[1] «Ana bayyant nafsi le naas al-ma naadooni wa ana wassaft nafsi le naas al-ma fattachooni. Wa ana gult : ‹Daahuuni ana ! Daahuuni ana› le umma al-ma naadat usmi.
[2] Kulla yoom maddeet iideeni le chaʼab raashum gawi. Wa laakin humman chaayliin // derib ma adiil hasab afkaarhum.
[3] Humman chaʼab al-daayman yikhaddubuuni be niiyithum. Wa yadbaho le ilaahaathum fi l-jineenaat wa yiharrugu leehum bakhuur fi diringeel !
[4] Al-chaʼab dool yaskunu fi l-khubuur wa yisaahuru tuul al-leel fi bakaan sirri. Humman yaakulu laham al-khinziir wa mawaaʼiinhum malaaniin // be akil haraam.
[5] Wa yuguulu : ‹Ma tigarrib leena ! Wa ma tilammisna ! Aniina mukhassasiin ziyaada minnak !›» Wa Allah gaal : «Wakit nichiif amalhum da, nakhdab khadab misil al-naar al-gaaʼide tahrig kulla yoom.
[6] Chiifu ! Daahu al-kharaar al-maktuub giddaami. Ana ma nagdar naskut lahaddi nilkaffa foogku. Aywa, nilkaffa foogku tukfa kaamile
[7] achaan khataayaaku wa khata juduudku kulluhum. Wa da, Allah bas gaalah. Wa le l-yiharrugu al-bakhuur // fi ruuse al-jibaal wa le l-yiʼayyuruuni fi l-hujaar, ana nigaawis amalhum al-awwal be mikyaal kaamil.»
[8] Daahu Allah gaal : «Wa da misil ligo anguud al-foogah inab katiir talfaan wa yuguulu : ‹Ma tazguluuh kulla ke achaan waahidiin induhum baraka.› Misil da bas, ana nisawwi maʼa abiidi, ma nidammirhum kulluhum.
[9] Min Yaakhuub namrug zurriiye aywa, min Bani Yahuuza nijiib al-yawris jibaali. Ana azaltuhum yawrusuuhum aywa, abiidi yaskunu fooghum.
[10] Wa le chaʼabi al-yifattuchuuni, sahalat Chaaruun tabga // marʼa le l-khanam wa waadi Akuur yabga // bakaan raaha le l-bagar.
[11] «Wa laakin intu al-aakhariin, abeetuuni ana Allah. Wa nisiitu beeti bakaan al-ibaada fi jabali al-mukhaddas. Intu gaddamtu akil le ilaah Gaad wa kaas al-khamar le sanam Manaat.
[12] Laakin ana niwaddiiku tumuutu fi l-harib wa tarkaʼo giddaam al-yadbahooku. Achaan ana naadeetku wa intu ma raddeetu leyi. Wa ana kallamt leeku wa intu ma simiʼtu kalaami. Laakin intu sawweetu al-fasil giddaami wa azaltu al-ma nidoorah.»
[13] Wa fi chaan da, daahu Allah al-Rabb gaal : «Abiidi yaakulu wa laakin intu tujuuʼu. Abiidi yacharbo wa laakin intu taʼtacho. Abiidi yafraho wa laakin intu takhjalo.
[14] Abiidi yikooruku min farah guluubhum laakin intu tikooruku min wajaʼ guluubku wa tabku be hizin wa be ruuh muhattama.
[15] Wa l-naas al-ana azaltuhum yistaʼmalo usumku misil laʼana. Wa yuguulu : ‹Allah al-Rabb yaktulak // misil filaan !› Wa laakin le abiidi, // ninaadiihum be usum aakhar.
[16] Wa ayyi naadum al-yibaarik nafsah fi l-ard, yibaarik nafsah be usmi ana // Ilaah al-Hagg. Wa ayyi naadum al-yahlif fi l-ard, yahlif be usmi ana Ilaah al-Hagg. Achaan al-diige al-awwal tinnasi wa tillabbad baʼiid, ma nichiifha.»
[17] «Daahu ana nakhlig sama jadiid wa ard jadiide. Abadan ma tizzakkaro al-achya al-awwal wa ma yaju leeku fi fikirku.
[18] Laakin afraho wa anbastu ila l-abad fi chaan al-cheyy al-nakhalgah. Daahu nakhlig Madiinat al-Khudus wa tinmali be farah wa chaʼabha yinbastu.
[19] Wa ana nafrah be Madiinat al-Khudus wa ninbasit be chaʼabi. Wa battaan ma tinsamiʼ haraka hana baki wa la korooraak.
[20] Wa battaan al-tifil ma yumuut baʼad ayyaam wa l-chaayib ma yumuut // kan ma tamma ayyaamah. Achaan al-yumuut fi miya sana, yajʼalooh sabi. Wa l-yumuut gabul miya sana, yajʼalooh malʼuun.
[21] Aywa, chaʼabi yabnu buyuut wa humman zaathum yaskunu fooghum. Wa yimaggunu jineenaat inab wa yaakulu min fawaakihhum.
[22] Humman ma yabnu // le naadum aakhar yaskun wa la yimaggunu // le l-aakhar yaakul. Achaan ayyaam chaʼabi yabgo tuwaal misil ayyaam al-chadar al-kubaar. Wa l-naas al-ana azaltuhum yafraho be khidmit iideehum.
[23] Humman ma yaʼyo bala faayde wa la yaldo le l-moot. Achaan humman chaʼab al-baarakaahum Allah, humman wa zurriiyithum maʼaahum.
[24] Gubbaal ma yinaaduuni, ana nurudd leehum. Wa gubbaal ma yihajju, ana nasmaʼhum.
[25] Al-baʼachoom wa l-hamal // yartaʼo sawa wa l-duud misil al-toor // yaakul al-gechch laakin al-daabi yaakul al-ajaaj. Wa fi jabali al-mukhaddas, ma fi fasaala wa la damaar.» Wa da, Allah bas gaalah.