[1] ئێکە عیسا مەسڵەتێگ ئڕەێ شاگردەگانێ هاورد تا وە پێان نیشان بەێدن ک ئەوان باێە داێەم دوا بکەن و هیچ وەخت دڵسەردەو نەون.
[2] وەت: "لە شارێگ قازیێگ بۊ ک نە لە خودا ڕخێ چێ نە حەواڵ لە خەڵک خودا پرسی.
[3] بیوەژنێگیش لە ئەو شارە بۊ ک گوڕەێگوڕ هات وە لاێ قازیەگە و وە پێ وەت: 'لە مرافەگەم ئەول دژمنەگەما حەق بێە وە م.'
[4] تا قەێرێگ قازیەگە هە ئەو ژێر بار نەچێ، ئمان دەس ئاخر ئەول خوەێا وەت: 'هەرسەێ م لە خودا حساو نیەوم و حەواڵیش لە کەس نیەپرسم،
[5] ئمان چۊن ئێ بیوەژنە ئاجزم کردێە، با حەقەگەێ بسێنمەو، وەگەرنە دەس لە قەومەو نیەکەێدن.'"
[6] ئمجا عیساێ خاوەن شکۆ وەت: "جا ئەژنەفتین، ئێ قازی بێ خودا چوە وەت،
[7] سە خودا چۊ حەق ئاێەم هەڵوژیاێەگان خوەێ ک شەو و ڕووژ لە لێ لاڵکیەن نیەسێنێدن؟ ئایا دێر جواوێان دەێدنەو؟
[8] م وە پیدان ئۊشم، زۊزی ڕەسێدن لە هاوارێان، حەقێان سێنێد. ئمان ئایا وەختێگ کوڕ ئاێەم باێدن، باوەڕێگ لە سەر زەۊ دۊنێدنەو؟"
[9] ئمجا عیسا ئێ مەسڵەتە هاورد ئڕەێ ئەوانە ک لە موومن بۊن خوەێان دڵنێا بۊن و لە بانا تماشاێ ئیەکە و ئەوەکە کردن،
[10] "دو نەفەر چێنە پەرەستگا ئڕا دوا کردن؛ فریسیێگ و باجگرێگ.
[11] فریسیەگە وسا وە پاوا و ئەول خوەێا وەێ جوورە دوا کرد؛ 'خودایا، شکرد ک م وێنەێ ئەو باقی مەردم نیم؛ وێنەێ دزەیل، گەنەکارەیل، خیزەیل، یا وێنەێ ئێ باجگرە.
[12] هەفتەێ دو دەف ڕووژێ گرم، دا یەک داهاتەگەمیش بەخشم.'
[13] ئمان باجگرەگە لە ئەولاتر وسا وە پاوا، تاهەێ تماشاێ ئاسمانیش هە نەکرد، ئمان تەپڵەسینێ کرد و وەت: 'خودایا، بەزێەرید وە حاڵ من گوناکار باێدن!'
[14] م وە پیدان ئۊشم کابراێ باجگر وە بەخشیاێ چێەو وە ماڵ، نە ئەوەکە. چۊن هەرکە خوەێ وە گەورا بزانێد بۊچگەو کریەێد و هەرکە خوەێ وە بۊچگ بزانێد وە گەورای ڕەسێد."
[15] مەردمان تاهەێ مناڵەیل کوورپەیش هاوردن وە لاێ عیسا تا دەس بکیشێدن لە سەرێان. وەختێگ شاگردەگانێ یە دین، تنیان لە لێان.
[16] ئمان عیسا مناڵەگان وە لاێ خوەێ چڕی و وە شاگردەگانێ وەت: "بیلن تا مناڵەگان بان ئڕەێ لام، نواێان مەگرن، چۊن پاشاێەتی خوداوەن هن کەسانەیلێگ چۊ یانەسە.
[17] وە ڕاس وە پیدان بۊشم؛ هەرکەسێگ وێنەێ مناڵێگ بۊچگ پاشاێەتی خوداوەن قەبوول نەکەێدن، هیچ وەخت پا نیەنەێدنەو ناوێ."
[18] کابراێ دەسڵاتدارێگ پرسێارێگ هاورد وە خزمەت عیسا: "مامووساێ خاس، ئڕەێ وە دەس هاوردن ژیان ئەبەدی چوە باێە بکەم؟"
[19] عیسا وە پێ وەت: "ئڕەێ چوە وە م ئۊشید خاس؟ هیچکەس خاس نیە بێجگە خودا.
[20] خوەد دەستوورەگان زانیدن خوو، 'زنا مەکە، قەتڵ مەکە، دزی مەکە، شاتی دروو مەێە و ئزەت و ئترام باوگ و داڵگد بگر.'"
