[1] عیسا لە ڕووحۆلقودووس پڕ بۊ و لە ئوردون هاتەو. ڕووح سەرێ نا لە چووڵ بیاوان،
[2] ک لە ئەو بیاوانە ئڕا چل ڕووژ ئبلیس ئمتەحانێ کرد. لە ئەو چل ڕووژە هیچ نەخوارد. وەختێگ وادەێ هاتەو سەر، ئمجا فرە ورسێ بۊ.
[3] ئبلیس وە پێ وەت، "ئەگەر ت کوڕ خودایدن، وە ئێ سانە بۊش تا بوودن وە چەپاڵێگ نان."
[4] عیسا لە جواوێ وەت: "لە کڵام خودا نۊسریاس، 'ئاێەم تەنیا وە نان نیە، ک ژیەێد.'"
[5] ئمجا ئبلیس عیسا برد وە بەرزایێگ و لە یەێ ئان تمام پاشاێەتی و حەشیمەت دنیا وە پێ نیشان دا.
[6] ئبلیسیش وەت، "تمام ئێ دەسڵات و شەوکەت دنیا دەم وە پید، چۊن یانە گشت دریانە وە من و منیش وە هەرکەس دڵم بتواێدن دەمەێان.
[7] سە ئەگەر پشت ئڕام بچەمنیدن، گشتێ بوودن وە هن ت."
[8] عیسایش لە جواوێ وەت: "نۊسیاس؛ 'باێەد تەنیا خوداوەن خوداێ خوەد بپەرەسیدن و تەنیا وە ئەۊ خزمەت بکەێدن.'"
[9] ئێکە ئمجا ئبلیس بردەێ وە ئورشەلیم، ئەو بان بەرزترین شوون برج پەرەستگاگە و وە پێ وەت، "ئەگەر ت کوڕ خودایدن، لە ئێرەو خوەد بخە ئەو خوار.
[10] ئاخر نۊسریاس: ک 'خودا فەرمان کەێدن وە فرێشتەگانێ تا وە خاتر خوەد هۊرێان وە پیدەو بوودن.'
[11] و 'ئەوان گرنەد ئەو سەر دەس تا نەخواێ تک پاد بەێدن لە قەێ سانێگەو.'"
[12] عیسا لە جواوێ وەت: "وەتیاس؛ 'نەباێە ئمتەحان خوداوەن خوداێ خوەد بکەێدن.'"
[13] وەختێگ ئبلیس وە کول شێوەێگ ئمتەحان عیسا کرد، ئمجا واز لە لێ هاورد تا مەگەر لە بانان وەخت ترەک ئڕاێ هەڵکەفێدن.
[14] ئمجا عیسا پڕ لە هاز و تواناێ ڕووحۆلقودووس هاتەو وە جەلیل. ناو و شوورەتێ لە سەرانسەر مەنتەقە پەخشەو بۊ.
[15] دەس کرد وە کەلیمەێ خودا کردن لە کەنێشتەگانێان. گشتێ ئترامێ گرتن.
[16] وەختێگ هاتەو وە ناسریە، ئەورە ک لە تێ گەورا بۊدن، وە ڕەسم جاران، ڕووژەیل شەمە چێ وە کەنێشت و لە ئەوەر وسا وە پاوە تا کڵام خودا بخوەنێدن.
[17] ئمجا کتاو ئەشعیاێ نەبی دانەو دەسێ. لوو لوو توومارەگە واز کرد تا ئەو شوونە دیەو ک لە تێ نۊسیاێە:
[18] "ڕووح خوداوەن ها ئەول منا. ئاخر ئەۊ م هەڵوژانێە تا مزگانی خوەش ئڕا هەژارەیل بارم کل م کردێە تا مزگانی ئازادی ئڕا دیل و ئەسیرەیل بارم، ڕووژنای بارمەو وە چەو کوورەیل، مەزڵوومەیل وە ئازادی بڕەسنم.
[19] و ساڵ ڕەزامەندی خوداوەن وە پیدان ئبڵاق بکەم."
[20] ئمجا لەێ نوو توومارەگەێ هەڵپێچا و داێەوەێ وە خزمەتکارەگە و لەێ نوو نیشتەو زەۊ. گشت ئەوانە ک لە کەنێشتەگە بۊن چەو چقانۊن لە عیسا.
[21] ئمجا دەس کرد وە قسیە کردن و وە پێان وەت: "ئمڕوو لە ئێ ڕووژە، ئێ نووسراوە ک ئەژنەفتین وە ئەنجام ڕەسی".
[22] گشتێ بۊن وە شات و سەرسام مەنن لە ئەو قسەیل سێاسە ک لە دەمێ ئەو دەیشت هاتن و وەتن: "یە کیە! مەگەر یە کوڕەێ یووسف نیە!"
[23] عیسایش لە جواوێان وەت: "بێگومان ئێوەیش ئێ واتە تیەرین وە ڕۊمەو؛ حەکیم، چارەێ خوەد بکە! یانێ؛ ئەو چشتە ک ئیمە ئەژنەفتیمنە، ک ت لە کەفەرناحووم کردیدن، لە ئێرە لە شارەگەێ خوەدیش بکە."
