[1] جارێگ عیسا لە شوونێگ دوا کرد، وەختێگ دواگەێ بردەو پەرتخ، یەکێگ لە شاگردەگانێ وە پێ وەت: "گەورەم، وە پیمان نیشان بێە چۊن دوا بکەیمن، هە ئەو چۊنە ک یەحیا نیشان شاگردەگانێ دا."
[2] ئەۊیش وە پێان وەت: "وختێگ خوازین دوا بکەین، بۊشن: باوگە، ناو ت پیرۆز و موقەدەس بمینێد، پاشاێەتید داێر بوودن.
[3] نان ڕووژانەێ هەر ڕووژمان بێە وە پیمان.
[4] گوناگانمان بوەخش، چۊن ئیمەیش ئەوانە ک گەنی وە پیمان کردنە بەخشیمن. مەیلا نەکەفیمن لە ئمتەحان."
[5] ئمجا وە پێان وەت: "ئێ چۊنەو فەرز بکەن ک دووسێگ دێرین، نیمەشەو چینە لاێ و ئۊشین، 'ڕەفیق، سێ گلە نان وە قەرد بێە وە پیم،
[6] چۊن ک هاوڕێێگم هاتێە وە لام و ئلان چشتێگ نەێرم بنەم لە وەر دەسێ.'
[7] ئمجا ئەۊ لە ناوەو جواو دەێدن: 'دۊزەمەد بخە لا، دەرانەگە پشتکووڵێ دریاس، خوەم و مناڵەگان هایمن لە توو جێەگانمان. نیەتوانم هەڵسم و چشتێگ بێەم وە پید.'
[8] وە پیدان ئۊشم، تاهەێ ئەگەر ئەۊ وە خاتر دووساێەتی نەڵسێدن و نانێگ وە پێ نێەێدن، دەس ئاخر وە خاتر کوتران کردن دووسەگەێ هەڵسێدن و هەوەجەگەێ خەێدن ئەو ڕێ.
[9] سە وە پیدان ئۊشم، بتوان تا وە پیدان بێریەێدن، بگەردن تا بۊنینەو، دەر بتەقنن تا دەرەگە ئڕادان واز بوودن.
[10] چۊن هەرکەس ک بتواێدن، وە دەس تیەرێدن و هەرکەسێگ ک بگەردێدن دۊنێدنەو و ئڕەێ هەرکەسێگ ک تەقە بەێدن لە دەر، دەرانەگە واز کریەێدن.
[11] "ئایا کەسێگ لە ناودان هەس، ک وەختێگ ک مناڵەگەێ ماسیێگ لە لێ بخوازێدن، مارێگ لە جێ ماسی بێەێدن وە پێ؟
[12] یا ئەگەر مناڵەگە خاێگ بخوازێدن، کوڵەنجیێگ بەێدن وە پێ؟
[13] سە ئلان ک ئێوە وە سەر خراوەکار بۊندانەو زانین ک باێە چشت خاس وە مناڵەگاندان بێەین، ئمجا بزانن ک باوگ ئاسمانی چەنێگ فێشتر وە ڕووحۆلقودووس دەێدن، ئڕا ئەوانە ک لە لێ بخوازن!"
[14] یەێ جا، عیسا لە پسا مڵەێکەتێگ لە گیان پیاوێگەو کرد، ک لاڵ بۊ. وەختێگ مڵەێکەتەگە لاچێ، پیاوە لاڵەگە هاتەو قسیە، مەردمان گشت سەرسام مەنن.
[15] ئمان بڕێگ لە لێان وەتن: "عیسا وە دەسڵات بەئەلزەبووڵ، ک سەرداڵگانەێ مڵەێکەتەیلە، توانێدن مڵەێکەتەیل لە کووڵ مەردمەو بکەێدن"
[16] یەێ بڕ ترەکیش لە لێان ئڕا یە ک دپیەکێ بکەنەو، لە لێ خوازین مەوجزەێگ لە ئاسمانا ئڕاێان بارێدن.
[17] ئمان چۊن عیسا زانس ئەوان لە ناو خوەێان چوە فکر کەن وە پێان وەت: "لە ناو هەر پاشاێەتیێگ دوبڕەکی بکەفێدن، بوودن وە بیاوان چووڵ، هەر ماڵێگیش وە دوبڕەکی ڕمیەێد و خاپۊر بوودن.
[18] ئێوە ئۊشین ک م مڵەێکەتەیل وە هاز و تواناێ بەئەلزەبووڵ ئەو دەیشت ڕانم. سە ئەگەر شەێتان لەێوا لە وەراێوەر خوەێ وساس، جا چۊن پاشاێەتیەگەێ توانێدن وە پاوا بووسێدن؟
[19] خوو ئەگەر م وە تواناێ بەئەلزەبووڵ ئەوان کەمەو دەیشت، ئمجا هاوکوڕەیل ئێوە وە تواناێ کی ئێ کارە کەن؟ سە لەێوا ئەوان بوون وە قازیدان.
