[1] جارێگ، لە ڕووژ شەمەێگ عیسا وە ناو گەنمەکاڵێگا لە پسا ڕەێ بۊ، شاگردەگانێ چەن گول گەنم هەڵچانن و دان وە قەپاڵا و خسنەێ ئەو دەم.
[2] ئمان بڕێگ لە فریسیەیل وەتن: "ئڕا چوە ئێوە لە ڕووژ شەمە کارێگ کەین ک ناڕەواس؟"
[3] عیسا لە جواوێان وەت: "مەگەر ئێوە نەخوەنینە؛ هەناێ داوت نەبی و هاوڕێەیلێ ورسێان بۊ چوە کردن؟
[4] چێ وە ناو پەرەستگا و ئەو نان پیرۆزە خوارد ک خواردنێ بێجگە لە کاهنەیل گەورا وە کەس ڕەوا نەۊ. تا ئەو تنانەتە ک بەش هاوڕێەگانیشێ دا."
[5] عیسا ئەێزەن وەت: "کوڕ ئاێەم، خوەێ خاوەن ڕووژ شەمەس."
[6] لە ڕووژ شەمەێ ترەک عیسا چێ وە کەنێشت و دەس کرد وە کەلیمەێ خودا کردن. پیاوێگ لە کەنێشتەگە بۊ ک دەس ڕاسێ کوچ هڵاتۊدن.
[7] ئاخونەیل شەریعەت و فریسیەیل چەوێان وە پێ بۊ تا بزانن ک لە ئێ ڕووژ شەمە شەفاێ دەێدن تا بکەنەێ وە دەسپێچگێگ ئڕا ماکووم کردنێ.
[8] ئمان عیسا لە خەێو زانس ک ئەوان وە چوە فکر کەن. وە ئەو پیاو دەس کوچە وەت: "بەو لەێرە بووسیە!" ئەۊیش هەڵسا ئەو پا و هات و لەورە وسا.
[9] ئمجا عیسا وە پێان وەت: "ئلان لە ئێوە پرسم؛ لەێ ڕووژ شەمە کام کار ڕەواس؛ خاسی یان گەنی، نجات دان ژیانێگ یان لە ناو بردنێ؟"
[10] ئمجا چەوێگ وە گشتێانا خڕ دا و وە پیا کوچەگە وەت: "دەسد داکیش." ئەۊیش دەسێ داکیشا و خاسەو بۊ.
[11] ئمان فریسیەیل و ئاخونەیل شەریعەت لە بەونی عەسەبانی بۊن و ئەول یەکا باس کردن تا چوە ئەول عیساێا بکەن.
[12] لە ئەو ڕووژەیلە بۊ ک عیسا ئڕەێ دوا کردن چێ وە کۊە و شەوارێگ وە دوا کردن ئەو سەر برد.
[13] وەختێگ ڕووژەو بۊ شاگردەگانێ وە لاێ خوەێ چڕی و دوانزە گلە لە لێان هەڵوژان و ناوێان نا کلکەردە.
[14] شەمعوون ک عیسا ناوێ ناۊدن پترۆس و ئەندریاس براێ، یاقووب و یووهەنا، فیلیپ و بەرتۆڵماس،
[15] مەتا و تۆماس و یاقووب کوڕ حەڵەفی و ئەێزەن شەمعوون ک وە پێ وەتیا زیلەوت،
[16] یەهووداێ کوڕ یاقووب و ئەێزەن یەهووداێ ئەسخەریۆتی ک خێانەتکار لە ئاو درات.
[17] ئمجا وەختێگ عیسا ئەول شاگردەگانێا لە کۊەگە ئەو خوار هات، لە هاواریێگ وسا. لە ئەورە بڕ گەوراێگ لە شاگردەگانێ و ئەێزەن جماعەت فریەێگ لە مەردمان سەرانسەر یەهوودیە و ئورشەلیم و ئەێزەن ساحڵ سوور و سەیدوون جەمەو بۊن.
[18] گشتێ هاتۊن تا گووش لە قسیەگانێ بتەکنن و لە ناخوەشیەگانێان شەفا بگرن. بڕێگ لە لێان ک تۊش ڕووح خەبیس هاتۊن لە لێ پاکەو بۊن.
