[1] Al-azaab le Ariyiil al-hi Madiinat al-Khudus, Ariyiil al-madiina // al-Dawuud hajamha ! Kan yiʼayyudu aʼyaadha sana baʼad sana kula,
[2] nidaayig Ariyiil. Wa yukuun foogha al-chakwa wa l-ganitiin wa Ariyiil tabga leyi misil madbah al-yiharrugu foogah dahaaya.
[3] Ya Madiinat al-Khudus, naji be askari wa nihawwigki wa nugumm diddiki wa nihaasirki wa nabni khanaadig wara durdurki.
[4] Inti tagaʼe wa hissiki yinsamiʼ min daakhil al-ard wa kalaamki jaayi tihit min al-turaab. Wa hissiki yatlaʼ min al-ard misil al-gamma min al-moot wa tikhaali min daakhil al-turaab.
[5] Wa laakin fi ramchit een bas, udwaanki al-katiiriin yabgo misil al-dagiig al-marhuuk. Aywa, siyaad al-unuf al-katiiriin yabgo misil al-uttaab al-chaayle al-riih.
[6] Wa Allah al-Gaadir yaji leeki be raʼad wa zilzaal wa haraka chadiide wa zoobaʼaane wa riih chadiide wa ambalbaala hana naar al-tahrig.
[7] Wa misil hilim walla ruʼya be l-leel, al-deech min al-umam // al-hajamo madiinat Ariyiil yiwadduru. Aywa, dool kulla l-naas al-haarabooha wa haasaro daraadirha wa daayagooha.
[8] Da yabga misil al-jiiʼaan al-yahlam gaaʼid yaakul wa laakin kan yugumm min al-noom, hu yihiss be l-juuʼ. Wa da yabga misil al-atchaan al-yahlam gaaʼid yachrab almi wa laakin kan yugumm min al-noom, hu yihiss be l-aya wa l-atach. Wa misil da, yabga le kulla l-umam al-yihaarubu jabal Sahyuun.
[9] Alʼajjabo wa anbahato ! Abgo amyaaniin ma tichiifu ! Askaro wa laakin ma be khamar wa attartaʼo wa laakin ma be mariise.
[10] Achaan Allah nazzal foogku ruuh hana noom. Hu sadda uyuun anbiyaaku wa khatta wujuuh naasku // al-yichiifu ruʼya.
[11] Wa khalaas, kulla l-ruʼya di bigat leeku misil kalaam kitaab makhtuum al-yantuuh le l-naadum al-yaʼarif yagri wa yuguulu leyah : «Agriih !» Wa hu yuguul : «Ana ma nagdar nagriih achaan al-kitaab da makhtuum.»
[12] Wa yantu al-kitaab da // le l-ma yaʼarif yagri wa yuguulu leyah : «Agriih !» Wa hu yuguul : «Ana ma naʼarif nagri.»
[13] Wa Rabbi gaal : «Al-chaʼab dool yigarrubu leyi be kalaam khuchuumhum. Yimajjuduuni be lisneehum bas wa laakin guluubhum baʼiid minni. Wa khoofhum minni, da min wasiiye al-humman allamooha // min al-naas bas.
[14] Wa fi chaan da, ana niwassif leehum ajab baʼad ajab wa hikmat al-hukama tiwaddir wa fihim al-faahimiin // yabga ma fiih.»
[15] Al-azaab le l-yibaʼʼudu le yilabbudu khittithum min Allah wa fi bakaan adlam, yilabbudu khidmithum. Wa yuguulu : «Yaatu yichiifna wa yaatu yaʼarif khidmitna ?»
[16] Intu tikhalbutu kulla cheyy ! Hal daggaag al-jiraar yabga misil al-tiine walla ? Hal al-khidme tagdar tuguul // le l-khaddaam : «Inta ma kawwantini» ? Hal al-jarr yagdar yuguul le l-daggaag : «Inta ma indak fihim» ?
[17] Akiid fi wakit gariib, chadar Lubnaan yabga // jineene al-indaha fawaakih wa l-jineene tabga khaaba.
[18] Fi l-yoom da, al-turuch yasmaʼo kalaam al-kitaab wa l-amyaaniin yamurgu min al-dalaam wa l-sawaad // wa yichiifu.
[19] Wa l-masaakiin yafraho ziyaada be Allah wa fagraaniin al-chaʼab yinbastu be Khudduus Israaʼiil.
[20] Achaan al-mujrimiin yiwadduru wa l-chammaatiin yabgo ma fiihum wa l-yisawwu al-charr yikammulu.
[21] Wa l-yathamo al-naas fi l-kalaam wa l-yukujju charak // le yarmu al-naas fi l-chariiʼa wa l-yarmu al-saalih fi l-faadi, kulluhum yiddammaro.
[22] Wa fi chaan da, daahu Allah al-fada Ibraahiim gaal le zurriiyit Yaakhuub : «Battaan zurriiyit Yaakhuub ma yalgo eeb wa la yidanguru ruuseehum.
[23] Achaan wakit zurriiyit Yaakhuub yichiifu al-amal al-ana sawweetah // fi usuthum, khalaas yikhaddusu usmi. Aywa, yikhaddusuuni ana Khudduus Yaakhuub wa yarjufu giddaami ana Ilaah Bani Israaʼiil.
[24] Wa be da, al-juhhaal yalgo al-fihim wa l-gawwaaliin yalgo al-ilim.»