[21] ئەۊیش جواو دا: "هەر لە دەورەێ جوانیمەو یانە گشتێ وە جێ هاوردمە."
[22] وەختێگ عیسا یە ئەژنەفت، وە پێ وەت: "هێمان چشتێگد کەمە، هەرچێگ دیریدن بفرووش و بەشێ بکە لە هەژارەیل. تا دی گەنجێگ داشتۊدن لە ئاسمان، ئمجا بەو و بکەف ئەو پەێڕەوشت م."
[23] ئمان وەختێگ ئێ چشتە ئەژنەفت، خەمین مەن، چۊن فرە دەوڵەمەن بۊ.
[24] عیسا نووڕس وە پێ و وەت: "ئای، چەنێ سەختە ڕێ بردن وە پاشاێەتی خوداوەن، ئڕەێ ئەوانە ک دەوڵەمەنن!
[25] وە ڕاس، ڕەێ بۊن شترێگ وە کوناێ دەرزیێگا هاسانترە لە وارد بۊن دەوڵەمەنێگ وە پاشاێەتی خوداوەن."
[26] ئەوانە ک ئێ قسیە ئەژنەفتن، وەتن: "سە ئمجا کی توانێدن نجات پێا بکەێدن؟"
[27] عیسا لە جواوێان وەت: "ئەو چشتە ک ئڕا ئاێەم نەکردەنیە، وە لاێ خوداوە کارێگ نەێرێدن."
[28] ئمجا پترۆس وەت: "یەسە ئیمە خوەمانیش ماڵمان هیشتیمنە وە جێ و بۊمنە وە پەێڕەو ت."
[29] عیسایش وە پێان وەت: "وە ڕاس وە پیدان بۊشم، هەرکەس ماڵ یا ژن یا برایل یا داڵگ و باوگ یا مناڵ خوەێ وە خاتر پاشاێەتی خوداوەن وە جێ بیلێدن،
[30] لە ئێ ژیانە فرە فرەترە وە دەس تیەرێدن و لە ئەو دنیایش وە ژیان ئەبەدی ڕەسێدن."
[31] ئێکە عیسا هەر دوانزە شاگردەگەێ برد وە سۊکێگ و وە پێان وەت: "بنووڕن، یەسە چیمن وە ئورشەلیم، هەر چشتێگیش ک لە باوەت کوڕ ئاێەمەو وە دەس پەێقەمەریل نۊسیاس ئتفاق کەفێدن.
[32] لە ئەورە دریەێدن ئەو دەس خاوارەیل، تۊلەکی وە پێ کریەێدن، گەن وە پێ ئۊشیەێدن و تف کریەێدن لە ڕۊێ.
[33] دۊاێ شەلاخ دان، کوشنەێ و لە ڕووژ سێهم لەێ نوو زینێەو بوودن."
[34] ئمان ئەوان هیچ لە ئێ باسەیلە نەڕەسینەو. لە ڕاسیا، هەرچێگ ک ئەۊ وەت لە ئەوان ئەوشاریاۊدنەو، سە ئەوان لە قسیەگانێ نەڕەسینەو.
[35] وەختێگ وە ئەریحا نزیکەو بۊ، ئاێەم کوورێگ لە کمار ڕێەگە نیشتۊدن وە گێای کردن.
[36] هەناێ دەنگ ئێ جماعەتە ئەژنەفت ک لە پسا وەورا ڕەێ بۊن، پرسی لەێرە چ خەوەرە.
[37] لە جواوێ وەتن: "عیساێ ناسری پسا وەێرا چوودن."
[38] ئمجا ئەۊیش هاوار کرد: "عیسا، هەێ کوڕ داوت، ڕەحمێگ وە حاڵم بکە!"
[39] ئەوانە ک لە ئەو نواوە بۊن، خوڕیان لە لێ تا نقێ بووڕێد، ئمان ئەۊ تاهەێ وە دەنگ بەرزتر هاوار کرد، "کوڕ داوت، ڕەحمێگ وە حاڵم بکە!"
[40] عیسا وسا و فەرمان دا تا ئەو پیاوە بارن وە لاێ. هەناێ هاتەو نزیکتر، لە لێ پرسێار کرد:
[41] "لە م چوە توایدن تا ئڕاد بکەم؟" ئەۊیش جواو دا: "گەورەم، توام بتوانم بۊنم."
[42] عیسایش وە پێ وەت: "بۊن! باوەڕد شەفاد دا."
[43] دەریدەم بینائی هاتەو وە چەوەیلێ و کەفت ئەو شوون عیسا و شکرانەێ خودا کرد. گشت جماعەتەگەیش وەختێگ ئێ کردارە دین، زکر خودا کردن.