[19] گشت تەقەلا کردن تا دەسێگ بڕەسنن وە قەێ عیسا، چۊن تواناێ خاسێگ لە لێ ئەو دەیشت هات ک شەفاێ گشتێان دا.
[20] ئمجا چەوێگ وە شاگردەگانێا خڕ دا و وەت: "خۆزگە ئەو ئێوە ک هەژاری بەشدانە، چۊن پاشاێەتی خوداوەن هن ئێوەس.
[21] خۆزگە ئەو ئێوە ک ئلان ورسێەری بەشدانە چۊن ئێوە تێر کریەین. خۆزگە وە ئێوە ک ئلان گیری بەشدانە، چۊن ئێوە لە بانان خوەشحاڵ خەنین.
[22] "خۆزگە ئەو ئێوە ک مەردمان بەدێان لە لیدان تێدن. وەختێگ مەردمان لە گرد نیەیلنەدان، گەن و نەخاس وە پیدان ئۊشن و ناودان وە گەن تیەرن تەنیا وە خاتر کوڕ ئاێەم،
[23] لە چۊنەو ڕووژێگ دڵخوەش بوون و هەڵپەڕگە بکەن، چۊن پاداشتدان لە ئاسمان گەوراس. هەرچێ بوود باوگ و باپیرەیلێانیش هەم لەێوا ئەول پەێقەمەرەیلا کردن.
[24] "ئمان گەن وە حاڵدان هەێ دەوڵەمەنەیل چۊن سەکامەتی خوەدان لە ئێرە هەڵگرتینە.
[25] گەن وە حاڵدان هەێ ئەوانە ک ئلان تێرین چۊن ئێوە وە ورسێ مینیەین. گەن وە حاڵدان هەێ ئەوانە ک ئلان سەرخوەش و خەنە وە لێوین چۊن ئێوە گیری و ژاری بوودن وە بەشدان.
[26] "گەن وە حاڵدان وەختێگ گشتێ تاریفدان کەن، هەرچێ بوود یە هە ئەو کارەسە ک باوگ و باپیرەیلێان ئڕا پەێقەمەرەیل درووین کردن."
[27] "ئمان وە ئێوە ک ئەژنەوین ئۊشم؛ دووس دژمنەیلدان بداشتوون، خاسی بکەن وە ئەوانە ک بەدێان لە لیدان تێدن،
[28] داواێ برەکەت بکەن ئڕا ئەوانە ک ناڵەت وە پیدان کەن، دوا بکەن ئڕا ئەوانە ک گەن وە پیدان کەن.
[29] ئەگەر کەسێگ شەقەزیلەێگ دا لە ناو گووشد، ئەو لاێ گووشدیش ئەو پێ بکە. ئەگەر کەسێگ کوترەگەدان برد شەۊەگەدانیش لە لێ درخت مەکەن.
[30] هەرکەس چشتێگ لە لیدان خوازی، بێەن وە پێ. هەرکەسیش چشتێگدان برد، لە لێ مەتوانەوەێ.
[31] ئەو چۊنە ئەول باقی مەردمانا بکەن ک خوەدان خوەشدان تێدن ئەولدانا بکریەێدن.
[32] "ئەگەر تەنیا دووس ئەوانە دیرین ک دووسدان دێرن، چ سواوێگ باێەد ئڕادان بنۊسیەێد! تاهەێ گوناکارەیلیش دووس ئەوانە دێرن، ک ئەوانیش دووس یان دێرن.
[33] ئەگەر تەنیا وە کەسانێگ خاسی بکەین ک خاسی وە پیدان کەن، چ سواوێگ باێەد ئڕادان بنۊسیەێد! چۊن تاهەێ گوناکارەیلیش هەم لەوا کەن.
[34] ئەگەر تەنیا وە ئەوانە قەرد دەین ک چەو تەفەقوو چشتێگ لە لێان دێرین، چ سواوێگ باێەد ئڕادان بنۊسیەێدن! تاهەێ گوناکارەیلیش وە گوناکارەیل قەرد دەن تا بادەن چشتێگ لە لێان وە پێان بڕەسێدن.
