[1] عیسا ئڕەێ شاگردەگانێ تاریف کرد: "باوەمەرد دەوڵەمنێگ بۊ، زابتێگ داشت. خەوەر دریا وە پێ ک زابتەگەێ لە ماڵ و دارایەگەێ خێانەت کەێدن.
[2] ئمجا ئەۊیش کابراێ زابت چڕی وە لاێ خوەێ و وە پێ وەت: 'ئێ باسەیلە چوەن ک لە لید ئەژنەوم؟ حساو کتاوەگاند بارەو کوو، چۊن ت دی لێە ئەو دۊا زابت م نیید.'
[3] ئمجا زابتەگە لە وەر خوەێەو فکر کرد: 'ئلان ک خاوەن کارەگەم لە سەر کارەگە کەێدنەم ئەو دەیشت، ئمجا باێە چوە بکەم؟ نە تواناێ زەۊ کەنین دێرم نە لە ڕۊومەو هڵاێد گێای بکەم،
[4] ئها، ڕەسیمەو باێە چوە بکەم تا وەختێگ ک لە ئێرە دەرکریام مەردم لە ماڵ خوەێان میوانداریم بکەن.'
[5] ئمجا گلە وە گلە قەردبارەگان ئەرواوەگەێ چڕی وە لاێ خوەێ. لە یەکمینە پرسی: 'چەنێگ قەرد ئەرواو ها وە لادەو؟'
[6] باوەمەرد قەردبار لە جواو وەت: 'سەد کۊزەێ سێنزە مەنی ڕۊن زەێتوون.' کابراێ زابت وەت: 'قەڤزەگەد بگر و بنیشەو زەۊ و زۊزی بکرەێ وە پەنجیا گلە.'
[7] ئێکە لە یەکتر لە لێان پرسی: 'ت چەنێگ قەرداربارید؟' ئەۊیش وەت: 'سەد هووڕ گەنم.' کابراێ زابت وە ئەۊیش وەت: 'قەڤزەگەد بگر و بکرەێ وە هەیشتا.'
[8] ئەرواو تەحسینێ کرد، چۊن ژێرانە دەس ئەو کار بۊدن. چۊن بنیاێەم دنیا پەرەس لە هامشوو و مامڵەێ ئەول مەردمان ترەکا زرنگترە لە ئاێەمەیل خوداباوەڕ.
[9] "سە وە پیدان ئۊشم، ماڵ ئێ دنیاێ فاسدە بگرن وە کار تا ڕەفیقەیلێگ ئڕەێ خوەدان گیر بارین، تا وەختێگ ک ئەو ماڵە لە دەس چێ، لە ماڵەیلێگ ئڕەێ هەمۊشە جێ بەن وە پیدان.
[10] ئەو کەسە ک لە چشت کەم دەسپاکە، لە فرەیش هەم دەسپاکە، ئمان ئەوە ک لە کەم دەس ناپاک بوودن لە فرەیش هەم ناپاکە.
[11] سە ئەگەر ئێوە لە ماڵ دنیا دەس پاک نەۊن، کی تواێد ئڕەێ گەنج ڕاسگانی وە پیدان ئتماد بکەێدن؟
[12] ئەگەر ئێوە ئەول دارای کەس ترەکا دەسپاک نەۊن، کی تواێد ماڵ خوەدان بەێدن وە پیدان؟
[13] هیچ بەردەێگ نیەتوانێد لە خزمەت دو ئەرواو بوودن، چۊن یا خوەشێ لە یەکێگ لە لێان تیەێدن و بەدێ لە ئەوەکە، یا لە دەم یەکێگ لە لێان ڕام بەێدن و وە ئەوەکە تۊلەکی کەێدن. ئێوە نیەتوانین هەم لە خزمەت خودا بۊن هەم ماڵ دنیا."
[14] فریسیەیل ماڵ پەرەسیش ک لە ئێ قسەیل عیسا گووش تەکەنان، تۊەلەکی وە پێ کردن.
[15] ئمجا عیسا وە پێان وەت: "ئێوە ئەوانەینە ک لە ناو خەڵک خوەدان وە ساڵهان نیشان دەین، ئمان خودا دڵدان ناسێد. چۊن ئەو چشتە ک لە لاێەن مەردمەو فرە باێەخ دریەێدن وە پێ و خوەشی ئڕاێ کریەێدن، لە لاێ خودا چشت ناهەزێگە.