[20] ئمان ئەگەر م وە سەرپەنجەێ خودائی مڵەێکەتەیل ئەو دەیشت کەم، سە بزانن پاشاێەتی خوداوەن هاتێەسەو دیاردان.
[21] وەختێگ کابراێ زووردار، پڕ چەک و ئسڵا، قڵاچەێ میلکان خوەێ وریاێ بکەێدن، مڵک و ماڵێ ها لە ئامان.
[22] ئمان وەختێگ کەسێگ لە خوەێ تواناتر حەمڵە بارێدن وە پێ و زێف لە لێ بکەێدن، ئەو چەک و ئسڵا ک ئەۊ وە پێ دڵ بەساۊدن لە لێ سێنێدنەو و خارەتەگەیشێ بەش بەشەو کەێدن.
[23] هەرکەسێگ ک ئەول منا نیە، دژمن منە، هەرکسیش ک ئەول منا گردەو نەکەێدن، پەخش و پڵاوە کەێدن."
[24] "هەناێ جن خوو لە گیان کەسێگ دەرچوودن، لە منەی شوونێگ ئڕەێ داکاسیان، وەیلان هەڵەتەیل وشک بوودن، ئمان چۊن شوونێگ نیەۊنێدنەو، ئەول خوەێا ئۊشێدن: 'چمەو وە ئەو میلکانە ک لە لێەو هاتمە.'
[25] وەختێگ تیەێدنەو و میلکانەگەێ خوەێ گزێ دریاێ و تەمیس دۊنێدن،
[26] سە ئمجا چوودن هەفت گلە جن خوو ترەک، لە خوەێ خراوەتر ئەول خوەێا تیەرێدن و وە یەکەو چن لە گیان کابرا و لە ئەورە ژیەن. سە ڕووزێار لەوە ئەو دۊاێ کابرا فرە لە ئەوەڵ گەنترەکەو بوودن."
[27] لەێ بەێنە ک عیسا لە پسا ئێ قسیەیلە کرد، ژنێگ لە ناو جماعەتەگەێا دەنگ بەرزەو کرد و وە پێ وەت: "خوەزێمەو ئەو داڵگە ک وە ت دگیانەو بۊە و شیر لە دەم ت ناس!"
[28] ئمان عیسا وەت: "تاهەێ خوەزێمەو ئەوانە ک کەڵیمەێ خودا ئەژنەون و وە قەوڵێ کەن."
[29] وەختێگ جماعەت لە پسا فرەوا بۊ، ئەۊیش دەس کرد وە قسیە کردن و وەت: "ئێ نەسڵە، نەسڵ خراوەێگن ک داێەم داواێ مەوجزەێگ کەن. ئمان هیچ مەوجزەێگ بێجگە لە مەوجزەێ یوونس وە پێان نیەێریەێدن.
[30] چۊن هەر ئەو جوورە ک یوونس ئڕا مەردمان نەینەوا بۊ وە مەوجزە، کوڕ ئاێەمیش ئڕا ئێ نەسڵە بوودن وە مەوجزە.
[31] مەلەکەێ جنووب لە ڕووژ قەزاوات دژ وە ئێ نەسڵە وسێدن و ماکوومێان کەێدن، چۊن ئەۊ لە ئەو پەڕ دنیاوا هات وە خزمەت سڵەێمان تا گووش لە حکمەت سڵەێمان حشمەتلا بتەکنێدن، ئمان بنووڕن، لە ئێرە کەسێگ گەوراتر لە سڵەێمان وساس!
[32] مەردمان نەینەوا لە ڕووژ قەزاوات دژ وە ئێ نەسڵە وسن و ماکوومێان کەن، چۊن وەختێگ یوونس کەلیمەێ خودا ئڕاێان کرد، تەوبە کردن، ئمان بنووڕن، کەسێگ گەوراتر لە یوونس لە ئێرە وساس!"
[33] "هیچکەس چراخێگ دەم نیەێدن تا لە ژێر کەمووڵەێگ بشارێدنەوەێ، ئمان نەێدنەێ وە بان چراخدانێگەو تا ئەوانە ک ئەو ناو تیەن نۊرەگەێ بۊنن.
[34] چەود چراخ گیاندە. ئەگەر چەود ئازا بوودن، تمام گیاند پڕ لە نۊرە، ئمان ئەگەر ئازا نەودن، گیاند پڕ لە تیەریکیە.
