[1] یەێ دەف باجگرەیل و گونابارەیل هاتن و لە قسیەگان عیسا گووش تەکانن.
[2] ئمجا فریسیەیل و ئاخونەیل شەریعەت دەس کردن وە قاڵ بخوڕ و وەتن: "عیسا بۊە وە هاوباز گونابارەیل و ئەولێانا بوودن وە هاوقاو."
[3] جا عیسا ئێ مەسڵەتە ئڕاێان هاورد؛
[4] "کام لە لیدان ئەگەر سەد گلە پەس داشتوودن، وەختێگ یەکێگ لە لێان تاڕ بوەسێدن، ئەو نەود و نوو گلەگە لە چووڵ هەڵەت وە جێ نیەیلێدن و نیەچوودن و تا ئەو یەێ گلە نارێدنەو، ئەو دۊا نیەتیەێدن؟
[5] هەناێ بۊنێدەوەێ، نەێدنەێ ئەو نەر شان وە خوەشڵەخوەشی.
[6] ئمجا وەختێگ باێدن ئەو جێ وە ماڵ، چڕێدن ئەو هاوسا و ڕەفیقەیل خوەێ و ئۊشێد: 'خوەشی ئەو دەر ماڵم! میە تاڕ بەساێەگە هاوردمەسەو.'
[7] جا وە پیدان ئۊشم: هەر وەێ شێوە خوەشیێگ ک ئڕەێ تەوبە کردن یەێ گوناکار لە ئاسمان قومیەێدن، فرە فرەترە لە خوەشی ئڕا نەود و نوو گلە موومنێگ ک هەوەجەێگ وە تەوبە کردن نەێرن.
[8] یا کام ئافرەتە ک دا سکەێ نقرە داشتوودن و یەکێگ لە لێان گوم بکەێدن، چراخ ئڕاێ دەم نیەێدن و ماڵەگە ئڕا ئەودینێ ژێر بان نیەکەێدن، تا بۊنێدنەوەێ؟
[9] ئمجا وەختێگ دۊنێدنەوەێ، چڕێدن ئەو هاوسا و ڕەفیقەیل خوەێ و ئۊشێد: 'وە پیدان مزگانی، سکە گوم کریاڵە دیمەو.'
[10] وە پیدان بۊشم؛ لە ناو فرێشتەیل خودایش هەر لەێوا خوەشحاڵیێگ ئڕەێ تەوبە کردن هەر گونابارێگ هێز گرێدن."
[11] ئێکە عیسا وەت: "باوەمەردێگ دو کوڕ داشت.
[12] کوڕە بۊچگڵە وە باوگێ وەت: 'باوگە، بەش ماڵ و میراتەگەم هە لە ئلانا بێە وە پیم.' باوگەگەیش ماڵ و دارایەگەێ لە ناو کوڕەگان بەش کرد.
[13] چشتێگ پێ نەچێ ک کوڕ بۊچگتر هەرچێگ داشت دا لە بار و چێ ئڕا وڵات دۊرێگ و لە ئەورە وە گەنەکاری گشتێ لە دەس دا.
[14] وەختێگ دەسێ لە دۊاێ ماڵ و دارایەو دەرچۊدن، قتی قڕان بێ سامانێگ وڵات گرت لە وەر. جا کابرا کەفتە هەژاریا.
[15] ئمجا چێ، بۊ وە ئاێەم ناوماڵەێ هاوڵاتیێگ، ئەۊیش کابرا کل کرد تا ورازەگانێ بلەوەڕنێد.
[16] کاشی ڕەسی وە جاێگ ک تاهەێ ئەزرەتەمەن تێر کردن زگێ لە لەوەڕ ورازەگان بۊ، ئمان کەس چشتێگ وە پێ نێا.
[17] جا دەس ئاخر هاتەو خوەێ و وە خوەێ وەت: 'چەن گلە لە ئاێەم ناوماڵەگان ماڵ باوگم وە قاێە خوەن و بنقاویش کەفێدن ئەو شوون دەسێان! ئمجا م باێە لە ئێرە لە ورسی بکەفم!
[18] ئلان هەڵسم ئەو پا و چم وە لاێ باوگم و ئۊشم: 'باوگە، م لە ژێرساێ خودا گوناکار و لە ڕۊ ت تاوانبارم.
[19] م دی لاق یە نیم وە کوڕ خوەد بزانیدەم، ئمان وێنەێ ئاێەم ناوماڵەێگ قەبوولم بکە.'
[20] سە هەڵسا ئەو پا و چێ وە لاێ باوگ. ئمان وەختێگ هێمان لە دۊرا هات، باوگێ دیەێ، دڵێ ئراێ سزیا و وە دەو هاتە پیریێەو و باوش کرد لە ملێ و ماچێ کرد.
[21] کوڕ وە باوگێ وەت: 'باوگە، م لە ژێرساێ خودا گوناکار و لە ڕۊ ت تاوانبارم. م دی لاق یە نیم ت وە کوڕ خوەد بزانیدەم.'
[22] ئمان باوگ خوڕیا لە خزمەتکارەگانێ و وەت: 'گورجانە بچن جفتێگ کەوش و دەسێگ دڵنگ خاس خاس ئڕاێ بارن بکەن لە وەرێ. کلوانکێگیش ئڕاێ بارن بکەن لە کلگی!
[23] گوورە چاخەگەیش بارن و سەر بووڕن تا بخوەیمن و خوەش بۊمن.
[24] چۊن ئێ کوڕ منە مردۊدن و ئلان سەر لە نوو زینێە و بۊە، گوم بۊدن و ئلان پێا بۊە.' سە بەزمێگ نان وە یەکەو.
[25] لەو بەێنە کوڕ گەورا لە ناو کاڵ و بووسان بۊ. لەێ ئانە گ هات و ڕەسی وە ماڵ، دەنگ مووسیقا و هەڵپەڕگە ئەژنەفت.
[26] چڕی ئەو یەکێگ لە خزمەتکارەگان و لە لێ حاڵ حکاێەت پرسی.
[27] ئەۊیش ئڕاێ وەت: 'براگەد هاتێەسەو و باوگدیش گوورە چاخەگە سەر بڕیە، ئڕەێ یە ک ئازا و لوون هاتێەسەو.
[28] ئمان براگەێ چێ لە قین، نەتواس بچوودنەو ناو. ئێکە باوگێ هاتەو دەیشت و لاڵکیا لە لێ.
[29] ئمان کوڕ گەورا لە جواوێ وەت: 'بنووڕ! چەنی چەن ساڵە لە ئێ ماڵە وێنەێ بەردە کار کەم و هیچ وەخت وە سەر قسیەدەو نێامە، ئمان ت تاهەێ گیسکەلەڕێگیش وە پیم نێایدە تا ئەول هاوکوڕەیلما سەر بووڕم و بەزمێگ بگریم.
[30] ئمان ئێرنگە ک ئێ کوڕدە هاتێەسەو، کەسێگ ک ماڵ و دارایەگەد ئەول جندەیلا داێەس وە واێا، گوورە پەروارەگە ئڕاێ سەر بڕیدن!'
[31] باوگیشێ وە پێ وەت: 'کوڕم، ت هەمۊشە هایدن ئەول منا و هەر چشتێگیش م دێرم هن تنە.
[32] ئمان ئیمە باێەد جەژن بگریم و خوەشحاڵ بۊمن، چۊن ئێ براێ تنە مردۊدن و ئلان زینێەو بۊە، گوم بۊدن و ئلان پێا بۊە.'"