[1] عیسا وە شاگردەگانێ وەت: "هڵانجێگ لەوە نیە ک ئاێەم لە خەتا نەکەفێدن، ئمان گەن وە ڕووژ ئەو کەسەیلە ک بوون وە باێس لە خەتا کەفتن.
[2] ئڕا ئاێەم خاسترە ک بەرد ئاسیاوێگ بوەسیەێدن وە ملێەو و بخریەێدن لە دەلیا، تا یە ک بوودن وە باێس و بانی لە خەتا کەفتن یەکێگ لەێ بەندەیل خودا.
[3] سە هۊردان وە خوەدانەو بوودن. "ئەگەر براگەدان گوناێگ کرد، بتنیەن وە پێا، ئەگەر تەوبە کرد ئمجا بوەخشنەێ.
[4] تاهەێ ئەگەر لە یەێ ڕووژ هەفت جار گەنی لە حەقدان کرد و هەفت دەف هات و وەت: 'پەشێمانم.' ئێوە باێە بوەخشینەێ."
[5] ئمجا کلکەردەگان وە عیساێ خاوەن شکۆ وەتن: "ئێمانمان فرەوا بکە!"
[6] عیساێ خاوەن شکۆهیش وەت: "ئەگەر وە ئەندازەێ دەنک خەرتەلێگ باوەڕ داشتۊن، توانین وە ئێ دار تۊە بۊشین، لە ڕیشێا درا و بچوو لە دەریا ڕیشێ بووە وە زەۊا، ئەۊیش ئەو کارە کەێدن.
[7] "کامدان ئەگەر بەردەێگ داشتۊن ک خەریک وەرزێری یا شوانی ئڕادان بوودن، وەختێگ ک لە دەیشتەو باێدنەو وە ماڵ، پێ ئۊشین: 'یەێ ڕاس بەو بنیش ئەو سەر خوانچە، نان بخوە؟'
[8] یا نە لە جیاتی ئەوە وە پێ ئۊشین: 'شامەگەم حازر بکە، شاڵ خزمەتکاری بوەس لە ناوقەێ و بکەف لە خزمەتم تا م نان و ئاوەگەم بخوەم، ئمجا لەوەولا توانید ئڕەێ خوەد چشتێگ بخوەید.'
[9] ئایا لە ئەو بەردە ئڕەێ ئێ کارە ک ئڕادان کردێە، دەسخوەشی کەین!
[10] سە ئێوەیش هەر وەێ شێوازە، هەناێ کول چشتێگ ک وە پیدان فەرمان کریاس ئەنجام داین، بۊشن: 'ئیمە تەنیا بەندەیل بێ منەتێگیم، ئێ کارە ک کردیمنە ئەرک سەر شانمان بۊە.'"
[11] وەختێگ عیسا لە ڕێ ئورشەلیم بۊ، وە ناوهەێن سامرە و جەلیلا چێ.
[12] لەێ بەێنە ڕێگاێ کەفتەو قورنگێگ، تەقیا وە دا نەفرا ک مەریزی گول داشتن. ئەو دا نەفەرە ک خوەێان دۊر گرتۊن،
[13] وە دەنگ بەرز چڕین: "عیسا، هەێ مامووسا، بەزێەرید وە پیمان باێدن!"
[14] هەناێ عیسا ئەوان دی، وە پێان وەت: "بچن و خوەدان نیشان کاهنەیل بێەن." وەختێگ کەفتن وە ڕێا، لە مەریزیەگە پاکەو بۊن.
[15] یەکێگ لە لێان وەختێگ ڕەسیەو ک شەفا گرتێە، هەڵگەردیاوا و وە ئاواز بەرز دەس کرد وە زکر خودا کردن.
[16] خوەێ خس لە خاک پاێ عیسا و سپاسێ کرد. سامرەئییش بۊ.
[17] عیسا لە لێ پرسی: "مەگەر هەر دا گلەدان پاکەو نەۊن؟ ئەنۊ ئەو نوو گلەگە هان لە کوو؟
[18] هیچکام ترەک لە لێان نەهاتنەو تا سپاس خودا بکەن، بێجگە ئێ خاوارە!"
