[1] “ለኤፌሶን ቤተ ክርስቲያን አለቃ እንዲህ ብለህ ጻፍ ፥ ሰባቱን ከዋክብት በቀኝ እጁ የያዘው፥ በሰባቱም የወርቅ መቅረዞች መካከል የሚሄደው እንዲህ ይላል ፥
[2] “ሥራህንና ድካምህን፥ ትዕግሥትህንም አውቃለሁ፤ ሳይሆኑም ሐዋርያት ነን የሚሉትን ክፉዎቹን መታገሥ እንዳልቻልህ፥ ሐሰተኟችም ሆነው እንደ አገኘሃቸው አውቃለሁ።
[3] ስለ ስሜም ብለህ ታገሥህ፥ ቻልህ፥ አልደከምህምም።
[4] ነገር ግን አንተን የምነቅፍበት ነገር አለኝ፤ የቀድሞ ፍቅርህን ትተሃልና።
[5] ከወዴት እንደ ወደቅህ ዐስብ፤ እንግዲህ ንስሓ ግባ፥ ያለዚያ ንስሓ ባትገባ የቀድሞ ሥራህንም ባትሠራ ፈጥኜ እመጣብሃለሁ፤ መቅረዝህንም ከቦታዋ አነሣታለሁ።
[6] ነገር ግን ይህ አለህ፥ እኔ እንደምጠላው የኒቆላውያንን ሥራ ትጠላለህና።
[7] መንፈስ ቅዱስ ለአብያተ ክርስቲያናት የሚለውን ዦሮ ያለው ይስማ። ድል ለነሣው፥ በአምላክ ገነት ውስጥ ካለው ከሕይወት ዛፍ እንዲበላ እሰጠዋለሁ።
[8] “ለሰሚርኔስ ቤተ ክርስቲያን አለቃ እንዲህ ብለህ ጻፍለት ፥ ፊተኛውና መጨረሻው፥ ሞቶም የተነሣው እንዲህ ይላል።
[9] መከራህንና መቸገርህን አውቃለሁ፤ ነገር ግን አንተ ባለጠጋ ነህ፤ የሰይጣን ማኅበር ናቸው እንጂ ሳይሆኑ አይሁድ ነን የሚሉትን ስድባቸውን አውቃለሁ፤
[10] ትቀበለውም ዘንድ ስላለህ መከራ፥ ምንም አትፍራ፤ እነሆ እንድትፈተኑ ሰይጣን ከእናንተ አንዳንዶችን ወደ እስር ቤት እንዲገቡ ያደርጋል፤ ዐሥር ቀንም መከራ ትቀበላላችሁ፤ እስከ ሞት ድረስም የታመንህ ሁን፤ የሕይወት አክሊልንም እሰጥሃለሁ።
[11] መንፈስ ቅዱስ ለአብያተ ክርስቲያናት የሚለውን ዦሮ ያለው ይስማ፤ ድል የነሣ ሁለተኛውን ሞት አይሞትም።
[12] “ለጴርጋሞን ቤተ ክርስቲያን አለቃ እንዲህ ብለህ ጻፍ ፥ ሁለት አፍ የሆነ፥ የተሳለ ሰይፍ ያለው እንዲህ ይላል ፥
[13] የሰይጣን ዙፋን ባለበት የምትኖርበትን አውቃለሁ፤ ስሜንም ትጠብቃለህ፤ ሰይጣን በሚኖርበት ቦታ የታመነው ምስክሬ አንቲጳስ በእናንተ ዘንድ በተገደለበት ዘመን እንኳ ሃይማኖቴን አልካድህም።
[14] ነገር ግን አንተን የምነቅፍበት ጥቂት ነገር አለ፤ የባላቅ መምህር የበለዓምን ትምህርት አጽንተው የያዙ፥ ለጣዖት የታረደውን እንዲበሉና እንዲሰስኑ፥ በእስራኤል ልጆች ፊት ዕንቅፋት የሚያኖሩ በዚያ ካንተ ጋር አሉና።
[15] እንዲሁም የኒቆላውያንን ትምህርት እንደ እነዚህ የሚከተሉ ባንተ ዘንድ አሉ።
[16] እንግዲህ ንስሓ ግባ፤ ያለዚያ ፈጥኜ እመጣብሃለሁ፤ ከአፌ በሚወጣም ሰይፍ እወጋቸዋለሁ።
[17] መንፈስ ቅዱስ ለአብያተ ክርስቲያናት የሚለውን ዦሮ ያለው ይስማ። ድል ለነሣው ስውር መናን እሰጠዋለሁ፤ የብርሃን መጽሐፍንም እሰጠዋለሁ፤ በዚያ መጽሐፍ ውስጥም ከተቀበለው በቀር ማንም የሚያውቀው የሌለ አዲስ ስም ተጽፎበታል።
[18] “ለትያጥሮን ቤተ ክርስቲያን አለቃ እንዲህ ብለህ ጻፍለት ፥ ዐይኖቹ የእሳት ነበልባል የሚመስሉ፥ እግሮቹም በእሳት የነጠረና የጋለ ናስ የሚመስሉ የእግዚአብሔር ልጅ እንዲህ ይላል።
[19] ሥራህንና ፍቅርህን፥ እምነትህንም፥ አገልግሎትህንም፥ ትዕግሥትህንም የኋለኛዪቱ ሥራህም ከፊተኛይቱ ይልቅ እንደምትበዛ አውቃለሁ።
[20] ነገር ግን አንተን የምነቅፍበት ነገር አለኝ፤ ሳትሆን ራስዋን ነቢይት ነኝ የምትለውን፥ አገልጋዮቼንም ለጣዖት የተሠዋውን እንዲበሉና እንዲሴስኑ የምታስተምረውንና የምታስተውን ያችን ሴት ኤልዛቤልን ዝም ብለሃታልና።
[21] ንስሓ እንድትገባም ጊዜ ሰጠኋት፤ ነገር ግን፥ ከዝሙቷ ንስሓ መግባትን እንቢ አለች።
[22] እነሆ፥ ወደ ቀደመ መኝታዋ እመልሳታለሁ፤ ከእርስዋም ጋር የሚያመነዝሩትን ከሥራቸው ንስሓ ባይገቡ ወደ ጽኑዕ ሥቃይ አገባቸዋለሁ።
[23] ልጆችዋንም በሞት እገድላለሁ፤ አብያተ ክርስቲያናትም ሁሉ ልብንና ኵuላሊትን የምመረምር እኔ እንደ ሆንሁ ያውቃሉ፤ ከእናንተም ለእያንዳንዳችሁ እንደ ሥራችሁ እከፍላችኋለሁ።
[24] በትያጥሮን ለቀራችሁት፥ ይህም ትምህርት ለሌላችሁ፥ የሰይጣንንም ሽንገላ እነርሱ እንደሚሉት ለማታውቁአት ለእናንተ እንዲህ እላለሁ ፥ ሌላ ሸክም አላሸክማችሁም።
[25] ነገር ግን እስከምመጣ ድረስ ያላችሁን ጠብቁ።
[26] ድል ለነሣውና ሥራዬን እስከ መጨረሻ ለጠበቀው በአሕዛብ ላይ ሥልጣንን እሰጠዋለሁ።
[27] በብረት በትርም ይጠብቃቸዋል፤ እንደ ሸክላ ዕቃም ይቀጠቅጣቸዋል።
[28] እኔ ከአባቴ እንደ ተቀበልሁ የአጥቢያ ኮከብን እሰጠዋለሁ።
[29] መንፈስ ቅዱስ ለአብያተ ክርስቲያናት የሚለውን ዦሮ ያለው ይስማ።