[1] عیسا چێ وە ئەریحا و لە پسا وە ناوێا ڕەێ بۊ.
[2] پیاوێگ لە ئەورە بۊ وە ناو زەکا. سەرکردەێ باجگرەیل بۊ و دەوڵەمەن.
[3] خوازی بۊنێد ئێ عیسا کیە، ئمان وە خاتر فرە بۊن جماعەت نەتوانس، چۊن باڵاێ کوڵ بۊ.
[4] سە نا وە دەوا و لە نوا و چێ ئەو گژ دار وەناوێگ تا بۊنێدنەێ، چۊن ئەۊ لە پسا وە ئەو ڕێا ڕەێ بۊ.
[5] وەختێگ عیسا ڕەسی وە ئەو شوونە، تماشاێ بان کرد و وە پێ وەت: "زەکا، بجمیە بەو خوار! چۊن م ئمڕوو باێە لە ماڵ ت بووسیەم."
[6] سە ئەۊیش گورجانە هاتەو خوار و وە خوەشحاڵیەو پێشوازی لە لێ کرد.
[7] گشت ئەوانە ک یە دین، دەس کردن وە وڕە و خوتە و وەتن: "تواێد بوودن وە میوان گوناکارێگ!"
[8] زەکا لە ئەورە وسا و وە عیساێ خاوەن شکۆ وەت: "بنووڕ گەورەم، دکوتی ماڵ و دارایم دەم وە هەژارەیل و ئەگەر لە بان هەر حەقێگ ئەول کەسێگا فێڵبازی کردمە، چوار چنە حەقەگەێ دەمەو وە پێ."
[9] ئێکە عیسا وە پێ وەت: "ئمڕوو ئازادی هاتێە وە ئێ ماڵە، چۊن یەۊیش کوڕ ئبراهەمە.
[10] ئڕا یە ک کوڕ ئاێەم هاتێە تا گوم کریاوەیل بۊنێدنەو و نجات بێەێدن."
[11] لەێ بەێنە ک جماعەت لە ئێ باسەیلە گووش تەکانن، عیسا باسەگەێ کیشا ئەو بان مەسڵەتێگ، چۊن وە ئورشەلیم نزیکەو بۊدن و ئەوان گشتێ خێاڵ کردن ک هەر ئلان پاشاێەتی خوداوەن لە لێان کەفێدن ئەو دەیشت.
[12] جا عیسا وەت: "گەورەپیاوێگ چێ وە دۊروڵاتێگ ئڕا یە ک دەسڵات پاشاێەتیێگ ئڕەێ خوەێ وە دەس بارێدن و باێدنەو.
[13] کابرا دا گلە لە بەردەگان خوەێ چڕی و دا دەنک مەنا دا وە پێان و وە پێان وەت: 'وە ئێ پۊلە ئڕەێ خوەدان مامڵە بکەن تا تیەمەو.'
[14] ئمان هاوڵاتیەیل شارەگەێ خوەێ بەدێان لە لێ هات، سە لە پشت سەر ئەۊ ڕافەێگ کل کردن و وەتن: 'ئیمە نیەتوایم ئێ ئاێەمە بوودن وە حاکممان.'
[15] وەختێگ وە دەسڵات پاشاێەتیەو هاتەو، حکم کرد تا ئەو بەردەیلە ک ئەوسا پۊل داۊدن وە پێان جەمەو بوون تا بزانێدن لە مامڵەگانێان چوە وە یەکەو نانە.
[16] یەکمینەێان هاتەو نوا و وەت: 'گەورەم، یەێ مەناگەێ جنابد دا مەناێ تر وە یەکەو ناس.'
[17] ئەۊیش وە بەردەگە وەت: 'هەر بژی بەردەێ خاس! چۊن ت لە یەێ چشت فرە بۊچگ دەسپاک بۊدنە، والیگەری دا شار ئەو دەس بگر.'
[18] ئێکە دووهمین بەردەگە هات و وەت: 'گەورەم، مەناگەێ جنابد پەنج مەناێ تر وە یەکەو ناس.'
[19] ئەۊیش وە پێ وەت: 'تنیش والیگەری پەنج شار ئەو دەس گریدن.'
[20] ئێکە ئەو بەردەگە هات و وەت: 'گەورەم، یە پۊلەگەێ جنابدانە، پێچانۊمەێ لە دەسڕێگ
[21] ئڕا یە ک لە لیدان ڕخم چێ، چۊن جنابدان ئاێەم دڵڕەقێگین، لە پشتدەس نەکریاێ نەف هەڵچنین و لە خەلیەێ نەکاڵیاێ خەرمان هەڵگرین.'
[22] ئەۊیش وە پێ وەت: 'هەێ بەردەێ جەڵەب! با هەر وە قسیەگان خوەد ماکوومد بکەم، ت خوو زانسید م ئاێەم دڵڕەقێگم، مەگەر نیەۊشید م لە پشتدەس نەکریاێ نەف هەڵگرم و لە خەلیەێ نەکاڵیاێ خەرمان بەرداش کەم!
[23] ئڕا پۊلەگە ئەو دەس سەڕافەیل نێایدن، تا هەناێ خوەم باتامەو، بتۊەنساتام وە نەفەەو بسێنیاتامەوەێ؟'
[24] سە ئمجا وە ئەوانە ک لە ئەوەر وساۊن وەت: 'مەناگان لە لێ بسێننەو و بێەنەێان وە ئەو کەسە گ دا مەنا دێرێدن.'
