[1] Muhaakamat Masir. Daahu fi sahaabaay sariiʼe Allah jaayi fi Masir. Wa ilaahaat Masir gaaʼidiin yarjufu giddaamah wa l-Masriyiin galibhum angataʼ.
[2] Ana niharrich al-Masriyiin yilhaarabo, waahidiin yugummu // didd al-aakhariin. Ayyi waahid yugumm // didd akhuuh wa ayyi waahid yugumm // didd jaarah, madiina didd madiina wa mamlaka didd mamlaka.
[3] Wa ana niwaddir chajaaʼat al-Masriyiin wa nibarjil choorithum. Khalaas, humman yasʼalo al-ilaahaat wa l-chawwaafiin wa l-yikallumu maʼa l-maytiin wa l-yihajju maʼa l-jinn.
[4] Wa nisallim al-Masriyiin fi iid siid gawi wa hu malik jaayir yahkim fooghum. Wa da kalaam Allah al-Rabb al-Gaadir.
[5] Wa almi al-bahar yikammil wa l-Niil yaybas wa almi al-bahar yachrab wa hu yabga yaabis.
[6] Wa l-buhuur yinchammo afniin aywa, rujuul Masir yangusu wa yaybaso wa l-tibin wa l-birdi yijiffu.
[7] Wa l-gechch al-fi khachum al-Niil wa kulla nabaat al-Niil yaybaso wa yichittu wa yabgo ma fiihum.
[8] Wa l-hawwaatiin yaguntu wa l-yazgulu jambaathum // fi l-Niil yahzano wa l-yazgulu charakhum // fi khachum al-almi yiʼayyusu
[9] wa l-naas al-yakhdumu // fi l-kattaan yiʼiibu wa l-yitirru wa l-yuduggu al-tchaaka // achamhum yingatiʼ.
[10] Darraabiin al-tchaaka hana Masir yatʼabo wa kulla l-khaddaamiin al-muʼajjariin yazʼalo.
[11] Aywa, masaaʼiil hillit Suʼaan munaafikhiin wa l-hukama mustachaariin Firʼoon sawwo majlas hana mataamiis. Wa intu ! Kikkeef tagdaro tuguulu // le Firʼoon : «Ana wileed hukama. Ana wileed muluuk hana zamaan.»
[12] Ya Firʼoon, mustachaariinak ween ? Khalli yiʼooruuk wa yiʼallumuuk kharaar Allah al-Gaadir // al-chaalah didd Masir.
[13] Wa masaaʼiil hillit Suʼaan // ma induhum raas wa masaaʼiil hillit Mamfiis ankhachcho wa kubaaraat al-gabaayil // waddaro Masir.
[14] Wa Allah nazzal fi usuthum ruuh hana barjaal wa humman waddaro Masir // fi amalha al-tisawwiih misil wadaar al-sakkaari // fi lubb gadiifah.
[15] Wa naadum ma yagdar yisawwi cheyy le Masir wa la l-raas wa la l-danab wa la l-nakhal wa l-ageeg.
[16] Wa fi l-yoom da, naas Masir yabgo misil awiin wa yakhaafo wa yarjufu wakit yichiifu iid Allah al-Gaadir marfuuʼa didduhum.
[17] Wa balad Yahuuza tikhawwif al-Masriyiin. Achaan ayyi Masri al-yifakkir foogha yarjif fi chaan al-kharaar al-chaalah Allah al-Gaadir didd Masir.
[18] Wa fi l-yoom da, khamsa mudun fi Masir yikallumu be lukhkhat al-Ibraaniyiin wa yahalfu kadar yaʼabudu Allah al-Gaadir. Wa waahide min al-mudun dool yisammuuha Madiinat al-Harraay.
[19] Wa fi l-yoom da, yukuun madbah le Allah fi usut balad Masir wa yukhuzzu hajar le Allah fi huduudha.
[20] Wa l-hajar da yabga alaama wa chahaada kadar Allah al-Gaadir gaaʼid fi balad Masir. Wa wakit yikooruku le Allah fi chaan al-yazulmuuhum, hu yirassil leehum munajji al-yihaami leehum wa yikhallishum.
[21] Wa Allah yibayyin nafsah le l-Masriyiin. Wa fi l-yoom da, al-Masriyiin kula yaʼarfuuh wa yaʼabuduuh. Wa yaʼabuduuh wa yigaddumu leyah dahaaya wa hadaaya wa yisawwu nazir le Allah wa yitimmuuh.
[22] Wa wakit Allah yadrub al-Masriyiin be chidde, hu yachfiihum. Achaan humman yigabbulu le Allah wa hu yakhbal suʼaalhum wa yachfiihum.
[23] Wa fi l-yoom da, yukuun derib min balad Masir lahaddi balad Achuur wa l-Achuuriyiin yamchu Masir wa l-Masriyiin yamchu Achuur. Wa l-Masriyiin wa l-Achuuriyiin yaʼabudu Allah sawa.
[24] Wa fi l-yoom da, Israaʼiil tabga al-taalit le Masir wa Achuur. Wa da yijiib al-baraka fi ust al-ard.
[25] Achaan Allah al-Gaadir yibaarikhum wa yuguul : «Mubaarakiin al-Masriyiin chaʼabi wa l-Achuuriyiin al-sawwathum iidi wa Bani Israaʼiil chaʼabi wa warasati.»