[1] Wa Allah gaal : «Zakhriti, ya Madiinat al-Khudus al-aagre, inti al-ma wilidti ! Iiti be farah wa zakhriti, inti al-ma dukhti wajaʼ al-talaga ! Achaan iyaal al-mutallaga // yabgo katiiriin min iyaal al-mara // al-gaaʼide maʼa raajilha.»
[2] «Wassiʼi bakaan kheemitki wa filli gitaʼ maskanki bala hisaab wa tawwili hubaalha wa sabbiti wutaadha.
[3] Achaan inti tiziidi ale l-isra wa l-zeene wa zurriiyitki yaglaʼo ard al-umam wa yaskunu al-mudun al-kharaab.
[4] Ma takhaafe achaan al-eeb ma yakrubki wa ma takhjale achaan ma talge al-ihaana. Wa laakin tanse al-eeb hana subaaki wa ma tizzakkare ihaanitki // wakit inti armala.
[5] Achaan al-khalagaaki, hu misil raajilki wa usmah Allah al-Gaadir. Wa l-yafdaaki, hu Khudduus Israaʼiil wa yinaaduuh Ilaah kulla l-ard.
[6] Ana Allah naadeetki misil mara mutallaga // al-galibha majruuh. Wa ana Ilaahki gult : ‹Mart al-suba, ma waajib tilkhalla.›
[7] Le mudda gisayre bas, ana khalleetki wa laakin be rahmati al-wasiiʼe, nigabbilki battaan.
[8] Wa fi khadabi al-chadiid, ana ma wajjaht aleeki // le wakit gisayyir wa laakin be mahabbiti al-daayme ana narhamki.» Da kalaam Allah al-yafdaaki.
[9] «Wa da, ana nichiifah misil almi al-ja fi ayyaam Nooh wakit ana halaft wa gult : ‹Battaan ma yaji almi misil da // fi l-ard.› Wa hassaʼ da, nahlif leeki inti kula kadar battaan ma nakhdab leeki wa la nikhawwifki.
[10] Hatta kan al-jibaal yilhawwalo wa l-hujaar yinhazzo kula, mahabbiti ma tikiss minki wa muʼaahadati hint al-salaam // ma tingatiʼ.» Da kalaam Allah al-yarhamki.
[11] «Ya Madiinat al-Khudus al-miskiine, // chaalatki al-riih wa ma fi naadum al-yihanniski. Ana nabniiki // be hujaar khaaliyiin wa nukhutt asaaski // fi yaakhuut akhdar.
[12] Wa nisawwi daraadirki // be yaakhuut ahmar wa biibaanki // be hujaar al-yiraaru wa nihawwig huduudki // be hujaar mujammaliin.
[13] Wa kulla iyaalki yabgo talaamiiz Allah wa yiʼiichu fi l-salaam kaamil.
[14] Wa be l-adaala, tabge saabte wa tibaʼʼidi min al-mudaayaga. Ya Madiinat al-Khudus, // ma takhaafe battaan ! Wa l-ruʼub kula ma yajiiki.
[15] Wa kan udwaan gammo le yahjumuuki, da ma jaayi minni ana. Wa ayyi naadum al-yahjimki yafchul giddaamki.
[16] «Aʼarfu ! Ana bas khalagt al-haddaadi // al-yanfukh fi naar al-jamur wa yisawwi ayyi silaah // hasab istiʼmaalah. Wa ana bas khalagt al-naadum al-yidammir al-silaah.
[17] Wa kulli silaah al-yasnaʼooh diddiki ma yanjah wa ayyi lisaan al-yathamki fi l-chariiʼa, inti tinnasri foogah. Wa di warasat abiidi ana Allah wa adaalithum jaaye minni ana.» Wa da kalaam Allah.