[1] ساڵ پانزەهم حکوومەت تیبارس لە ئمپراتووری ڕووم بۊ. پۆنتئۆس پیلاتۆس حاکم یەهوودیە و هرۆدۆس چواروڵاتیش فەرماندار جەلیلیە بۊ و فیلیپ برایشێ فەرماندار ئیتۆریە و تەراخۆنتیس. لیسانیۆسیش فەرماندار ئەبیلینە بۊ.
[2] لە سەردەمێگ، ک ئاناس و قەیافا کاهنەیل گەورا بۊن، کڵام خودا وە یەحیاێ کوڕ زەکەریا، ک لە بیاوان ژیا، نازڵ بۊ.
[3] ئمجا یەحیا ناوچە وە ناوچەێ ئوردون گەردی و جاڕ کیشا تا مەردم تەوبە بکەن و لە سەر دەسێ قوسڵ بگرن، ئڕەێ بەخشیان گونایلێان،
[4] ئەوچۊن ک لە کتاو ئەشعیاێ نەبی نۊسیاس؛ دەنگێگ لە بیاوان هاوار کەێدن، ڕی هاتن خوداوەن ئامادە بکەن! ڕێەگەێ عەدڵەو بکەن!
[5] دەروەنەیل باێە پڕەو بوون پاڵ و چێایل سافا بان ڕێەیل چەفت چڵ ڕاسا بکریەن، ناهاواریەیل گشتێ باێە بکەفن لە یەک.
[6] ئەوسا ئمجا گشت مەردمان نجات خوداوەن دۊنن.
[7] یەحیا وە ئەو مەردمانە ک هاتۊن تا لە لاێ قوسڵ بگرن، وەت: "هەێ هەفیزاێەیل! کی خەوەرداردانەو کردێە تا لە دەس خەزەوێگ ک ها لە ڕێدان بدەرچین؟
[8] وە سەمەرەدانەو نیشان بێەن ک تەوبە کردینە. وە خوەدان دڵخوەشی مەێەن ک ئیمە 'ئەوڵاد ئبراهەمیمن'. م وە پیدان ئۊشم، ک خودا توانێدن لە ئێ کوچگەیلە ئەوڵاد ئڕاێ ئبراهەم درس بکەێدن.
[9] ئلان دی تەور نیشتێەسەو ڕیشێ دارەیل، سە هەر دارێگ ک میوەێ خاس نێاشتوودن، بڕیەێدن و خریەێدن لە ئاگر."
[10] مەردمان لە لێ پرسین، "سە ئێرنگە ئیمە باێەد چوە بکەیمن؟"
[11] وە پێان جواو دا: "هەرکە دو گلە شەۊ دێرێدن، یەکلێان بەێدن وە ئەوە ک نەێرێدن، هەرکەسیش ک خواردن دێرێدن، هەر ئێ کارە باێە بکەێدن."
[12] تاهەێ باجگرەیلێگیش ک هاتن تا لە سەر دەس یەحیا قوسڵ بگرن، لە لێ پرسین، "مەلا، ئمجا ئیمە چوە باێە بکەیمن؟"
[13] ئەۊیش وە پێان وەت: "زێاتر لە ئەو چشتە ک قانوونە، لە کەس مەسێنن."
[14] هەر لەێوا سەربازەیلیش لە لێ پرسین، "ئەنۊ ئیمە چوە باێە بکەیمن؟" یەحیایش لە جواوێان وەت: "وە زوور پۊل لە کەس مەسێنن، بختان لە کەس مەێەن و وە داهات خوەدان قانێ بوون."
[15] مەردمان گشت چەوەنووڕ هاتن مەسیح بۊن. خەڵک دگومان کەفتۊن؛ پووڕێ یەحیا خود مەسیح بوودن!
[16] یەحیا وە ئێ قسیەوە جواو گشتێ مەردم دا: "م قوسڵدان وە ئاو دەم، ئمان کەسێگ تیەێدن ک لە م فرە تواناترەکە، ئەوچۊنە لە م گەوراترەکە، ک م تاهەێ قابڵ وە یە نیم ک بەن کەوشەگانێ بکەمەو. ئەۊ وە ڕووحۆلقودووس و ئاگر قوسڵدان دەێدن.
[17] شەنێگ ها وە دەسێەو تا دەخڵەگەێ لە شوونە هووڵە خڕەو بکەێدن، گەنمەگەێ کەێدەو جێ لە ئمار و ئاگرێگ خەێدن لە کەێ کوتەڵەگەێ ک ئەو کوشیانێگ لە تێ نیە."
[18] یەحیا وە چۊنەو مەسڵەتەیلێگ ئامووژگاری خەڵک کرد و جاڕ خەوەر خوەش کیشا.
