[1] Wa laakin al-dalaam ma yagood daayman fi l-balad al-gaaʼide fi l-taʼab. Zamaan Allah ayyab turaab Zabuluun wa turaab Naftaali. Wa laakin fi l-mustakhbal, yicharrif al-derib al-jamb al-bahar khaadi le bahar al-Urdun wa daar al-Jaliil, daar al-ajaanib.
[2] Al-chaʼab al-maachiin fi l-dalaam yichiifu nuur aziim. Aywa, al-saakniin fi balad al-dalaam al-haalik, nuur yibiin leehum.
[3] Ya Rabb ! Inta kattart naas al-umma di wa kabbart farahhum. Wa yafraho giddaamak misil farah hana yoom al-gatiʼ wa farah hana gisim al-khaniime.
[4] Achaan inta rafaʼt al-tagala al-fooghum wa l-daami al-fi kataafeehum wa kassart asaat al-mudaayig misil najjeethum min naas Midyaan // fi l-yoom daak.
[5] Wa ayyi naʼaal adu al-tafjakh wa tirajjif wa ayyi khalag al-dassooh fi damm, khalaas yazguluuhum fi ambalbaala wa l-naar taakulhum.
[6] Achaan wildo leena sakhiir wa l-wileed da, antooh leena. Wa l-sulta tabga fi iideenah wa yinaaduuh be l-asaame dool, al-Mustachaar al-Ajiib wa l-Ilaah al-Gaadir wa l-Abu al-Daayim wa Malik al-Salaam.
[7] Wa yikabbir sultitah wa salaam bala hadd fi kursi al-muluk hana Dawuud. Wa mamlakatah tasbit wa tabga gawiiye fi l-hagg wa l-adaala min al-yoom wa ila l-abad. Wa be mahabbitah al-chadiide, Allah al-Gaadir yisawwi al-cheyy da.
[8] Al-Rabb rassal kalaam // didd zurriiyit Yaakhuub, aywa, al-kalaam wagaʼ // fi Bani Israaʼiil.
[9] Al-chaʼab kulluhum yaʼarfuuh. Humman gabiilat Afraayim wa sukkaan madiinat al-Saamira. Kulluhum be fachaar wa galib mutakabbir yuguulu :
[10] «Diringeel al-durdur wagaʼ laakin aniina nabnuuh battaan be hajar mugassas. Chadar al-jimmeez gattaʼooh laakin aniina nimaggunu chadar al-arz fi badalah.»
[11] Wa Allah yansur fooghum khusmaan Rasiin wa yanti silaah le udwaanhum.
[12] Araam fi l-sabaah wa l-Filistiyiin fi l-kharib yaakulu Bani Israaʼiil akle waahide. Wa be da kula, zaʼal Allah ma yagiif wa iidah gaaʼide marfuuʼa le l-ikhaab.
[13] Al-chaʼab ma gabbalo le Ilaahhum al-darabaahum wa ma fattacho Allah al-Gaadir.
[14] Wa khalaas fi yoom waahid bas, Allah yagtaʼ min Israaʼiil al-raas wa l-danab wa l-nakhal wa l-ageeg.
[15] Al-kubaaraat wa l-ajaawiid, humman al-raas. Wa l-anbiya al-yitnabbaʼo be kidib, humman al-danab.
[16] Al-kubaaraat al-yuguudu al-chaʼab waddaroohum wa l-chaʼab dool addammaro marra waahid.
[17] Wa fi chaan da, al-Rabb ma yafrah be subyaanhum wa ma yihinn fi ataamaahum wa araamilhum. Achaan humman kulluhum kuffaar wa fasliin wa kulla khuchuumhum yikallumu be kalaam al-tamaasa. Wa be da kula, zaʼalah ma yagiif wa iidah gaaʼide marfuuʼa le l-ikhaab.
[18] Achaan fasaalithum tahrig misil al-naar al-taakul al-chook wa l-haskaniit wa titichch chadar al-khaaba wa titalliʼ ale l-sama // amuud hana dukhkhaan.
[19] Min chiddit khadab Allah al-Gaadir, al-balad tahrag wa l-chaʼab yabgo hatab al-naar wa ma fi naadum al-yihinn fi akhuuh.
[20] Wa akalo ale l-zeene // wa gaaʼidiin be l-juuʼ wa akalo ale l-isra // wa ma chibʼo wa ayyi waahid yaakul laham jisim gariibah.
[21] Gabiilat Manassa tugumm didd gabiilat Afraayim wa gabiilat Afraayim tugumm didd gabiilat Manassa wa kulluhum sawa yugummu didd Bani Yahuuza. Wa be da kula, zaʼalah ma yagiif wa iidah gaaʼide marfuuʼa le l-ikhaab.