[1] ئمجا لەوەولا عیساێ خاوەن شکۆ هەفتاد و دو کەس ترەک هەڵوژان و جفت وە جفت لە نوا کلێان کرد وە ئەو شار و وڵاتەیلە ک خوەێ خوازی وە ئەورەیلە بچوودن.
[2] وە پێان وەت: "دەخڵ فریەس، ئمان وەرزێر کەمە، سە داوا لە خاوەن دەخڵ بکەن تا وەرزێر ئڕا گردەو کردن دەخڵەگەێ کل بکەێدن.
[3] بکەفن وە ڕێا. بزانن ک م ئێوە وێنەێ میەێ پەێقەمەر وە ناو گەلێگ گورگ کل کەم.
[4] نە کیسەێ پۊل و نە جانتای و نە کەوش و کڵاش ئەولا مەوەن. لە ناو ڕێ وە گەرد کەسێگا حەواڵپرسی مەکەن.
[5] وە هەر ماڵێگ ک چین، هەر لە ئەوەڵەو بۊشن: 'سڵام خودا وە ئێ ماڵە.'
[6] ئەگەر کەسێگ لە ئەو ماڵە بۊ ک سڵام خودا قەبوول بکەێدن، سە سڵام و ئاشتی ئەۊیش گرێدن لە وەر، ئمان ئەگەر نەۊ، ئەو سڵامە هەڵگەردیەێدن ئەو خوەدان.
[7] لە ئەو ماڵە بمینن و لە هەر خواردنێگ ک ئڕادان هاوردن بخوەن، چۊن حەق کارگەر وە خوەێ ڕەواس. لە ئەو ماڵە داکاسیەن و ماڵ وە ماڵ مەگەردن.
[8] وە هەر شارێگ ک چین و قەبوولدان کردن، لە هەر چشتێگ ئڕادان هاوردن بخوەن.
[9] مەریزەیلێگ ک هان لە ئەو شارە شەفا بێەن و وە پێان بۊشن: 'پاشاێەتی خوداوەن وە پیدان نزیکەو بۊە.'
[10] ئمان ئەگەر چین وە شارێگ و ئەوان لە گرد نەیشتنەدان، بچن وە خێاوانەگانێ و بۊشن:
[11] 'تاهەێ تووز شارەگەدان ک پلکیاس وە پایلمانەو وە پیدانا تەکنیمنەو. ئمان یە بزانن؛ پاشاێەتی خوداوەن هاتێەسەو نزیک.'
[12] با وە پیدان بۊشم، لە ئەو ڕووژە مکافات سەدووم لە چۊنەو شارێگ فرە سوکترەکە.
[13] "گەن وە حاڵدان هەێ شار خورازین! گەن وە حاڵد هەێ شار بەێت سەیدا! چۊن ئەگەر ئەو مەوجزەیلە ک لە ناو ئێوە کریان لە سوور و سەیدوون بکردیاتان، بێگومان مەردمان هە زۊ دوار لە کووڵ و لە خوەڵەکوان نیشتێ تەوبە کردۊن.
[14] ئمان لە ڕووژ حساو ڕووزێار سوور و سەیدوون لە ئێوە فرە خاسترەکە.
[15] و ت، هەێ شار کەفەرناحووم! ئایا ت ورەو ئاسمان بەرزەو کریەید؟ نە، ت خریەیدن لە قۊلایی جهەنەم.
[16] "هەرکەس گووش لە ئێوە بتەکنێدن، گووش لە م تەکانێە و هەرکەسێگ لە ئێوە هاشا بکەێدن چمان لە م هاشا کردێە. هەرکەسێگیش ک لە م هاشا بکەێدن، هاشا لە ئەو کەسە کردێە ک کل م کردێە."
[17] وەختێگ هەفتاد و دو شاگردەگە هاتنەو، وە خوەشڵەخوەشی وەتن: "گەورەم، لە ناو ت تاهەێ مڵەێکەتەگانیش لە دەممان ڕام بەن."
[18] عیسایش وە پێان وەت: "م شەێتان دیم ک لە ئاسمانەو وێنەێ بڵاچەێگ کەفتەو خوار.
[19] بنووڕن، دەسڵاتێگ دامە وە پیدان ک وە پێ پاوڵاێ هەفیمار و کوڵەنجی و گشت هێز و تواناێ دژمنەیل بکەین و هیچ نخسانێگیش وە پیدان نەڕەسێد.
[20] ئمان وە یە دڵخوەش مەون ک مڵەێکەتەیل لە دەمدان ڕام بەن، دڵخوەش وە یە بوون ک ناودان لە ئاسمان نۊسیاس."
[21] هە لەو ئانە، عیسا لە ڕووحۆلقودووسا هاتەو کەێف و وەت: "باوگە، خوداوەن ئاسمان و زەۊ، شکرانەوێژدم، چۊن ت ئێ چشتەیلە لە عاقڵەیل خەواس شاردیدەسەو، ئمان وە مناڵەیل نیشانێان دەیدن. ئا باوگە، چۊن ت ئێ چۊنە پید خوەش بۊە.
