[1] جەژن نان فەتیرە ک وە پێ وەتن پەسخە نزیک بۊ.
[2] کاهنەیل گەورا و ئاخونەیل شەریعەت لە منەی ڕێێگ گەردین تا عیسا بەن وە کوشت، چۊن ڕخێان لە مەردم چێ.
[3] ئمجا شەێتان چێ لە جەڵد یەهووزا، ناسیاو وە ئسەخریووتی، ک یەکێگ لە دوانزە شاگردەگەێ بۊ.
[4] ئەۊیش دۊرەو کەفت و وە گەرد کاهنەیل گەورا و سەردەسەیل پاسەوانەیل پەرەستگاێا لە باوەت چۊناێەتی ڕادەس کردن عیسا وە پێان قسیە کرد.
[5] ئەوانیش لە بەونی خوەشحاڵەو بۊن و قەوڵ دان پۊل بێەن وە پێ.
[6] ئەۊیش قەبوول کرد و لە منەی مووڵەتێگ گەردی تا لە خەڵوەتیێگ عیسا ڕادەسێان بکەێدن.
[7] ئمجا ڕووژ نان فەتیرە هاتەو جێ، ک لەو ڕووژە باێە کاوڕ پەسخە قوروانی بکریاد.
[8] جا عیسا کل پترۆس و یووهەنا کرد و وەت: "بچن بنیاێ شام پەسخە ئڕامان بنەن تا وە یەکەو بخوەیم."
[9] ئەوانیش لە لێ پرسین: "تواید لە کوورە بنیاێ بنەیمن؟"
[10] عیسایش وە پێان وەت: "بنووڕن، وەختێگ چینە ناو شارەگە، تەقیەین وە پیاوێگا ک پاچێگ ئاو ها وە دەسێەو، لە شوونێ بچن وە ئەو ماڵە ک ئەۊ چوودنەو ناوێ
[11] و وە خاوەن ماڵەگە بۊشن: 'مامووسا لە لید پرسێدن: وتاق میوانگە ها کوو تا خوەم و شاگردەگانم لە تێ شام پەسخە بخوەیمن؟'
[12] ئەۊیش وتاقێگ لە پووش بانێ ماڵەگە نیشاندان دەێدن، ک کول چشتێگ لە تێ داچنیاس. لە ئەورە ئامادەێ بکەن."
[13] جا ئەوانیش چێن و کول چشتێگ هەر ئەو چۊنە ک وە پێان وەتیاۊدن، دین و ئمجا شام پەسخەگە درس کردن.
[14] وەختێ هاتەو جێ، عیسا نیشتەو سەر میز و کلکەردەگانیشێ ئەولێا.
[15] ئەۊیش وە پێان وەت: "فرە ئەزرەتەمەن یە بۊم، ک وەرجلە عەزاو کیشانم، ئێ شام پەسخە وە گەرد ئێوەێا بخوەم،
[16] ئاخر با وە پیدان بۊشم؛ م دی چنەو شامێگ نیەخوەم تا وەختێگ ک لە پاشاێەتی خوداوەن ماناێ ڕاسگانی ئێ شامە وە دی ناێدن."
[17] ئێکە جامێگ هەڵگرت و شکرانەێ خودا کرد و وەت: "یە بگرن و لە ناو خوەدان بەشێ بکەن.
[18] چۊن وە پیدان بۊشم، لە ئێ وادە وەو لاوە م دی لە ئێ ئاو ئەنگۊرە نیەخوەم تا وەختێگ ک پاشاێەتی خوداوەن باێدن."
[19] لەوەولا نەمی ئەو نانێگ و پاش شکرانەێ خودا کردن، شکانەێ و داگەێ وە پێان و وەت: "یە لەش منە، ک وە خاتر ئێوە پێشکەشێ کریەێد. ئڕەێ هۊرمان م ئێ کارە بکەن."
[20] ئمجا پشت سەر شامەگەیش هەر ئەو کارە وە جام شراوەگە کرد، وەت: "ئێ جامە ک ئڕا ئێوە پڕ کریاس پەێمان نووێگە لە خۊن م ک ئڕا ئێوە ڕشیاس.
[21] "ئمان بزانن، کەسێگ ک ڕادەسم کەێدن، ها وە گەرد منا و دەسیشێ ها لە بان ئێ میزە.
[22] چۊن کوڕ ئاێەم چوودن، هەر ئەو جوورە ک لە چارەێ نۊسریاس، ئمان گەن وە حاڵ ئەو کەسە ک ڕادەسێ کەێدن."
[23] ئمجا ئەوانیش لە ناو خوەێان لە یەکترەکی پرسین؛ ک کی توانێد ئەو کەسە بوودن ک ئێ کارە کەێدن.
[24] چەق پەڵێگ لە ناو شاگردەگانێ هێز گرت ک کامێان باێەد وە گەوراترین حساو بکریەێد.
