[1] Khalli al-sahara wa ard al-jafaaf yafraho wa balad al-yabaas tinawwir wa tinbasit.
[2] Khalli tinmali be nuwwaar al-kadaade wa tinattit wa talʼab wa tizakhrit min al-farah. Allah yanti al-balad di khaaba jamiile misil khaabat Lubnaan wa ard al-indaha intaaj katiir misil jabal al-Karmal // wa sahalat Chaaruun. Wa yichiifu majd Allah wa azamat Ilaahna.
[3] Gawwu iideeku al-ayyaaniin wa sabbutu rikabbuku al-yarjufu.
[4] Wa guulu le l-guluubhum angataʼo : «Abgo gawiyiin ! Ma takhaafo. Daahu Ilaahku ! Hu yaji yichiil leeku al-taar wa yilkaffa leeku fi udwaanku. Wa hu zaatah yaji yinajjiiku.»
[5] Wa khalaas, uyuun al-amyaaniin yinfathu wa udne al-tarchaaniin yasmaʼo.
[6] Wa l-aʼraj yinattit misil al-khazaal wa lisaan al-abkam yiʼiit be l-farah. Achaan almi yisiil fi l-sahara wa rujuul almi yajru // fi kadaadit al-jafaaf.
[7] Al-ard al-haamiye tabga rahad wa l-ard al-atchaane tisiil almi. Wa fi bakaan margad al-baʼaachiim, al-gechch yabga tibin wa birdi.
[8] Wa fi l-bakaan da, yisawwu derib wa yisammuuh al-Derib al-Khaass. Al-ma taahir ma yiʼaddi beyah wa l-munaafikhiin ma yiwadduru foogah achaan al-derib da le chaʼab Allah bas.
[9] Wa fi l-derib da, ma fi duud wa ayyi haywaan khatiir ma yuruukh foogah wa ma yinlagi. Illa l-naas al-najjaahum Allah yamchu foogah.
[10] Wa l-naas al-fadaahum Allah yigabbulu wa yaju fi Sahyuun be zakhraat wa farha. Wa farah daayim yinawwir wujuuhhum wa suruur wa farha yikhattuuhum wa l-hizin wa l-ganitiin // yabgo ma fiihum.