[19] یەحیا داێەم لە هرۆدۆس ئانتیپاس چواروڵات، حاکم جەلیلیە، ئێراد گرت، وە خاتر یە ک ژن براگەێ خوەێ، هیرۆدیا، خوازۊدن و ئەێزەن لە بان کارەیل ناڕەواێ ترەکێ.
[20] ئمجا هرۆدۆس یەحیا خس لە زندان، ئێ کار خراویشە نا ئەو بانێان.
[21] وەختێگ مەردمان گشتێ قوسڵ گرتۊن، عیسایش قوسڵ گرت و لەێ ئانە ک پسا دوا کرد، ئاسمان واز بۊ.
[22] ڕووحۆلقودووس لە شێوەێ کەمووتەرێگ لە بانا نەمیا و نیشت ئەو بان شان عیسا. دەنگێگ لە ئاسمانەو هات: "ت کوڕ نازار منیدن، ک لە لید فرە ڕازیم."
[23] وەختێگ عیسا دەس کرد وە کار ئامووژگاری کردن خەڵک، نزیکەێ سی ساڵێ بۊ. لە ئەو سەردەمە عیسا وە عنوان کوڕ یووسف ناسریا. یووسف کوڕ هەڵی بۊ.
[24] هەڵی کوڕ مەتسات بۊ، مەتسات کوڕ لێڤی، لێڤی کوڕ مەلکی، مەلکی کوڕ یەنا، یەنا کوڕ یووسف بۊ.
[25] یووسف کوڕ مەتاسیا، مەتاسیا کوڕ ئامۆس، ئامۆس کوڕ ناحووم، ناحووم کوڕ هەسڵی، هەسڵی کوڕ نەجای بۊ.
[26] نەجای کوڕ ماس، ماس کوڕ مەتاسیا، مەتاسیا کوڕ شیمین، شیمین کوڕ یووسخ و یووسخ کوڕ یەهوودا بۊ،
[27] یەهوودا کوڕ یوانا، یوانا کوڕ ڕیسا، ڕیسا کوڕ زرووبابڵ، زرووبابڵ کوڕ شەئەلتیل و شەئەلتیل کوڕ نیری بۊ،
[28] نیری کوڕ مەلکی، مەلکی کوڕ ئادی و ئادی کوڕ کۆسام، کۆسام کوڕ ئەلمۆدام و ئەلمۆدام کوڕ ئێر بۊ.
[29] ئێر کوڕ یەشووع بۊ و یەشووع کوڕ ئەلیعەزەر، ئەلیعەزەر کوڕ یووریم، یووریم کوڕ مەتسات و مەتسات کوڕ لێڤی بۊ،
[30] لێڤی کوڕ شەمعوون بۊ، شەمعوون کوڕ یەهوودا، یەهوودا کوڕ یووسف، یووسف کوڕ یۆنام و یۆنام کوڕ ئەلیاقیم بۊ.
[31] ئەلیاقیم کوڕ مەلیا، مەلیا کوڕ مەنا، مەنا کوڕ مەتاسا، مەتاسا کوڕ ناتان و ناتان کوڕ داوت بۊ،
[32] داوت کوڕ یەسا بۊ، یەسا کوڕ عۆبێد، عۆبێد کوڕ بووعەز، بووعەز کوڕ سەڵمۆن و سەڵمۆن کوڕ نەهشۆن بۊ.
[33] نەهشۆن کوڕ ئەمیناداب بۊ و ئەمیناداب کوڕ ئەدمین، ئەدمین کوڕ ڕام، ڕام کوڕ هەسرۆن، هەسرۆن کوڕ پێرێز، پێرێز کوڕ یەهوودا بۊ.
[34] یەهوودا کوڕ یاقووب بۊ، یاقووب کوڕ ئسحاق، ئسحاق کوڕ ئبراهەم، ئبراهەم کوڕ تارەح بۊ و تارەح کوڕ ناهۆر
[35] ناهۆر کوڕ سەرۆگ بۊ، سەرۆگ کوڕ ڕەعوو، ڕەعوو کوڕ پەلەگ، پەلەگ کوڕ عێبەر و عێبەر کوڕ شاڵەح،
[36] شاڵەح کوڕ کێنان بۊ، کێنان کوڕ ئەرپەکشاد، ئەرپەکشاد کوڕ سام، سام کوڕ نووح و نووح کوڕ لامەخ بۊ،
[37] لامەخ کوڕ مەتووشاڵەخ بۊ، مەتووشاڵەخ کوڕ حەنۆح، حەنۆح کوڕ یارەد، یارەد کوڕ مەهلەلئێل و مەهلەلئێل کوڕ قێنان،
[38] قێنان کوڕ ئەنۆش بۊ، ئەنۆش کوڕ شێت، شێت کوڕ ئاێەم و ئاێەم کوڕ خوداس.