[25] ئمان عیسا وە پێان وەت: "پاتشایل خاوارەیل وە مەردمێان حکم کەن، ئەوانەیشە ک حاکمێانن وە پێان ئۊشیەێد خاسەپیاو.
[26] ئمان ئێوە لەێوا مەون. گەوراترین کەس لە بەێن ئێوە باێە بۊچگدان بوودن و ئەو کەسە ک بوودن وە پێشەوا باێەد وێنەێ خزمەتکارێگ بوودن.
[27] سە کی گەوراترەکە؛ ئەوە ک لە سەر سفرە نیشتێە یان ئەوە ک خزمەت کەێدن؟ مەر نە ئەوە ک لە سەر سفرە نیشتێە؟ ئمان م یەسە هام لە ناو ئێوە وێنەێ کەسێگ ک لە پسا خزمەت کەێدن.
[28] "ئێوە ئەوانەینە ک لە ڕووژەیل ئمتەحان لە کنارم وساین.
[29] جا منیش پاشاێەتیێگ دەم وە پیدان، هەر ئەو چۊنە ک باوگم وە پیم داێەسەێ.
[30] تا ئێوەیش لە ئەو پاشاێەتی منە لە سفرەێ م بخوەین. لە ئەورە نیشین ئەو تەخت و وە دوانزە هووزەگەێ بەنی ئسرائیل حکوومەت کەین."
[31] "شەمعوون، شەمعوون، گووش بتەکن! شەێتان تواسێە تا وێنەێ گەنم سەرەندان بکەێدن،
[32] ئمان م ئڕا ت دوا کردم تا ئێماند لە دەس نەچوودن، ئمجا ت، هەناێ هاتیدنەو، برا و خوەیشکەگاند بەتواناوا بکە."
[33] پترۆسیش وە عیسا وەت: "گەورەم، م حازرم ئەولدا وە زندان و تا وە مردنیش بچم."
[34] عیسایش وەت: "با وە پید بۊشم پترۆس؛ کەڵەشێر نیەقۊلنێدن لە ئێ ڕووژە تا وەختێگ ک ت سێ دەف لە ناسین م هاشا نەکەیدن."
[35] عیسا وە پێان وەت: "وەختێگ بدوون کیسەێ پۊل و جانتای و کەوش و کڵاش کلدان کردم، ئایا چشتێگ کەم داشتین؟" ئەوانیش وەتن: "نە، هیچ چشتێگ."
[36] ئەۊیش وە پێان وەت: "ئمان ئلان، هەرکە کیسە و پۊل یان جانتایێگ دێرێدن وەلا بارێدنەێ. هەرکەسێگیش شمشێرێگ نەێرێدن، دڵنگەگەێ بفرووشێدن و یەکێگ بسێنێدن.
[37] چۊن م وە پیدان ئۊشم، ئێ نووسراوە باێەد لە بان م وە حەقیقەت بڕەسێدن؛ 'لە داڵتەێ تاوانکارەیل وە حساو هاوردنەێ'، وە ڕاس هەر چشتێگ لە باوەت م نۊسریاس وە حەقیقەت ڕەسێدن."
[38] ئەوانیش وەتن: "گەورەم، بنووڕ، دو گلە شمشێر دێریمن." ئەۊیش وەت: "بەسە دی!"
[39] عیسا هاتەو دەیشت و هەر چۊ جاران چێ ئڕەێ کۊەێ زەێتوون، شاگردەگانیشێ لە شوونێ چێن.
[40] هەناێ ڕەسی وە ئەورە، وە پێان وەت: "دوا بکەن تا لە وەسواسە و ئمتەحان نەکەفین."
[41] ئمجا خوەێ وە دۊری برنگ سانێگ لە ئەوان دۊرەو کەفت و ونجێ نا لە زەۊ و دوا کرد؛
[42] "باوگە، ئەگەر مەیلد هەس، ئێ جامە لە م بخە لا، نە وە خاتر م، ئمان وە ئرادەێ خوەد."
[43] ئێکە فرێشتەێگ لە ئاسمانا لە لێ کەفتەو دەیشت و توانا دا وە پێ.
[44] عیسا لە ئەو تەنگەوەریە، لە قوڕن دڵا دوا کرد و عرەقێ وێنەێ چکەیل خۊن ڕشیان لە بان زەۊ.
[45] وەختێگ لە دوا کردن هەڵسا، هاتەو وە لاێ شاگردەگانێ، دی لە پەژارە خەوێان بردێەسەو.
[46] ئەۊیش وە پێان وەت: "ئڕەێ چوە خەفتینە؟ هەڵسن ئەو پا و دوا بکەن تا نەکەفین لە وەسواسەێ ئمتەحان."
[47] هەناێ عیسا هێمان لە پسا قسیە کرد، وە یەێهەو بڕێگ ئاێەم هاتن. کابراێ یەهووزا ناویش، ک یەکێگ لە دوانزە شاگردەگە بۊ، کەفتۊدن ئەو نواێان. چێ ئڕا لاێ عیسا تا ماچێ بکەێدن.
