[1] یەێ ڕووژ، وەختێگ عیسا لە کنار دەریاێ جەنیسارات وساۊدن، مەردمان دڵەک یەکترەکی دان تا گووش لە کەلیمەێ خودا بتەکنن.
[2] دو گلە قایق لە کنار دەریاگە دی ک ماسیگرەگان لە تێان هاتۊنەو دەیشت تا تووڕەگانێان بشوورن.
[3] ئمجا عیسا چێ ئەو ناو یەکێگ لە ئەو دو قایقە ک هن شەمعوون بۊ و وە پێ وەت کەمێگ لە کنار ئاوەگە دۊرێەو بخەێدن. ئمجا لە ناو قایقەگە نیشت و ئامووژگاری مەردمەگە کرد.
[4] بادەز قسیەگانێ وە شەمعوون وەت: "قایقەگەد بووە وە قۊلی ئاوەگە و تووڕەگەد ئڕەێ ماسی گرتن بخە لە ئاو".
[5] شەمعوون لە جواوێ وەت، "گەورەم، وە دریژان شەوار فرە هەوڵ دایمن، ئمان چشتێگ نەتۊەنسیمن بگریمن. ئمان ئلان وە قەوڵ ت کەم و لەێنوو تووڕەگەم خەم لە ئاو."
[6] وەختێگ تووڕ خس لە ئاو، لە بەونی ماسی گرتن، چۊنە فرە ک چشتێگ نەمەنۊدن ک تووڕەگان بدڕن.
[7] ئمجا ئشارە دان لە هاوماسیگرەیلێان ک لە ناو قایق ترەک بۊن تا بان ئەو میەتێان، هەر دو قایقەگە پڕ کردن، ئەو چۊنە ک چشتێگ نەمەن قایقەگان قەرق بوون.
[8] هەناێ شەمعوون پترۆس ئێ مەوجزە وە عیسا دی، خوەێ خس لە خاک پاێ و وەت: "گەورەم، لە م دۊرەو بکەف، چۊن م ئاێەم گوناکارێگم."
[9] پترۆس و ئەو کەسانە ک لە ئەورە بۊن لە فرەی ئەو هەمگە ماسیە ک گرتۊن حەێران مەنۊن،
[10] ئەێزەن یاقووب و یووهەنا، کوڕەیل زبدی ک شیەریک شەمعوون بۊن، ئەوانیش حەێران مەنن. عیسا وە شەمعوون وەت: "بێ خەم بوو! لە ئمڕوو وەو لاوە ت دی ڕاوچی ئاێەمیدن."
[11] ئمجا بادەز یە ک قایقەگانێان هاوردنەو وە کنار ئاوەگە، گشتێ هیشتنە جێ و کەفتن ئەو شوون عیسا.
[12] یەێ جا، لە کارەگان ڕووزێار، لە شارێگ عیسا تەقیا وە پیاوێگا ک مەریزی گول تمام لەشێ داوڕۊدن. هەناێ ئەو پیاوە عیسا دی، ساێ سەر ئەو خوار پشت ئڕاێ چەمان و لاڵکیا لە عیسا و وەت: "گەورەم، ئەگەر ت بتوایدن، توانیدن پاکمەو بکەێدن."
[13] عیسایش دەسێ دڕا کرد و دەس سای لە گیانێ و وەت: "توام، پاکەو بوو!" دەریدەم گول لە گیانێ بڕیا.
[14] ئێکە عیسا وە جەخت وە پێ وەت: "بچوو خوەد نیشان کاهنەگە بێە و ئەو قوروانیە ک مووسا وەتێە پێشکەش بکە تا بوون وە شات شەفا گرتند."
[15] ئلان وە ئێ کارەیلەو، ناوبانگ کردەیل عیسا فرەتر پەخشەو بۊ و مەردمان فێشترەکێگ لە دەورێ گردەو بۊن تا کڵامێ ئەژنەون و لە دەسێ شەفا بگرن.
[16] ئمان عیسا هەمۊشە ئڕەێ دوا کردن خوەێ دا ئەو خەڵوەتی و لە مەردمان دۊرەو کەفت.
[17] یەێ ڕووژ وەختێگ عیسا لە پسا ئڕا مەردمان کەلیمەێ خودا کرد، بڕێگ لە فریسیەیل و تەوراتناسەیل (ک لە دۊر و نزیک وڵات جەلیلیە و یەهوودیە و ئورشەلیمەو لە دەور یەک گردەو بۊن) لە نزیکێان نیشتۊن. هاز و تواناێ خوداوەن ئڕا شەفا دان لە خزمەت عیسا بۊ.
[18] جا بنووڕ، چەن نەفەر ئاێەمێگ لە دەس و پا کوچ وە بان دووشەکێگەو هاوردن و خوازین بوەنەێ ئەو نزیک وە لاێ عیسا.