[25] ئەوانیش وە پێ وەتن: 'گەورەم، خوو یەۊ خوەێ دا مەنا دێرێدن!'
[26] [کابراێ حاکم وە پێان وەت:] 'وە پیدان بۊشم، وە گشتێ ئەوانە ک دێرن، وە پێان فرەتر دریەێدن؛ ئمان ئەوانە ک هۊچ نەێرن، تاهەێ هەرچێگ ک دێرن لە لێان ئەوسێنیەێدن.
[27] ئمان ئەو دژمنەیل منە، ئەوانە ک نەتواسن ک م بووم وە حاکمێان، بارنەێان وە ئێرە و لە وەر چەوم بکوشنەێان.'"
[28] پاش وەتن ئێ چشتەیلە، کەفت ئەو نواێان ورەو ئورشەلیم.
[29] وەختێگ هاتەو جێ وە نزیکەیل بەێت فاجی و بەێت هانی، وە ئەو شوونە ک وە پێ ئۊشیەێد کۊەێ زەێتوون، دو گلە لە شاگردەگانێ کل کرد،
[30] وە پێان وەت: "بچنە ئێ ئابادیە لە نوادان، وەختێگ چینەو ناو ئابادیەگە، خەرکوڕیێگ ئەوبەسیاێ لە ئەورە دۊنین ک تا ئلان باریەو نەۊە. سەرێ واز بکەن و بارنەێ.
[31] ئەگەر کەسێگ لە لیدان پرسی: 'ئڕەێ چوە وازێ کەین؟' تەنیا بۊشن: 'عیساێ خاوەن شکۆ هەوەجەێ کەفتێەسەو پێ.'"
[32] ئمجا ئەو کلکەردەیلە لە نوا چێن و دینەوەێ، هەر وەو جوورە ک ئەۊ وە پێان وەتۊدن.
[33] هەناێ لە پسا سەر خەرکوڕیەگە دامڵکانن، خاوەنەگانی لە لێان پرسین: "ئڕەێ چوە سەر خەرەگە دامڵکنین؟"
[34] ئەوانیش وەتن: "عیساێ خاوەن شکۆ هەوەجەێ کەفتێەسەو پێ."
[35] ئمجا هاوردنەێ وە لاێ عیسا و ئاباگان خوەێان خسن ئەو کووڵ خەرکوڕیەگە و عیسا نانەو کووڵێ.
[36] وەختێگ ئەۊ لە پسا ورەو نوا چێ، مەردم ئاباگانێان لە بان ڕێەگە لە نواێ پیەنەو کردن.
[37] هەناێ ڕەسین وە لێژڵانیەگەێ کۊەێ زەێتوون، گشتێ شاگردەیلێ وە خوەشڵەخوەشی و وە دەنگ بەرز دەس کردن وە زکر خودا کردن، ئڕەێ تمام ئەو مەوجزەیلە ک دۊن
[38] و وەتن: "پیرۆزە ئەو پاتشا ک وە ناو خوداوەنەو تیەێدن، ئاشتی لە ئاسمان و شکۆ لە ئەرش ئاڵا!"
[39] بڕێگ لە فریسیەیل ک لە ناو جماعەتەگە بۊن وە عیسا وەتن: "مامووسا، بخوڕیە لە شاگردەگاند تا بووسیەنەو."
[40] ئەۊیش لە جواوێان وەت: "با وە پیدان بۊشم، ئەگەر یان بێ دەنگ بوون، کوچگەگان هاوار بەرزەو کەن."
[41] وەختێگ عیسا هاتەو نزیک و شارەگە دی، ئڕەێ شارەگە گیرس
[42] و وەت: "خوەزێەو ت، خود خوەد، لەێ ڕووژە دی بڕەسیاتایدنەو چ چشتەیلێگ دەسماێەێ ئاشتیدن! ئمان ئلان لە چەو ت ئەوشاریانەسەو.
[43] ئڕەێ یە ک ڕووژەیلێگ تیەنەو ڕێد، ک دژمنەیلد وە دەوردەو دیوار کیشن و لە چوار باڵا محاسرەد کەن.
[44] تا وە بان زەۊ خراو و خاپۊرد کەن، خوەد و ئەوڵادد لە ناود. کوچگێگ وە بان کوچگ ترەو لە تید وە جێ نیەیلن، چۊن ت لە ئەو ڕووزێارە ک خودا کردۊدنەد وە سەر، نەڕەسیدنەو."
[45] ئێکە وەختێگ عیسا چێ وە ناو پەرەستگا، دەس کرد وە ئەو دەیشت کردن مامڵەکەرەیل
[46] و وەت: "نۊسیاس، 'ماڵ م، ماڵ دوا و عەبادەتە'، ئمان ئێوە کردینەسەێ وە قڵاچەێ تەریەیل."
[47] هەر ڕووژ لە پەرەستگا ئامووژگاری خەڵک کرد. کاهنەیل گەورا، ئاخونەیل شەریعەت و کەێخودایل لە منەی یە بۊن تا بکوشنەێ.
[48] ئمان هیچ ڕێکارێگ نەینەو، چۊن گشتێ مەردم وە تاشقەو گووش لە قسیەگانێ تەکانن.