[24] ئەێزەن وەت: "ئمان م باێە وە پیدان بۊشم؛ هیچ پەێقەمەرێگ لە شار و وڵات خوەێ قەبوول نیەکریەێدن.
[25] وە ڕاس پیدان بۊشم ک لە سەردەم ئەلیاس بیوەژنەیل فریەێگ لە ئسرائیل بۊن، بادەز یە ک سێ ساڵ و شەش مانگ واران نەواری، قەێت قڕ سەختێگ وڵات گرت لە وەر،
[26] ئەلیاس ئڕەێ کوومەک وە هیچ کامێان کل نەکریا، مەگەر وە لاێ بیوەژنێگ لە شار زەرفەت لە ناوچەێ سەیدوون.
[27] ئەێزەن لە سەردەم ئەلیشاێ نەبی، کەسان فریەێگ لە ئسرائیل بۊن ک مەریزی گول داشتن، ئمان هیچ کامێان شەفا نەگرتن بێجگە لە نەعمان سووری."
[28] ئەوانە ک لە ناو کەنێشتەگە بۊن، وەختێگ ئێ چشتە ئەژنەفتن، عەسەبانی بۊن.
[29] هەڵپەڕینەو پا و لە شار دەرکردنەێ و بردنەێ ئەو دیار کەورێگ ک شارەگەێان وە بانێەو بۊ و خوازین لە ئەورەو بخەنەێ ئەو خوار.
[30] ئمان عیسا وە ناوێانا دەرچێ و چێ وە ڕێەو.
[31] ئێکە ئمجا عیسا چێ وە کەفەرناحووم لە ناوچەێ جەلیل و لە ڕووژ شەمەێگ لە کەنێشت لە پسا تالیم کڵام خودا کرد.
[32] ئمجا مەردمان گشتێ لە تالیم کردنەگانێ حەێران مەنن، چۊن قسیەگانێ پڕ لە هێز و توانا بۊن.
[33] لە ناو کەنێشتەگە پیاوێگ بۊ ک ڕووح مڵەێکەت خەبیسێگ چۊدن لە گیانێ. وە دەنگ بەرز هاوار کرد:
[34] "های! عیساێ ناسری، چوە توایدن لە لیمان؟ هاتیدنە تا لە ناو بوەیدنەمان؟ م زانم ت کیید، ت کلکەردەێ پیرۆز و قودووس خودایدن."
[35] عیسا خوڕیا لە لێ وەت: "دەنگد بووڕ! لە لێ بەو دەیشت!" مڵەێکەتەگەیش کوتاگەێ وە زەۊا لە ناوهەێنێان و لە گیانێ هاتەو دەیشت، ئمان چشتێگ وە پیاوەگە نات.
[36] مەردمان گشت حەێران مەنن و وە یەکترەکی وەتن، "قسیەێ ئێ ئاێەمە چ هاز و تواناێگ دێرێدن، وە چ جەزەوەێگەو حکم لە ڕووحەیل خەبیس کەێدن و ئەوانیش تیەنەو دەیشت."
[37] سە خەوەر عیسا لە سەرانسەر مەنتەقە پەخشەو بۊ.
[38] پاش یە ک لە کەنێشتەگە هاتەو دەیشت چێ وە ماڵ شەمعوون. خەسۊرەێ شەمعوون گەن جوور تەوێ گرت، ئەوانیش ئڕاێ لاڵکیان لە عیسا.
[39] ئەۊیش هاتە بان سەرێ و خوڕیا لە تەوەگە، تەو لە گیانێ دەرچێ. فلفەور هەڵسا ئەو پا و کەفت لە خزمەتێان.
[40] وەختێگ خوەر لە پسا ئاوا بۊ، گشت ئەوانە ک وە شکڵێگ مەریز یان ناخوەش بۊن هاوردنەێان وە لاێ عیسا. دەس لە سەر هەر کامێان کیشا، خاسێەو کرد.
[41] مڵەێکەت لە کووڵ فرە کەسەو کرد، مڵەێکەتەیلێگ ک لە لەش مەریزەیل وە فەرمان عیسا دەرچێن هاوار مەکردن "ت کوڕ خودایدن!" ئمان عیسا خوڕیا وە ملێانا و نەیشت تا قسیە بکەن، ئاخر ئەوان زانسن ک یە خود مەسیحە.
[42] ئەو ئێ ڕووژ عیسا هەڵسا و چێ وە شوون چک چووڵ و خەڵوەتێگ. مەردمانیش شوون وە شوون لە منەیێ گەردین، دەس ئاخر وەختێگ دینەوەێ، لاڵکیان لە لێ تا لە لاێان وە ڕێەو نەچوودن.
[43] ئمان ئەۊ وە پێان وەت: "م باێە مزگانی خوەش پاشاێەتی خوداوەن شار وە شار بگەردنم، چۊن م وە تڵەو ئێ کارەو کل کریامە."
[44] ئمجا هەمۊشە لە کەنێشتەیل ناوچەێ یەهوودیە کەلیمەێ خودا کرد.