[35] ئمان دژمنەیلدان دووس بداشتوون، وە پێان خاسی بکەن، وە پێان قەرد بێەن و چەوەنووڕ عەوەز کارەگەدان مەون، پاداشتدان گەوراس، بۊن وە زارووەیل خوداێ بان سەر، چۊن ئەۊ ئەول قەێرمەشناسەیل و بەدکارەیلا نەرم و نێانە.
[36] دڵڕەحم بوون، هەر ئەو جوورە ک باوگ ئاسمانیدان دڵڕەحمە."
[37] "لە باوەت کەس قەزاوات مەکەن، تا لە سەردان قەزاوات نەکریەێدن. تاوانبار کەس مەکەن تا تاوانباردان نەکریەێدن. بوەخشن تا بوەخشیەین.
[38] بێەن، تا وە پیدان بێریەێدن. سە پەێمانەێگ خاس ئەولەقیاێ و سەرەوتەپ و نیقەڵمەترووز نریەێدن لە داواندان، چۊن وە هەر پەێمانەێگ ک بێەین وە پیدان ئەودریەێد."
[39] ئێکە ئمجا مەسڵەتێگ ئڕاێان هاورد: "کوورێگ تۊەنێدن بوودن وە ڕێ نیشاندەر کوور ترەک؟ ئایا هەردگێان نیەکەفن لە چاڵێگ؟
[40] شاگرد لە معەلم ئەو بان نیە، ئمان هەر شاگردێگ ک کول چشتێگ خاس یاێ بگرێدن بوودن وە کەسێگ وێنەێ معەلەمەگەێ.
[41] ئڕا پۊشێگ ک کەفتێە لە چەو براگەدان دۊنین، ئمان لە ئەو قوتووە ک کەفتێە لە چەو خوەدان نیەڕەسینەو؟
[42] یان چجوور توانین وە براگەدان بۊشین: 'برا، بەو تا ئەو پۊشە لە ناو چەود درارم' وەختێگ لە قوتووەگەێ ناو چەو خوەدان بێ خەوەرین! ئەێ دڕۊ! ئەوەڵ قوتووەگەێ ناو چەو خوەد درار تا بتوانیدن پۊشەگەێ ناو چەو هاوساگەد خاس و ئاشکرا بۊنیدن."
[43] "هیچ دار خاسێگ سەمەر گەن نیەگرێدن، ئەێزەن هیچ دار گەنێگیش سەمەر خاس نیەگرێد.
[44] هەر دارێگ وە سەمەر خوەێەو ناسیەێدن. هەنجیر لە دار دڕگ نیەچنیەێدنەو، هەروها ئەنگۊر لە دار تۊڕگ.
[45] ئاێەم خاس لە خەزینەێ دڵ پاکێ خاسی کەێدن و ئاێەم خراوەیش لە دژنگەێ دڵ پێسێ خراوەی کەێدن، چۊن ئەو چشتە ک لە دڵا هێز بگرێد لە زوانەو ئەو دەیشت تیەێدن."
[46] "ئڕا چوە هەناێ چڕینەم، وە پیم ئۊشین: 'گەورەم، گەورەم!' ئمان ئەو چشتە ک وە پیدان ئۊشم وە قەوڵم نیەکەین؟
[47] ئڕادان ئۊشم ماناێ چوەس، وەختێگ یەکێگ تیەید وە لام، قسیەگانم ئەژنەوێد و وە پێان عەمەڵ کەێدن،
[48] مینێد وە ئەو کەسە ک وەختێگ خوازی ماڵێگ بسازێدن، بنەواگەێ قۊل کەنی و بەرد بنچینەگەێ لە بان بەڕ و کەور دامەزران. وەختێگ لافاو هات و شەتڵ ئاو شان نا وە قەێ ماڵەگەوە، تەکان ئەو پێ نەکەفت چۊن بتەو سازیاۊدن.
[49] ئمان ئەو کەسە ک ئەژنەوێدن و وە پێ عەمەڵ نیەکەێدن، مینێدن وە ئەو کەس ک ماڵەگەێ لە بان زەۊا و بێ بنەوا چنی. وەختێگ لافاو هێز گرت، ماڵەگە دەریدەم ڕمیا، ئەۊش چ ڕمیانێگ."