
[14] سە ئمجا خوەزێەو لە لید خوازیەێدن، چۊن ئەوان نیەتوانن جواو میوانیەگەد بێەنەو، جا پاداشد لە قێامەت درسکارەیل دریەێدن."
[15] یەکێگ لە میوانەگان وەختێگ ئەو قسیە ئەژنەفت، وەت: "خوەزێمەو ئەو کەسە ک چەپاڵێگ نان لە پاشاێەتی خوداوەن خوەێدن."
[16] ئمجا عیسا وە پێ وەت: "کابراێگ شام فرەێگ درس کرد و مەردمان فرەێگیش داوات کرد.
[17] وەخت نان خواردن بەردەگەێ کل کرد تا وە داوات کریاڵان بۊشێدن: 'بان، کول چشتێگ ئامادەس.'
[18] ئمان گشتێ وە یەکەو دەس کردن وە ئزر خوازین. یەکمینەێان وەت: 'م لەکێگ زەۊ سەنمە، باێە بچم سەرێگ بکیشم ئەو دیارێ، ئزرم وە ڕەوا هەڵگرن.'
[19] ئەوەکە وەت: 'پەنج جفت گاێ جفت سەنمە، باێە بچم ئمتەحانێان بکەم، ئزرم وە ڕەوا بزانن.'
[20] یەکتر لە لێان وەت: 'وەێ تازە ژن خوازیمە و نیەتوانم بام.'
[21] جا بەردەگە هاتەو و گشتێ ئڕاێ ئەرواوەگەێ وەت. خاوەن ماڵیش عەسەبانی بۊ و وە بەردەگە وەت: 'فلفەور بچوو وە خێاوانەیل و کۊچەیل شار و گشتێ ئاێەمەیل هەژار و شەل و کوچ و کوور بار وە ماڵ.'
[22] بەردەگەیش وەت: 'گەورەم! فەرماندان وە ئەنجام ڕەسی و هێمانیش جا دێریمن.'
[23] ئێکە ئەرواو وە بەردەگە وەت: 'بچوو وە کوورەڕێەیل و جادەیل دەیشت و خوڵک مەردمان بکە، تا ماڵەگەم پڕ بوودن.
[24] تا ئراد بۊشم، هیچکام لە ئەوانە ک داوات کریاۊن تام ئێ شامە ئەو بان زوانێان نیەچوودن.'"
[25] مەردمان فرەێگ ئەول عیساێا هاوڕێ بۊن، ئمجا ئەۊیش هەڵگەردیاوا و وە پێان وەت:
[26] "هەرکەس ورەو م تیەێدن، باێە لە داڵگ و باوگ و ژن و مناڵ و برا و خوەیشک و تاهەێ لە ژیان خوەێیش واز بارێدن، وەگەرنە نیەتۊەنێدن وە شاگرد م بوودن.
[27] ئەو کەسە گ سەلیب خوەێ وە کووڵەو نەڵگرێدن و ئەو شوون م نەکەفێدن، نیەتوانێدن وە شاگرد م بوودن.
[28] کام لە ئێوە ک بخوازێد برجێگ بسازێد، ئەول ئەوەڵا نیەنیشێدنە حساو کتاو کردن تا بزانێد ک بەش ئەو پەرتخ هاوردنێ دێرێدن یان نە؟
[29] نەخواێ بنچینە و بنەواێ دانەێدن و نەتوانێدن تمامێ بکەێدن، تا ئمجا خەڵکان وە دەورەو تۊلەکی وە پێ بکەن
[30] و بۊشن: 'کابرا بنیاێ نا و نەتوانس بارێدنەێ ئەو پەرتخ.'
[31] یا کام پادشاس ک وەختێگ ک بتواێدن بچوودن وە جەنگ یەێ پادشاێ تر، ئەوەڵ نەنیشێدن و هۊردەو نەودن لە یە گ بزانێد، تواناێ یە دێرێدن تا وە دا هزار لەشکەرەو وەرەقەت ئەوە ک وە بیس هزارەو تیەێدن وە جەنگێ، بگرێد.
[32] وەگەرنە تا هێمان ئەو پادشاگە ئەو نزیک ناتێە، کەسانێگ کل کەێدن وە لاێ و داواێ ئاشتی کەێدن.
[33] سە هیچکام لە ئێوەیش نیەتۊەنین بۊن وە شاگرد م، ئەگەر لە کول چشتێگدان واز نارین."
[34] "خوا خاسە، ئمان ئەگەر خوا سووریەگەێ لە دەس بەێدن، وە چوە باێە سوورێەو بکریەێدن؟
[35] سە دی نە وە دەرد زەۊ خوەێدن، نە بوود وێنەێ سڕ بکریەێد وە کووت زەۊ، ئمان باێە فڕەێ بێریەێدن. تا ئەژنەوێدن هەرکە گووش ئەژنەوا دێرێدن."