[19] ئێکە عیسا وە پێ وەت: "هەڵس بچوو، ئێماند شەفاد داس."
[20] عیسا لە جواو ئێ پرسێار فریسیەیلە ک پاشاێەتی خوداوەن کەێ تیەێدن، وەت: "هاتن پاشاێەتی خوداوەن وە شێوەێگ نیە ک وە چەوا باێدن.
[21] یان مەردمان بۊشن: 'بنووڕ، ها یەسە لەێرە.' یان 'بنووڕ، ئەوەسە لەورە!' چۊن پاشاێەتی خوداوەن ها لە ناوهەێندان."
[22] ئمجا وە شاگردەگان خوەێ وەت: "ڕووزێارێگ تیەێد ک ئێوە تامازروو یەکێگ لە ڕووژەیل کوڕ ئاێەم مینین، ئمان وە چەو نیەۊنینەێ.
[23] مەردمان وە پیدان ئۊشن: 'بنووڕ، ئەوەسە لەورە!' یا 'بنووڕ، ها یەسە لەێرە!' مەچن و ئەو شوونێان مەکەفن.
[24] ئڕەێ یە ک کوڕ ئاێەم لە سات و ڕووژ خوەێ وێنەێ بڵاچەێگ لە ژێر ئاسمان، لە ئێ باڵ تا وە ئەو باڵ گشتێ ڕووشنەو کەێدن.
[25] ئمان وەرجلە کار باێە زەجر و زۊخ فرەێگ بکیشێد و لە لاێەن ئێ نەسڵەو هاشا لە لێ بکریەێدن.
[26] هەر وەو جوورە ک ڕووزێار نووح بۊ، ڕووزێار کوڕ ئاێەمیش لەواسە.
[27] مەردمان خواردن و هەڵقوڕانن و ژن و ژنخواز کردن تا ئەو ڕووژە ک نووح نیشت لە کشتی. ئمجا لافاو هات و گشتێان لە ناو برد.
[28] ئەێزەن لە دەوران لووتیش هەم لەوا بۊ. مەردمان سەرقاڵ خواردن و هەڵقوڕانن، سەنن و فرووشان و کاڵین و سازین بۊن.
[29] ئمان لە ئەو ڕووژە ک لووت لە سەدووم چێ وە ڕێەو، ئاگر و گووگرد لە ئاسمانا واری و گشتێان لە ناو برد.
[30] ڕووژ ئەو هاتن کوڕ ئاێەمیش هەم هەر لەێواسە.
[31] لە ئەو ڕووژە، هیچکەسێگ ک وە بان ماڵەو بوودن و دارایەگەێ لە ناو ماڵەگە، ئڕەێ ئەو دارایێە ئەو خوار نیەچوودن. هەروها هەرکەس ک لە ناو کاڵ و بووسان بوودن، نەباێە دی بچوودنەو.
[32] ژنەێ لووت بخەنەو هۊر خوەدان!
[33] هەرکەس ک هەوڵ بەێدن ک گیان خوەێ ئافاز بکەێدن، لە دەس دەێدنەێ، ئمان هەرکەس ک لە دەس بەێدنەێ، ئافازێ کەێدن.
[34] وە پیدان ئۊشم، لە ئەو شەوە، لە دو نەفەرێگ ک هان لە ناو یەێ دووشەک، یەکێگ لە لێان بریەێدن و ئەوەکە مینێدن وە جێ.
[35] لە دو ژنێگ ک وە یەکەو گەنم دەسەڕ کەن، یەکلان بریەێدن و ئەوەکە مینێدن وە جێ."
[36] [لە دو پیاو ک هان لە کاڵ بووسانێگ، یەکێگ لە لێان بریەێدن و ئەوەکە مینێدن وە جێ.]
[37] ئەوانیش پرسین: "لە کوورە، گەورم؟" عیسایش وەت: "لە هەر کوورە لەڕگێگ بوودن، داڵەیل لە تێ کووەو بوون."