[1] ከዚህም በኋላ ፥ “ሃሌ ሉያ ማዳንና ክብር፥ ኀይልም ለአምላካችን ነው፤
[2] በዝሙቷ ምድርን ያጠፋችውን ታላቂቱን ጋለሞታ ስለ ፈረደባት የባሪያዎቹንም ደም ከእጅዋ ስለ ተበቀለ ፍርዱ እውነትና ጽድቅ ነው ” የሚል እንደ ብዙ ሰው ድምፅ ያለ ታላቅ ድምፅን ከሰማይ ሰማሁ።
[3] ዳግመኛም “ሃሌ ሉያ፥ ጢስም ለዘለዓለም እስከ ዘለዓለም ይወጣል ” አሉ።
[4] እነዚያ ሀያ አራቱ አለቆችና አርባዕቱ እንስሳም በቅዱስ ዙፋን ላይ ለተቀመጠው ለእግዚአብሔር ፥ “አሜን፥ ሃሌ ሉያ ” እያሉ ሰገዱ።
[5] ከሰማይም ከዙፋኑ ፥ “ባሪያዎቹ ሁሉ፥ እርሱንም የምትፈሩት ታናናሾችና ታላላቆች ሆይ፥ አምላካችንን አመስግኑ ” የሚል ድምፅ ወጣ።
[6] ከዚህም በኋላ እንደ ብዙ ሰው ድምፅ፥ እንደ ብዙ ውኃም ድምፅ፥ እንደ ነጐድጓድም ድምፅ ያለ ድምፅ ሰማሁ፤ እንዲህ ሲል ፥ “ሃሌ ሉያ ሁሉን የሚገዛ አምላካችን እግዚአብሔር ነግሦአልና።
[7] የበጉ ሰርግ ስለ ደረሰ፥ ሙሽራይቱም ራስዋን ስላዘጋጀች ደስ ይበለን፤ ሐሤትም እናድርግ፤ ለእርሱም ክብርን እናቅርብ።
[8] ንጹሕ የብርሃን ልብስም እንድትለብስ ተሰጣት፤ ያም የብርሃን ልብስ የቅዱሳን ጽድቅ ነው።”
[9] እርሱም ፥ “ወደ በጉ ሰርግ በዓል የተጠሩ ብፁዓን ናቸው ” ብለህ ጻፍ አለኝ፤ ደግሞም ፥ “ይህ የእግዚአብሔር እውነተኛ ቃል ነው ” አለኝ።
[10] ከእግሩ በታችም ወድቄ ሰገድሁለት፤ እንዲህም አለኝ ፥ “እኔም እንደ አንተ፥ ከአንተም ጋር፥ የኢየሱስን ምስክርነት ከሚጠብቁት ወንድሞችህ ጋር አገልጋይ ነኝና እንዳትሰግድልኝ ተጠንቀቅ፤ ነገር ግን ለእግዚአብሔር ስገድ፥ የኢየሱስ ምስክር የትንቢት መንፈስ ነውና።”
[11] ከዚህም በኋላ ሰማይ ተከፍቶ አየሁ፤ እነሆም፥ አምባላይ ፈረስ ወጣ፤ የተቀመጠበትም የታመነና እውነተኛ ይባላል፤ በጽድቅም ይፈርዳል፤ ይዋጋልም።
[12] ዐይኖቹም እንደ እሳት ነበልባል ናቸው፤ በራሱም ላይ ብዙ ዘውዶች አሉ፤ ከእርሱም በቀር አንድ እንኳ የማያውቀው የተጻፈ ስም አለው።
[13] በደም የታለለ ልብስም ለብሶአል፤ ስሙንም “ቃለ እግዚአብሔር ” አሉት።
[14] የሰማይ ጭፍሮችም ንጹሕ የብርሃን ልብስ ለብሰው፥ በአምባላዮች ፈረሶችም ተቀምጠው፥ ይከተሉት ነበር።
[15] አሕዛብንም ይመታበት ዘንድ፥ ከአፉ የተሳለ ሰይፍ ይወጣል፤ እርሱም በብረት ዘንግ ይጠብቃቸዋል፤ እርሱም ሁሉን የሚገዛ፥ የእግዚአብሔርን የቐጣውን መቅሠፍት ወይን መጭመቂያ ይረግጣል።
[16] በልብሱ ላይና በጎኑ ላይ፥ “የነገሥታት ንጉሥ፥ የጌቶች ጌታ ” የሚል ስም ተጽፎበታል።
[17] ከዚህም በኋላ አንድ መልአክ በፀሓይ ላይ ቆሞ አየሁ፤ በታላቅ ቃልም እየጮኸ በሰማይ መካከል ለሚበርሩ አዕዋፍ ሁሉ እንዲህ አለ ፥ “ኑ ወደ ታላቁ ወደ እግዚአብሔር በዓል ተሰብሰቡ።
[18] የነገሥታቱን ሥጋ፥ የሻለቆቹንም ሥጋ፥ የኀያላኑንም ሥጋ፥ የፈረሶችንና የፈረሰኟችንም ሥጋ፥ የጌቶችንና የባሪያዎችንም ሥጋ፥ የታናናሾችንና የታላላቆችንም ሥጋ ትበሉ ዘንድ ተሰብሰቡ።”
[19] ከዚህ በኋላ፥ ያ ቀድሞ ያየሁት አውሬ ወጣ፤ የምድር ነገሥታትም፥ ያን በአምባላይ ፈረስ የተቀመጠውን ከነሠራዊቱ ይወጉት ዘንድ ከነሠራዊታቸው ከእርሱ ጋር ተሰብስበው አየሁ።
[20] ከዚህም በኋላ አውሬው ተያዘ፤ በእርሱም ፊት ተአምራትን አደረገ፤ የአውሬውንም ምልክት የተቀበሉትን፥ ለምስሉም የሰገዱትን ያሳተ ሐሰተኛው ነቢይ ከእርሱ ጋር ተያዘ፤ ሁለቱም በሕይወት ሳሉ በዲን ወደሚቃጠል ወደ እሳት ባሕር ተጣሉ።
[21] የቀሩትም በፈረስ ላይ ከተቀመጠው ከአፉ በሚወጣው ሰይፍ ተገደሉ፤ የሰማይ ወፎችም ሁሉ ከሥጋቸው ጠገቡ።