[16] تا وە سەردەم یەحیا، مەردمان باێە لە تەورات مووسا و باقی پەێقەمەرەیل ئتاعەت بکردان. ئمان لە ئەوساوا دی مزگانی پاشاێەتی خوداوەن دریەێدن و گشتێ وە ئەزرەت و تەقەلاوا خوازن بچنەو ناوێ.
[17] ئمان وە گوما هاتن ئاسمان و زەۊ ئاسانترەکە لە کەمەو بۊن نختەێگ لە تەورات.
[18] هەرکەس ژنەێ تڵاق بەێدن و ژن ترەک بخوازێدن، زنا کردێە. ئەو کەسیشە ک ئەو ژن تڵاق دریاێە بخوازێد، تۊش زنا هاتێە."
[19] "کابراێ دەوڵەمەنێگ بۊ ک داێەم دڵنگ کەتان ئەرقەوانی نازکێگ کرد لە وەر و هەر ڕووژ ژیانێ وە خوەش گوزەرانی ئەو سەر برد.
[20] کابراێ گێاێگ وە ناو لازارۆس ک گیانێ پڕ لە زەخم بۊ، نریاۊدن لە دەر ماڵەگەێ.
[21] لازارۆس ئەزرەتەمەن یە بۊ تا لە بنقاوێگ ک لە سفرەێ کابراێ دەوڵەمەن کەفێدنەو تێر بوودن. تاهەێ گەماڵەیلیش هاتن و زەخمەگانێ لسینەو.
[22] "باوەمەرد هەژار مرد و فرێشتەیل بردنەێ وە شان ئبراهەم. کابراێ دەوڵەمەنیش مرد و نریا لە قەور.
[23] لە دنیاێ مردێەێل ک لە ژێر زەجر و عەزاو بۊ، سەرێ هێز دا و لە دۊرەو ئبراهەم دی و لازارۆس لە شانێ.
[24] چڕی ئەو ئبراهەم و وەت: باوگە ئبراهەم، دەخیل ئەو دڵڕەحمید! لازارۆس کل بکە تا سەر پەنجەێ بژەنێدن وە ئاوا و زوانم هوونکەو بکەێدن، چۊن لە ناو ئێ ئاگرە هام لە عەزاو.
[25] ئمان ئبراهەم لە جواوێ وەت: 'کوڕم، ها وە هۊرد ک ت لە تمام دریژان ژیاند هەمۊشە چشتەیل خاس وە پید ڕەسین، لازارۆسیش چشتەیل گەن. ئمان ئلان ئەۊ ها لە سەکامەتی و ت هایدن لە عەزاو.
[26] لە گشت یانە وەو لاوە، کەن فرە گەوراێگ ها لە ناوهەێن ئیمە و ئێوە. سە کەس لە ئێرەوە نیەتوانێد باێدن ئڕەێ لاێ ئێوە و کەسیش لە لاێ ئێوەوە نیەتۊەنێدن باێدنە ئێرە.'
[27] ئەۊیش وەت: 'سە باوگە، لە ڕێ خودا! لازارۆس کل بکە وە ماڵ باوگم
[28] چۊن م پەنج برا دێرم، تا بچوودن خەوەر بەێدن وە پێان، نەخواێ ئەوانیش ڕێێان بکەفێدن ئەو ئێ جاێ پڕ لە ئازارە.'
[29] ئمان ئبراهەم وە پێ وەت: 'ئەوان مووسا و پەێقەمەرەیل تر دێرن، با لە ئەوان گووش بتەکنن.'
[30] لەێ نوو وەت: 'نە، باوگە ئبراهەم، ئمان ئەگەر کەسێگ لە دنیاێ مردێەیلەو بچوودن وە لاێان، ئەوان تەوبە کەن.'
[31] ئبراهەم وە پێ وەت: 'ئەگەر ئەوان گووش لە قسەیل مووسا و پەێقەمەرەیل نەتەکنن، سە دی قانێ نیەون، تاهەێ ئەگەر یەکێگ لە دنیاێ مردێەیلیشەو هەڵسێدن.'"