[19] ئمان وە خاتر شلخی نەتوانسن بچنەو ناو. سە چێن ئەو بان ئەو شوونە ک عیسا لە تێ بۊ و سفاڵەگان سەقفەگەێ دانەو و پیاو کوچەگە وە دووشەکەگەێەو وە ڕەسنەو لە بانا دڕا کردن ئڕا وەر دەس عیسا لە ناوڕاس مەردمەگە.
[20] وەختێگ عیسا چۊنەو باوەڕێگ لەو ئاێەمەیلە دی، وە ئەفلیجەگە وەت: "کوڕەگە، گونایلد بەخشیان."
[21] ئاخونەیل شەریعەت و فریسیەگان لە ناو خوەێانەو وەتن: "یە فکر کەێدن کیە! یە کفرە! تەنیا خوداس ک توانێدن گونایل بوەخشێدن."
[22] عیسا ک لە خەێو زانس ئەوان وە چوە فکر کەن لە لێان پرسی: "ئڕا لە وەر خوەدانەو لەێوا فکر کەین؟
[23] کامێان ئاسانترەکە بۊشیەێدن؛ 'گوناگاند بەخشیان'، یا یە ک بۊشیەێدن 'هەڵس ئەو پا و بچوو'؟"
[24] ئێکە ئمجا وە ئەفلیجەگە وەت: "ئمان ئڕا یە ک وە پید بپووڕیەێدن ک کوڕ ئاێەم لە ئێ دنیا تواناێ بەخشان گونایل ئاێەمەیل دێرێدن وە پید ئۊشم: 'هەڵس ئەو پاد، دووشەکەگەد جەم بکە و بچوورەو ئڕا ماڵ.'"
[25] ئەۊیش فلفەور لە وەر چەو تمام مەردمەو هەڵسا ئەو پا و دووشەکەگەێ گردەو کرد و کەفتە ڕێا ورەو ماڵ و هە زکر خودا کرد.
[26] مەردمان ک گشت سەرسام بۊن و ترس داوڕۊدنەێان زکر خودا وە جێ هاوردن و وەتن: "ئمڕوو چشتەیلێگ دیمن ک حەێران مەنیمن."
[27] پشت سەر ئەوە، عیسا لە ئەورە چێ، باجگرێگ وە ناو لڤی دی ک لە شوون باج سەننەگەێ نیشتێە. وە پێ وەت: "بەو بکەفەو شوون م."
[28] لڤی هەڵسا ئەو پا، کول چشتێگ وە جێ هیشت و کەفت ئەو شوون عیسا.
[29] لەوەولا لڤی لە ماڵ خوەێ میوانیێگ ئڕا عیسا گرت، لە ئەو میوانیە قەێر فرەێگ لە باجگرەیل و ئەێزەن میوانەیل ترەکیش لە لاێان مرکەو داۊن و وە یەکەو چشت خواردن.
[30] ئمان فریسیەیل و ئاخونەیل شەریعەت دەس کردن وە ئتراز و وە شاگردەگانێ وەتن: "ئڕەێ چوە ئەول باجگرەیل و باقی گوناکارەیلا چشت خوەین؟"
[31] عیسایش لە جواوێان وەت: "کەسانێگ ک لەشێان ساق و ئازاس حەکیم نیەتوان، ئمان مەریزەیل توان.
[32] م هاتمە تا گوناکارەیل داوات وە تەوبە کردن بکەم نە درسکارەیل."
[33] ئێکە لەێ نوو وە عیسا وەتن: "شاگردەیل یەحیاێ قوسڵدەر لەواێ فریسیەگان لە بەونی ڕووژێ گرن و دوا کەن. جا ئڕا شاگردەگان ت ڕووژێ نیەگرن؟"
[34] عیسایش وە پێان وەت: "ئایا کریەێد ک داوات کریاگەیل ڕووژ سۊر، لەێ وەختە ک زاوا ها ئەولێانا بنەیدە ڕووژێ گرتن؟
[35] ئمان ڕووژێگ تێد ک لەێ نوو زاوا لە لێان دۊرەو کەفێدن، سە لەو ڕوزێارە لەێ نوو ڕووژێ گرن."
[36] ئمجا عیسا ئێ مەسڵەتە ئڕاێان هاورد: "هیچکەسێگ چەپاڵێگ پەڕوو لە دڵنگێگ نوو نیەدڕێدن تا بەێدنەێ لە پینەێ دڵنگ کۊەنەێگ. چۊن ئمجا هەم دڵنگ نووەگە خراو بوودن و هەم پینەگە وە دڵنگ کۊەنەگە نیەتێدن.
[37] ئەێزەن هیچکەس شراو تازە لە کونەێ کۊەنە نیەکەێدن، چۊن شراوە تازەگە کونەگە تەقنێدن و هەم شراوەگە ڕشیەێدن و هەم کونەگە دڕیەێدن.
[38] ئمان شراو تازە باێە لە کونەێ نوو بکریەێدن.
[39] کەسیش بادەز خواردن شراو کۊەنە، ئەزرەت لە شراو نوو نیەخوازێدن، ئمجا ئۊشێدن: 'شراو کۊەنەگە خوەشترە.'"