[22] "کول چشتێگ لە لاێ باوگمەو دریاس ئەو دەسم، بێجگە لە باوگ کەس نیەزانێد کوڕەگە کیە، یا باوگ کیە. بێجگە لە کوڕ و هەرکەسێگ ک کوڕ بتواێد ئڕاێ دیاری بوود."
[23] ئمجا عیسا وەر کردەو شاگردەگانێ و وە دزیەو وە پێان وەت: "خوەزێمەو ئەو چەوەیلە ک ئەو چشتە ک ئێوە دۊنین، بۊنن.
[24] چۊن وە پیدان بۊشم ک فرە لە پەێقەمەرەیل و پاتشایل ئەزرەتەمەن دین ئەو چشتەیلە بۊن ک ئێوە دۊنین، ئمان ئەوان نەین، هەروها ئەزرەتەمەن ئەژنەوین ئەو چشتەیلە بۊن ک ئێوە ئەژنەوین، ئمان نەژنەفتن."
[25] جا بزان چوە بۊ؛ یەکێگ لە تەوراتناسەیل هەڵسا تا ئمتەحان عیسا بکەێدن، وەت: "مامووسا، م باێە چوە بکەم تا بووم وە میراتدار ژیان ئەبەدی؟"
[26] عیسایش وە پێ وەت: "لە تەورات چوە نۊسیاس؟ ت چۊ خوەنیدەێ؟"
[27] ئەۊیش جواو دا: "ت باێە خوداوەن خوداێ خوەد لە ناخ دڵا وە تمام ڕووح و وە تمام هاز و وە تمام عەقڵدەو دووس داشتۊدن و هەروها هاوساگەدیش وێنەێ خوەد."
[28] عیسایش وە پێ وەت: "جواوەگەد درسە، ئێ کارە بکە، تا زنێانی ئەبەدی وە دەس باریدن."
[29] ئمان ئەو تەوراتناسە، ئڕەێ یە ک خوەێ وە ئاێەم بەرحەقێگ نیشان بەێدن، لە عیسا پرسی: "خوو، هاوساگەێ م کیە؟"
[30] عیسا جواو دا: "باوەمەردێگ پسا لە ئورشەلیمەو چێ ئڕا ئەریحا، کەفت لە دەس تەریەیل، لۊەتێەو کردن و دان لە لێ و وە نیمەگیان هیشتنەێ وە جێ و چێن وە ڕێەو.
[31] لە کارەگان ڕووزێار، کاهنێگ وە ئەو ڕێا چێ و وەختێگ چەوێ کەفت لە ئەۊ، وە ئەو دەس ڕێەگەێا وە لاێا ڕەد بۊ.
[32] هەروها کابراێ لێڤییش، وەختێگ ڕەسی وە ئەو شوونە و چەوێ کەفت لە ئەۊ، وە ئەو دەس ڕێەگەێا وە لاێا ڕەێ بۊ.
[33] ئمان وەختێگ ڕێوار سامرەئیێگ ک لە پسا وە سەفەرێگ چێ، هات وە لاێ و دیەێ، دڵێ ئڕاێ سزیا
[34] هاتەو سەرێ و ڕۊن زەێتوون و شراو سای لە زەخمەگانی و تیمارێان کرد. ئێکە نادەێ ئەو کووڵ چارواگەێ خوەێ و بردەێ وە کاروانسەراێگ و چاوێاری لە لێ کرد.
[35] ئەو ئێ ڕووژ دو دیناریێگ لە گیرفان دراورد و داێەێ وە خاوەن کاروانسەراگە و وەت: 'هۊرد وە پیەو بوودن و چاوێاری لە لێ بکە، وەختێگ هاتمەو هەرچێگ ک زێاتر خەرج کردۊدن دەمەو وە پید.'
[36] وە باوەڕ ت کام لە ئێ سێ نەفەرە هاوساێ ئەو پیاوە بۊن، ک کەفتۊدن لە دەس تەریەگان؟"
[37] ئەۊیش وەت: "ئەوە گ بەزێەریێ وە حاڵێ هات." عیسایش وە پێ وەت: "تنیش بچوو و ئەو چۊنە بکە."
[38] لە سەر ڕێەگەێان عیسا چێ وە ئاوایێگ، لە ئەورە ژنێگ وە ناو مەرتا لە ماڵ خوەێ بۊ وە میواندارێ.
[39] ئەو ژنە خوەیشکێگ داشت وە ناو مەریەم، ک لە وەر پایل عیساێ خاوەن شکۆ نیشت و لە قسیەگانێ گووش تەکان.
[40] ئمان مەرتا وە خاتر فرەیی کارەگانێ لە هەڵەپڵە بۊ. سە هات وە لاێ عیسا و وە پێ وەت: "گەورەم، ت باکد نیە ک خوەیشکەگەم ئێ هەمگە کارە هیشتێەسە مل منەو وە تەنیا؟ بۊش وە پێ تا باێدەو میەتم."
[41] ئمان عیساێ خاوەن شکۆ لە جواوێ وەت: "مەرتا، مەرتا، ت وەرواسە و هەڵەپڵەێ کارەیل فرەێگ ها لە وەرد،
[42] تەنیا هەوەجە وە یەێ چشت هەس، مەریەم بەشە خاسترەگەێ هەڵوژانێە، ک لە لێ نیەسێنیەێدنەو."