[35] سە وشیار بوو تا ئەو نۊرە ک ها لە گیاند تیەریکان نەودن.
[36] جا ئەگەر تمام گیاند پڕ بوودن لە ڕووژنای و هیچ سۊکێگ لە تیەریکان تێا نەودن، گیاند پڕ بوودن لە نۊر، وێنەێ وەختێگ ک لامپێگ وە ورشە ورشە خوەێ ڕووژنادەو بکەێدن."
[37] لەێ بەێنە ک عیسا لە پسا قسیەگانێ کرد، فریسیێگ داواتێ کرد تا وە یەکەو نان بخوەن. ئمجا عیسا چێ وە ماڵ کابرا و نیشتەو سەر سفرە.
[38] ئمان فریسیەگە ک دی عیسا وەرجلە نان خواردن دەسەیلێ نەشوورد، حەێران مەن.
[39] ئێکە ئمجا عیساێ خاوەن شکۆ وە پێ وەت: "ئێوە فریسیەیل دەور پیاڵە و دەوری پاکەو کەین، ئمان دەرۊندان پڕ لە چڵێسی و گەنەکاریە.
[40] گەوج! مەگەر ئەو کەسە ک دەیشت درس کردێە، ناویش درس نەکردێە؟
[41] سە لە ئەو چشتەیلە ک لە ناو پیاڵە و دەوری دیرین سەدەقە بێەن، تا بۊنین ک کول چشتێگ ئڕادان پاکەو بوودن.
[42] "ئمان گەن وە حاڵدان فریسیەیل! چۊن ئێوە تاهەێ دایەک نانا و ڕازێانە و هەر جوور سەونزی ترەکیش دەین، ئمان دادپەروەری و عشق خودا لە هۊرەو بەین. وە ڕاس باێە یانە گشتێ بکریەن بێ یە گ چشتەیل ترەک لە هۊرەو بوریەن.
[43] "گەن وە حاڵدان فریسیەیل! چۊن ئێوە خوەشدان تیەید لە ڕەدیف یەکم لە ناو کەنێشت بنیشین و لە بازاڕەگان مەردمان دەس ئڕادان بنەن لە سینێ.
[44] گەن وە حاڵدان فریسیەیل! چۊن ئێوە مینین وە قەورەیلێگ بێ سان قەور ک مەردمان وە بانێانا ڕەێ بوون بێ یە ک لە لێان بڕەسنەو."
[45] یەکێگ لە تەوراتناسەگان لە جواوێ وەت: "مامووسا، وە ئێ قسیەیلدەو تیر و تەزەکەیلێگیش خەیدنەو پیمان!"
[46] ئەۊیش وەت: "گەن وە حاڵ ئێوەیش بوودن هەێ تەوراتناسەیل! چۊن ئێوە بارەیل گەوراێگ وە مل مەردمانا خەین ک کیشانێان سەختە و خوەدانیش تاهەێ وە تک کلگێگ دەسمیەت کەسێگ نیەین.
[47] "گەن وە حاڵدان! چۊن ئێوە گومەزە ئڕەێ قەور پەێقەمەریلێگ درس کەین، ک یە باوگ و باپیرەیل ئێوە بۊن ک کوشتنەێان.
[48] سە ئێوە شاتین و کارەیل باوگ و باپیرەیلدان قەبوول دێرین، ئڕا یە ک ئەوان کوشتنەێان و ئێوە قەور ئڕاێان سازین.
[49] وە ئێ بوونەوە حکمەت خودائی وەتێە: 'پەێقەمەر و کلکەردەیلێگ ئڕاێان کل کەم، بازێگ لە لێان کوشن و ئازاراێان دەن.'
[50] سە خۊن گشت پەێقەمەرەیل لە بنەواێ دنیاێا ها وە مل ئێ نەسڵەو،
[51] لە خۊن هابیل بگر تا وە زەکەریا، ک لە ناوهەێن قوروانگا و پەرەستگا کوشیا. وە ڕاس وە پیدان بۊشم ک ئێ حەقە لە ئێ نەسڵە ئەوسێنیەێد.
[52] "گەن وە حاڵدان هەێ تەوراتناسەیل! ک کلیل زانێاری بردینە، خوەدان ئەو ناو نەچین و کەس تریش نیەیلین بچوودن ئەو ناو."
[53] هەناێ عیسا هاتەو ئەو دەیشت، ئاخونەیل شەریعەت و فریسیەیل قاڵ لە لێ تەنگەو کردن و لە فرە باوەت لە لێ پرسێار کردن
[54] و چەوەنووڕ یە بۊن تا قسیەێگ لە دەم خوەێ بگرن و وە پێ ماکوومێ بکەن.