[48] ئمان عیسا وە پێ وەت: "وە ماچێگ تواید وە کوڕ ئاێەم خێانەت بکەێدن؟"
[49] وەختێگ ئەوانە ک وە دەور عیساوا بۊن، دین ک چوە لە پسا ئتفاق کەفێدن، پرسین: "گەورەم، وە شمشێر هڵاماتێان باریمن؟"
[50] ئێکە ئمجا یەکێگ لە لێان هڵامات بەردەێ کاهن گەورا هاورد و گووش ڕاسێ بڕی.
[51] ئمان عیسا وەت: "نە، بووڕنەوەێ!" ئمجا دەس کیشا لە گووش یاروو و خاسێەو کرد.
[52] ئێکە عیسا وە کاهنەیل گەورا و سەردەسەیل پاسەوانەیل پەرەستگا و کەێخوداگان، ک هاتۊن ئڕاێ، وەت: "مەگەر م تەریەێ یاخیم ک وە شمشێر و گورزەو هاتینە ئڕام؟
[53] زەمانێگ ک هەر ڕووژ لە پەرەستگا ئەولدانا بۊم، دەس نەناینەو بانم. ئمان ئلان سات ئێوەس و هاز تیەریکی!"
[54] ئێکە ئەوان عیسا گرتن و بردنەێ ئڕەێ ماڵ کاهن گەورا. ئمان پترۆس دۊر وە دۊر لە شوونێان چێ.
[55] لە ناو حسار ماڵ کاهن گەورا ئاگرێگ کردۊنەو و نیشتۊن وە دەورێەو. پترۆسیش چێ نیشت لە لاێان.
[56] ئێکە ئمجا کەنیزێگ لە شۊەڵەێ ئاگرەگە دیەێ، چەو بڕی لە لێ و وەت: "ئێ پیاویشە وە گەردێا بۊ."
[57] ئمان پترۆس لە دەر هاشا درات و وەت: "م هەر نیەناسمەێ، خانم!"
[58] کەمێگ لەوەولا، یەێ نەفەر ترەکیش ک چەوێ هاتە ملێا، وەت: "تنیش یەکێگ لە ئەوان بۊدن." ئمان پترۆس وەت: "م لە ئەوان نیم، برا!"
[59] ئێکە دۊاێ نزیک وە ساتێگ، یەکترەک کوتران لە لێ کرد: "وە یەقین ئێ پیاویشە ئەولێا بۊ، چۊن یەۊیش لە خەڵک جەلیلیەس."
[60] ئمان پترۆس وە پێ وەت: "براگەم، م هەر نیەزانم ت گەپ چوە دەید!" هەر لەو بەێنە، هەناێ ئەۊ هێمان لە پسا قسیە کرد، کەڵەشێر قۊلان.
[61] عیساێ خاوەن شکۆهیش سەر هەڵگەردانەو و نووڕس وە پێ. ئمجا پترۆس قسیەگەێ عیساێ خاوەن شکۆ کەفتەو هۊرێ، ک چۊ وە پێ وەتۊدن: "وەرجلە یە ک ئمڕوو کەڵەشێر بقۊلنێدن، ت سێ دەف لە م هاشا کەیدن."
[62] ئەۊیش چێ ئەو دەیشت و لە قوڕن دڵا گیرس.
[63] ئەو ئاێەمەیلە ک عیسا گرتۊن، دەس کردن وە تۊلەکی وە پێ کردن و لە لێ دان.
[64] بان چەوەیلێ بەسان و دان لە لێ و وەتن: "سە برا، لە خەیو بۊش بزانیم کیە دەێدن لە لید؟"
[65] گەن و نەخاسەیل فرەی ترەکیش وە پێ کردن.
[66] وەختێگ ڕووژا هات، جەرخەێ کەێخودایل و کاهنەیل گەورا و ئاخونەیل شەریعەت جەمەو بۊن و عیسا هاوردن وە وەر دیوان خوەێان.
[67] ئەوانیش وەتن: "ئەگەر ت مەسیحیدن، ئڕامان بۊش." عیسا وەت: "ئەگەر ئڕادان بۊشم وە پیم بڕوا نیەکەین.
[68] ئەگەریش لە لیدان پرسێار بکەم، ئێوە جواوم نیەین.
[69] ئمان لە ئلان وەو لاوە کوڕ ئاێەم نیشێدن ئەو دەس ڕاس تواناێ خودا."
[70] ئەوانیش گشتێ لە لێ پرسین: "سە ت کوڕ خودایدن؟" ئەۊیش وە پێان وەت: "خوەدان لە پسا ئۊشین ک هەم."
[71] ئمجا ئەوانیش وەتن: "دی چ شاتی ترەکێگ توایمن؟ ئەوەسە لە دەم خوەێەو ئەژنەفتیمن."